Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 61

Ne Faka‵lei ne Iesu se Tamaliki Tagata e Ulufia ne te Temoni

Ne Faka‵lei ne Iesu se Tamaliki Tagata e Ulufia ne te Temoni

MATAIO 17:14-20 MALEKO 9:14-29 LUKA 9:37-43

  • E MANAKOGINA SE FAKATUANAKI MALOSI KE FAKA‵LEI EI TE TAMALIKI TAGATA E ULUFIA NE TE TEMONI

I te taimi ne ‵foki mai ei a Iesu, Petelu, Iakopo, mo Ioane mai i te mauga, ne fetaui eiloa latou mo se vaitino tokouke. E isi se fakalavelave ko tupu. Ko maopoopo atu a failautusi ki tafa o te kau soko, kae kinau atu ki a latou. Ne tai ‵poi eiloa a tino i te mateaga ne latou a Iesu, kae ne ‵tele atu latou ke fetaui mo ia. “Se a te mea e kinau ei koutou mo latou?” ko tena fesili.—Maleko 9:16.

Ne totuli atu se tagata mai te vaitino i mua o Iesu, kae fakamatala atu: “Te Faiakoga, ne aumai ne au taku tamaliki ki a koe me e nofo i ei se agaga telā e fai ne ia a ia ke gūgū. I so se koga e ulufia ei a ia, e ‵pei ne tou tagata a ia ki lalo i te laukele, ‵sali ana suavale kae ū ana nifo kae galo atu tena malosi. Ne fakamolemole atu au ki ou soko ke afuli aka te agaga tenā keatea kae ne seki mafai ne latou.”—Maleko 9:17, 18.

E foliga mai me ne fakamasei ne failautusi a soko ona ko te mea ne seki mafai ne latou o faka‵lei te tamaliki tagata tenā, kae kāti ne fakatauemu atu ki olotou taumafaiga. Tela la, i lō te tali atu ki te tamana mafatia tenā, ne faipati atu a Iesu ki te vaitino, ana muna: “Te kautama sē fakatuanaki kae fai mea piko‵piko tenei, ka pefea te leva e fesoasoani atu ei au ki a koutou? Ka pefea te leva e fa‵ki ei au i a koutou?” Kāti ne fakasino atu eiloa a pati ‵mafa konei, ki failautusi faka‵tupu fakalavelave ki ana soko, i te taimi ne galo ei a ia. Ne ‵fuli atu a Iesu ki te tamana loto fanoanoa, kae fai atu: “Aumai ki a au te tamaliki tenā.”—Mataio 17:17.

I te fanatuga o te tamaliki ki a Iesu, ne fakasiga a ia ki lalo ne te temoni telā ne ulufia a ia i ei kae ne fai ei a ia ke fitifiti malosi. Ne tumau eiloa te tamaliki i te takafilifili i te laukele, kae ‵fonu tena gutu i kapiaga. “Ko pefea te leva ne tupu ei te mea tenei ki a ia?” ne fesili atu Iesu ki te tamana. Ne tali atu a ia: “Talu mai te taimi koi foliki ei a ia, e ‵pei sāle ne te agaga a ia ki loto i te afi e pelā foki mo te vai ke tamate ei a ia.” Telā ne fakamolemole atu te tagata: “Kae kafai e mafai o fai ne koe se mea ki ei, a koe ke alofa kae fesoasoani mai ki a matou.”—Maleko 9:21, 22.

Ne manako malosi te tamana ki se fesoasoani ona  ko te sē mafai ne soko o Iesu o fesoasoani atu. Ona ko te manako malosi o te tagata ki se fesoasoani, ne fai atu ei ne Iesu a pati fakamalosi konei: “Kaia e fai mai ei koe penei, ‘Kafai e mafai ne koe’? Me i te tino telā e fakatuanaki e mafai o fai ne ia a mea katoa.” Ne kalaga fakavave atu te tamana: “Au e fakatuanaki! Fesoasoani mai ke fakamalosi aka toku fakatuanaki!”—Maleko 9:23, 24.

Ne matea ne Iesu me ko ‵tele atu te vaitino ki a ia. Ne ‵liko atu a Iesu ki te temoni i mua o tino katoa konei: “Te agaga gūgū kae ‵tuli, au e fakatonu atu ki a koe, fano keatea mai i a ia kae e tapu koe e toe foki ki ei.” I te taimi ne fano keatea ei te temoni, ne fai ne ia ke pakalaga kae pole valevale te tamaliki. Oti aka loa, ne takato filemu mai te tamaliki i te laukele. I te laveaatuga o te mea tenei, ne fai atu a tino e tokouke: “A ia ko mate!” (Maleko 9:25, 26) Kae i te taimi ne puke atu ei a Iesu ki te lima o te tamaliki tagata, ne tu aka a ia ki luga kae ne “‵lei ei te tamaliki i te taimi eiloa tenā.” (Mataio 17:18) Se mea ‵tau, me ne ōfo a tino i te mea ne fai ne Iesu.

I te taimi ne uga atu muamua ei ne Iesu a te kau soko ke talai, ne mafai ne latou o afuli keatea a temoni. Tela la, i te taimi ne ‵nofo atu eiloa latou i te fale, ne fesili atu latou ki a ia: “Kaia ne seki mafai ei ne matou o afuli te agaga tenā?” Ne fakamatala atu ne Iesu me ne fai penā ona ko te sē lava o te lotou fakatuanaki, ana muna: “A te vaega tenei e mafai fua o vau ki tua e auala i te ‵talo.” (Maleko 9:28, 29) Ne ‵tau o maua te fakatuanaki malosi fakatasi mo te ‵talo ke maua te fesoasoani e manakogina mai te Atua ke ‵tuli kea‵tea a temoni ma‵losi.

Ne fakaoti ne Iesu ana pati penei: “Au e fai ‵tonu atu ki a koutou, kafai te otou fakatuanaki e pelā mo te lasi o te fuaga o te sinapi, ka fai atu koutou ki te mauga tenei, ‘Masiki mai i konei ki te koga telā,’ ko te mea eiloa ko masiki, kae ka seai eiloa se mea e se mafai ne koutou o fai.” (Mataio 17:20) E malosi ‵ki eiloa te fakatuanaki!

Kāti e foliga mai e pelā me e se mafai o manumalo io me ave keatea a fakalavelave mo mea faiga‵ta kolā e taofi ei te taviniga ki a Ieova, e pelā eiloa mo te ‵tu mai o se mauga tonu. Kae kafai e ati aka ne tatou te fakatuanaki, e mafai ne tatou o manumalo i vaegā fakalavelave mo mea faiga‵ta kolā e fai pelā me ne mauga.