Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 52

Te Fagaiga o te Fia Afe o Tino ki Nai Falaoa mo Ika

Te Fagaiga o te Fia Afe o Tino ki Nai Falaoa mo Ika

MATAIO 14:13-21 MALEKO 6:30-44 LUKA 9:10-17 IOANE 6:1-13

  • NE FAGAI NE IESU A TĀGATA E TOKO 5,000

Ne fia‵fia a apositolo e toko 12 i te lotou malaga talai ki koga katoa i Kalilaia, kae ne fakamatala atu ne latou ki a Iesu “a mea katoa kolā ko oti ne fai kae akoako atu ne latou.” Ne ‵tau eiloa o fi‵ta malosi latou. Kae ne seki maua aka loa ne latou se avanoaga o ‵kai ona ko te tokouke o tino e oloolo sāle i konā. Tela la, ne fai atu a Iesu: “‵Mai ‵tou olo o malo‵lo malie aka i se koga, i a tatou aka eiloa.”—Maleko 6:30, 31.

Ne ‵sopo latou ki se poti, kāti e pili atu ki Kapanaumi, kae olo atu ki se koga e faigata ke oko ki ei, i te feitu ki saegala o te Vaitafe o Iolitana telā e ‵mao malie atu mai i Petesaita. Kae e tokouke a tino ne lavea ne latou i a latou ko olo, kae ne ‵logo foki a nisi tino i ei. Ne ‵tele fakatasi atu latou i te matafaga, kae ‵nofo atu latou i konā i te taimi ne oko atu ei te poti ki uta.

Ne sopo a Iesu ki lalo mai te poti kae ne matea atu ei ne ia te vaitino, telā ne alofa malosi a ia ki a latou, me ne fai latou e pelā me ne mamoe kolā e seai se lotou tausi mamoe. Tela la, “ne kamata o akoako atu ne ia a mea e uke ki a latou” e uiga ki te Malo. (Maleko 6:34) Ne faka‵lei foki ne ia “a tino kolā ne ma‵nako ki se faka‵leiga.” (Luka 9:11) Ko leva te taimi, kae ne fai atu a soko ki a ia: “A te koga tenei e ‵mao ‵ki kae ko pili o po; uga atu te vaitino ke olo ki fa‵kai ko te mea ke mafai o ‵togi ne olotou meakai i ei.”—Mataio 14:15.

Ne tali atu a Iesu: “E se ‵tau o olo latou; tuku atu ne koutou ne meakai ke ‵kai ei latou.” (Mataio 14:16) E tiga eiloa ne iloa ne Iesu tena mea ka fai, ne tofotofo ne ia a Filipo ki te fesili tenei: “Tefea te koga ka ‵togi ei ne tatou a falaoa ke ‵kai ei a tino konei?” Ne ‵tau o fesili atu ki a Filipo me i a ia se tino mai i se koga telā e pili atu ki Petesaita. Kae ko te ‵togiga o falaoa e se ko te faka‵leiga eiloa o te fakalavelave. E nofo loa ki te toko 5,000 tāgata i konā. Kae kāti ne mafai o tapolo te aofaki tenā, māfai e lau aka a fāfine mo tama‵liki! Ne tali atu a Filipo: “E se lava te lua selau tenali [a te tenali ko te ‵togi o te tino i te aso] ke ‵togi ki ei a falaoa ke maua ne tino taki tokotasi ne mu mea mai i ei.”—Ioane 6:5-7.

Kāti ne fia fakaasi atu ne Anitelea me e se mafai eiloa o fagai ne latou a tino katoa, ne fai atu a ia: “E isi se tamaliki tagata i konei e lima ana falaoa mo tamā ika e lua. Kae se a te aoga o mea konā ki tino e tokouke konei?”—Ioane 6:9.

Ne ufi ne mouku lauusiusi a feitu mauga, ko te taimi e ‵somo aka ei a lau o lakau, mai mua malie eiloa o te Paseka i te 32 T.A. Ne fai atu a Iesu ki ana soko ke fakatonu atu ki tino ke ‵nofo ki lalo i potukau taki toko 50 mo taki toko 100. Ne puke a ia ki falaoa e lima mo ika e lua konā, kae fakafetai atu ki te Atua. Oti aka, ne tofitofi ne ia a falaoa mo ika konā. Ne avatu ne Iesu a mea konei ki ana soko, ke tufatufa atu ne latou ki tino. Se mea fakaofoofogia, me ne ‵kai a tino katoa ke oko ki te taimi ko ma‵kona ei latou!

Oti aka loa, ne fai atu ei a Iesu ki ana soko: “‵Luku mai a toegā meakai, ko te mea ke seai se mea e māumāu.” (Ioane 6:12) Ne mafai o faka‵fonu ne latou a tapola e 12 ki mea‵kai kolā ne ‵toe!