Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 29

E Mafai o Fai ne se Tino a Galuega ‵Lei i te Sapati?

E Mafai o Fai ne se Tino a Galuega ‵Lei i te Sapati?

IOANE 5:1-16

  • KO TALAI ATU A IESU I IUTA

  • NE FAKA‵LEI NE IA SE TAGATA MASAKI I SE VAI KOUKOU

Ne uke ‵ki a mea ne fai ne Iesu i tena galuega talai sili i Kalilaia. Kae e pelā eiloa mo ana pati, “E ‵tau foki mo au o folafola atu te tala ‵lei o te Malo o te Atua ki nisi fakai,” ne uke atu a fa‵kai ne mafaufau ki ei a Iesu i lō Kalilaia fua. Telā, “fano ei a ia o talai atu i sunako i Iuta.” (Luka 4:43, 44) Ne ‵lei eiloa te mea tenei me ko oko nei ki te taimi e ‵somo aka ei a lau o lakau kae ko pili foki o fai se ‵kaiga fakamanatu i Ielusalema.

Kafai e fakatusa a mea e faitau ne tatou ki te galuega talai a Iesu i Kalilaia, e mu‵tana fua a mea e maua ne tatou i tusi Evagelia e uiga ki tena galuega i Iuta. Faitalia foki eiloa te sē fia‵fia o tino Iutaia, ne seki taofi aka ei a Iesu mai te talai atu faeloa mo te faiga o galuega ‵lei i so se koga ne fanatu a ia ki ei.

Ne seki leva kae ne fanatu a Iesu i tena auala ki te ‵toe fa‵kai lauiloa o Iuta, ko Ielusalema, ke fakamanatu te Paseka i te 31 T.A. I te fa‵kai fakalavelave tenā, i tafa o te Mataloa Mamoe, ne tu mai i ei te vai koukou lasi e taku ko Petesa. Ne olo atu ki te vai koukou tenei a tino ma‵saki e tokouke, tino ‵kivi, penā foki mo tino ‵pili. Kaia? Ona ko te tali‵tonu me e mafai o faka‵lei a masaki o tino māfai e olo atu ki loto i te vai koukou māfai ko ‵lepu te vai.

Ko te Sapati nei tenā, kae ne lavea atu ne Iesu i te vai koukou se tagata telā ne masaki i tausaga e 38. Ne fesili atu a Iesu: “E manako koe ke malosi koe?” Ne tali atu te tagata: “Tou ‵malu, e seai se tino e tuku ne ia au ki lalo i te vai i te taimi e ‵lepu ei; kae kafai e fanaifo au kae ko mua atu te suā tino i a au.”—Ioane 5:6, 7.

Ne fai atu ei ne Iesu se mea telā ne ‵tau o ofo i ei a te tagata mo so se tino telā ne lagona ne ia: “Tu ki luga, puke tou papa kae sasale.” (Ioane 5:8) Kae tenā eiloa tena mea ne fai. I te taimi eiloa ne ‵lei ei tou tagata, ne puke tena papa kae kamata o sasale atu!

I lō te fia‵fia ki te mea gali telā ne tupu, ne lavea ne tino Iutaia te tagata tenā kae fai atu mo te fia fakamasino: “A te mea tenei ko te Sapati, kae e tapu ma ave ne koe tou papa.” Ne tali atu tou tagata: “A te tino telā ne faka‵lei ne ia au ne fai mai ki a au, ‘Puke tou papa kae sasale.’” (Ioane 5:10, 11) Ne fakamasei ne tino Iutaia konā se tino telā ne fai ne ia se faka‵leiga o te tino masaki i te Sapati.

Ne fesili atu latou: “Ko oi te tino ne fai atu ki a koe, ‘Puke tou papa kae sasale’?” Kaia ne fesili atu latou ki te tagata? Ona ko te mea “ko oti ne fanatu a Iesu i loto i te vaitino kolā ne ‵nofo atu i konā,” kae ko te tagata telā ne faka‵lei tena masaki e se iloa ne ia te igoa o Iesu. (Ioane 5:12, 13) Kae ne manako te tagata tenei ke toe fetaui lāua mo Iesu. Fakamuli ifo, ne fetaui a Iesu mo te tagata tenā i te faletapu, telā ne iloa ei ne te tagata tenā me ko oi ne faka‵lei ne ia a ia i te vai koukou.

Ne maua ne te tagata telā ne faka‵lei tena masaki a te kau Iutaia kolā ne fesili atu me ko oi ne faka‵lei ne ia tou tagata. Ne taku atu ne ia ki a latou me ko Iesu. I te taimi ne ‵logo ei latou i te mea tenā, ne olo atu ei te kau Iutaia ki a Iesu. E mata, ne olo atu me ne fia iloa ne latou te auala ne mafai ei ne Iesu o fai a vaegā mea fakaofoofogia konā? Ikai. I lō te fai penā, ne olo atu fua ke ‵sala se mea ‵se i a Iesu i tena mea ‵lei ne fai i te Sapati. Kae ne kamata foki latou o fakasaua atu ki a ia!