Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 40

Te Akoakoga ki te Fakamagaloga o Agasala

Te Akoakoga ki te Fakamagaloga o Agasala

LUKA 7:36-50

  • NE ‵LIGI ATU NE SE FAFINE AGASALA SE SAUSAU KI VAE O IESU

  • NE FAKATUSA TE FAKAMAGALOGA O AGASALA KI SE TINO NOFO KAITALAFU

E kese‵kese a auala e ‵saga atu ei a tino ki pati mo mea ne fai ne Iesu, kae e fakalagolago eiloa ki te tulaga o olotou loto. Ne matea faka‵lei atu a te mea tenā i se fale e tasi i Kalilaia. Ne ‵kami ne te Falesaio ko Simona a Iesu ki se ‵kaiga, kāti ke onoono faka‵lei atu ki te tagata telā ne fai ne ia a galuega fakaofoofogia. Kāti ne kilo atu a Iesu ki te mea tenei e pelā me se avanoaga ke tavini atu ki tino i konā, telā ne talia ei ne ia, e pelā mo ‵kamiga ko oti ne talia ne ia ke ‵kai fakatasi mo tino ao lafoga mo tino agasala.

Kae ne seki talimālō faka‵lei a Iesu e pelā mo faiga masani ki mālō. Ona ko auala ‵pefu i Palesitina, ne masani o ‵vela kae lai‵lai a vae i taka kolā ne fakaaoga sāle, tela la, se faifaiga masani o te talimālō ke ‵fulu a vae o mālō ki vai. Ne seki fai eiloa penā ki a Iesu. Ne seki sogi fakatalofa atu ki a ia e pelā mo te masani. A te suā tuu ko te ‵ligi atu o te sinu ki luga i te ulu o te mālō ke fakaasi atu te loto alofa mo te uiga talimalo. Ne seki fai foki te mea tenei ki a Iesu. Tela la, e mata, ne talimalo eiloa ne latou a ia mo te fiafia?

Ne kamata te ‵kaiga ki te saga‵saga atu o mālō i te taipola. I te taimi koi ‵kai ei latou, ne ulu lēmū atu se fafine telā ne seki ‵kami. Ne ‘lauiloa tou fafine i te fa‵kai tenā me se tino agasala.’ (Luka 7:37) E agasala katoa a tino sē ‵lei katoatoa, kae e foliga mai me ne ola a te fafine tenei i se olaga finalalolagi, kāti e pelā me se fafine talitagata. Kāti ne lagona ne tou fafine a akoakoga a Iesu, e aofia i ei tena ‵kamiga ki a ‘latou katoa kolā e fi‵ta kae ‵mafa o olotou amoga ke olo atu ki a ia ke tuku atu ne ia se malosi fou.’ (Mataio 11:28, 29) E se taumate, ne otia malosi te loto o tou fafine i pati mo faifaiga a Iesu, telā ne ‵sala atu ei a ia ki a Iesu.

Ne fanatu tou fafine i tua o Iesu i te taipola kae ne totuli ifo i ana vae. Ne ‵sofi ifo ana loimata ki vae o tou tagata, kae ne ‵solo ne ia ki ana lauulu. Ne sogi atu tou fafine ki vae o Iesu kae ‵ligi atu ki ei a te sausau manogi gali telā ne fanatu mo tou fafine. Ne kilokilo atu a Simona mo te sē fiafia, kae fai ifo ki a ia: “Kafai a te tagata tenei se pelofeta eiloa, e ‵tau o iloa ne ia me ko oi te fafine telā e puke atu ki a ia, me i a ia se fafine agasala.”—Luka 7:39.

Ne iloa ‵lei ne Iesu a mafaufauga o Simona, kae ne fai atu: “Simona, e isi se mea e fia fai atu ne au ki a koe.” Ne tali atu a ia: “Te Faiakoga, fai mai la!” Ne toe fai atu a Iesu: “E tokolua tāgata ne kaitalafu tupe i se tino; e tokotasi te tino ne kaitalafu ne ia te 500 tenali, kae ko te suā tino e 50. I te taimi ko se mafai ei ne lāua o ‵togi a lā kaitalafu, ne fakamagalo ei ne ia a lāua tokolua?” Tela la, ko oi la te tino i a lāua konā ka alofa malosi atu ki a ia?” Kāti ne tali atu fua a Simona mo te sē fiafia: “Kāti la ko ia telā e lasi tena kaitalafu.”—Luka 7:40-43.

Ne lotomalie ki ei a Iesu. Ne kilo atu a ia ki te fafine, kae fai atu ki a Simona: “E lavea ne koe te fafine tenei? Ne ulu mai au ki tou fale; ne seki tuku mai ne koe ne vai ke ‵fulu ei oku vae. Kae ne faka‵siu ne te fafine tenei oku vae ki ana loimata kae ‵solo ne ia ki ana laulu. Ne seki sogi mai koe ki a au, kae ko te fafine tenei, talu mai te taimi ne ulu mai ei au ki loto, ne sogi faeloa a ia ki oku vae. Ne seki ‵ligi ne koe ne sinu ki toku ulu, kae ne ‵ligi ne te fafine tenei oku vae ki se sinu manogi. Ona ko te mea tenei, au e fai atu ki a koe, e tiga eiloa te uke o ana agasala kae ko oti katoa ne fakamagalo ona ko te lasi o tena alofa. Kae ko te tino telā e foliki te mea ne fakamagalogina, e foliki tena alofa.”—Luka 7:44-47.

Ne seki talia ne Iesu a amioga finalalolagi. I lō te fai penā, e fakaasi atu ne ia tena atafai mo te malamalama ki tino kolā ne fai ne latou a agasala matagā kae ko fakaasi atu me ko sala‵mo latou kae ‵fuli atu ki te Keliso mō se fakatapūga. Kae ko tafaga te gali o te fakatapūga ne maua ne te fafine tenei i te taimi ne fai atu ei a Iesu: “Au agasala ko magalo. . . . Ko oti ne fakasao koe ne tou fakatuanaki; fano la mo te filemu.”—Luka 7:48, 50.