Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 64

Se Akoakoga e Uiga ki te Loto Fakamagalo

Se Akoakoga e Uiga ki te Loto Fakamagalo

MATAIO 18:21-35

  • FAKAMAGALO FAKAFITU TAIMI?

  • TALA FAKATUSA E UIGA KI TE POLOGA SĒ LOTO FAKAMAGALO

Ko oti ne lagona ne Petelu a pati fesoasoani a Iesu e uiga ki te ‵teuga o fakalavelave i va o taina, mai te taumafai ke faka‵lei aka i te va eiloa o lāua tokolua. Kae e foliga mai me ne fia iloa ne Petelu te uke o taimi e ‵tau ei o taumafai se tino ke fai penā.

Ne fesili atu a Petelu: “Te Aliki, e fakafia taimi e agasala mai ei toku taina ki a au kae fakamagalo ne au? E a, e fakafitu taimi?” E akoako mai a nisi takitaki lotu me e ‵tau o fakamagalo fakatolu. Tela la, kāti ne manatu aka a Petelu me e sili atu tena ‵lei māfai e fakamagalo “fakafitu” ne ia tena taina.—Mataio 18:21.

Kae ko te manatu ki te fakamauga o mea ‵se, e se fetaui mo akoakoga a Iesu. Tela la, ne faka‵tonu ne ia a Petelu: “Au e fai atu ki a koe, e se fakafitu taimi, kae faka-77 taimi.” (Mataio 18:22) E fakauiga te mea tenā i nisi tugapati, ki te se-gata-mai. E se ‵tau o isi se tapulā ki te fia o taimi e fakamagalo ei ne Petelu tena taina.

Ne fai atu ne Iesu ki a Petelu mo nisi tino se tala fakatusa ke faka‵mafa atu te lotou tiute ke loto fakamagalo. Se tala e uiga ki se pologa telā ne fakatamala o fakaakoako atu ki tena matai loto fakamagalo. Ne manako te tupu o fakamasino a kaitalafu o ana pologa. E tokotasi te pologa telā ne aumai ki a ia, ne lasi tena kaitalafu telā e nofo ki te 10,000 taleni [60,000,000 tenali]. E seai eiloa se auala e mafai ei o toe ‵togi atu ne ia te kaitalafu tenā. Tela la, ne fakatonu atu te tupu ke ‵togi atu te pologa, tena avaga mo ana tama‵liki ko te mea ke ‵tina ei te kaitalafu tenā. I konā loa, ne totuli ifo te pologa i mua o tena pule kae ne akai atu penei ki a ia: “Kufaki malie aka, me e toe ‵togi atu eiloa ne au au mea katoa.”—Mataio 18:26.

Ne alofa te tupu kae ne fakamagalo ne ia a te kaitalafu lasi a te pologa. I te otiga ne fakamagalo tou tagata ne te tupu, ne fanatu te pologa tenā, kae ne maua ne ia te suā taina pologa, telā e nofo kaitalafu fua ki a ia i se 100 tenali. Ne puke atu tou tagata ki ei kae kamata o ‵kumi ne ia te ua o tena taina pologa, ana muna: “‵Togi mai a mea katoa kolā ne kaitalafu ne koe.” Kae ne fakasiga ifo ei tena taina pologa ki mua o te pologa telā ne nofo kaitalafu a ia ki ei, kae fakamolemole atu: “Kufaki malie aka me ka toe ‵togi atu eiloa ne au  au mea.” (Mataio 18:28, 29) Kae ne fakatamala eiloa te pologa telā ne fakamagalo tena kaitalafu ne te tupu o fakaakoako ki tena pule. Ne fai ei ne ia ke ‵pei tena taina pologa ki te falepuipui, telā e foliki fua tena kaitalafu.

Ne fai atu ei a Iesu, ne matea atu ne nisi pologa a te faifaiga sē alofa fakamagalo tenei, ne olo atu ei latou kae fai atu ki te lotou pule, telā ne kaitaua kae fakatonu atu ke vau te pologa tenā, kae fai atu: “Te pologa masei, ne fakamagalo ne au tau kaitalafu, i a koe ne tagi mai ki a au. E a, e se ‵tau foki o fakamagalo ne koe tou taina pologa, e pelā mo koe ne fakamagalo ne au?” Ko oko eiloa i te kaitaua o te pule, telā ne tuku atu ei ne ia a te pologa sē loto fakamagalo ki te kau tausi pagota ke oko eiloa ki te taimi ko magalo ei tena kaitalafu kātoa. Ne fakaoti penei a pati a Iesu: “E penā foki eiloa a mea ka fai ne toku Tamana i te lagi ki a koutou māfai e se fakamagalo ne koutou taki tokotasi otou taina mo otou loto kātoa.”—Mataio 18:32-35.

Ko se faka‵tau eiloa te gali o te akoakoga tenei ne akoako mai ki a tatou e uiga ki te loto fakamagalo! Ko oti ne fakamagalo tatou ne te Atua mai te kaitalafu lasi o te agasala. Faitalia me se a te agasala e fai mai ne se taina Kelisiano ki a tatou, e foliki fua māfai e fakatusa ki te mea ne fakamagalo ne te Atua. Kae ko oti foki ne fakamagalo fakafia afe ne Ieova tatou, kae e se fakatasi fua. E a, e se mafai ne tatou o fakamagalo ‵tou taina i taimi e uke, faitalia me e isi se pogai tonu e ‵tau o ita tatou i ei? E pelā mo te Lāuga a Iesu i luga i te Mauga, a te Atua ka “fakamagalo mai omotou agasala, e pelā mo matou e fakamagalo atu ki tino kolā e agasala mai ki a matou.”—Mataio 6:12.