Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 65

Ne Akoako Atu i te Taimi ne Faimalaga Atu ei ki Ielusalema

Ne Akoako Atu i te Taimi ne Faimalaga Atu ei ki Ielusalema

MATAIO 8:19-22 LUKA 9:51-62 IOANE 7:2-10

  • TE KILOKILOGA A TAINA O IESU KI A IA

  • E PEFEA TE TĀUA O TE TAVINIGA KI TE MALO?

Mō se taimi tai leva, ne fai fua ne Iesu tena galuega i Kalilaia, telā ne maua ne ia a tino fia‵fia e tokouke i lō Iuta. I tafa i ei, i te taimi ne nofo atu ei a ia i Ielusalema kae faka‵lei ne ia se tagata i te Paseka, “ne kamata o ‵sala malosi a tino Iutaia ke tamate a ia.”—Ioane 5:18; 7:1.

Ko te ‵tau nei e ‵to ei a lau o lakau i te 32 T.A., kae ko pili o fai te ‵Kaiga o Fale Fakamalumalu. A te ‵kaiga tenei ne fakamanatu i aso e fitu kae ‵soko atu ki ei se sauniga tāua i te valu o aso. Ne fakamanatu ne te ‵kaiga tenā a te tausaga o tino ‵tokilakau, kae se taimi foki e fia‵fia malosi kae loto fakafetai i ei a tino.

Ne fakamalosi atu a āfa taina o Iesu—Iakopo, Simona, Iosefa, mo Iuta—ki a ia: “Tiaki te koga tenei kae fano ki Iuta.” A Ielusalema ko te fakavae o te lotu i te fenua. I ‵kaiga e tolu i te tausaga, ne ‵fonu eiloa te fa‵kai i tino. Ne fai atu a taina o Iesu: “Me seai se tino e fai ‵funa ana mea māfai e manako ke lauiloa a ia i mua o tino. Kafai e fai ne koe a mea konei, fakaasi atu la koe ki te lalolagi.”—Ioane 7:3, 4.

A te ‵tonuga loa, “ne seki fakatuanaki ana taina ki a ia” e pelā me ko te Mesia. Kae ne ma‵nako latou ke lavea ne tino katoa kolā ne maopoopo i te ‵kaiga a tou tagata e fai ne ia a galuega ‵mana. Ne iloa ne Iesu te fakamataku o te mea tenā, telā ne fai atu ei a ia ki a latou: “E seai se pogai e takalia‵lia ei te lalolagi ki a koutou, kae e takalia‵lia mai ki a au, me e molimau atu au i olotou galuega e matagā. Olo koutou ki te fakamanatuga; au e se fano ki te fakamanatuga tenei, me e seki oko ki toku taimi.”—Ioane 7:5-8.

Mai tua o nai aso ne olo atu ei a taina o Iesu mo se potukau o tino faima‵laga, kae ne olo ‵muni atu a Iesu mo ana soko, ko te mea ke se lavea latou ne tino. Ne olo atu latou i te auala ‵tonu i loto i Samalia, i lō te auala masani i tafa o te Vaitafe o Iolitana. Kāti ne ma‵nako a Iesu mo ana soko ki se koga ke ‵nofo i ei i Samalia, telā ne uga atu ei ne ia a avefekau ke ‵mua atu o fai a fakatokaga. Ne ita a tino i te koga e tasi ma fesoasoani io me fakaasi atu te uiga talimalo ki a latou, ona ko te mea ko fanatu a Iesu ki Ielusalema ki te ‵kaiga fakamanatu a te kau Iutaia. Ne fesili atu ei a Iakopo mo Ioane mo te kaitaua: “Te Aliki, e manako koe ke ka‵laga māua ke to mai te afi mai te lagi o fakaseai atu latou?” (Luka 9:54) Ne ‵liko ne Iesu lāua ona ko te lā manatu, kae ne faka‵soko eiloa te lotou malaga.

A koi olo atu latou i te auala, ne fai atu se failautusi ki a Iesu: “Te Faiakoga, au ka tautali atu i a koe i so se koga e fano koe ki ei.” Ne tali atu a Iesu: “E isi ne lua o alope, kae ko manu eva e isi ne olotou ofaga, kae ko te Tama a te tagata e seai se koga e moe ei a ia.” (Mataio 8:19, 20) Ne fakaasi atu ne ia me ka fepaki a te failautusi mo mea faiga‵ta māfai ko fai a ia mo fai se soko o Iesu. Kae e foliga mai me ko tō fakamatamata te failautusi tenā ke talia ne ia a te vaegā olaga tenei. Tela la, e mafai ne tatou taki tokotasi  o fesili ifo, ‘E pefea te lasi o toku loto fiafia ke tautali atu ki a Iesu?’

Ne fai atu a Iesu ki te suā tagata: “Vau o tautali mai i a au.” Ne tali atu te tagata: “Te Aliki, talia mai ke fano mua au o tanu toku tamana.” Ona ko te mea e iloa ne ia a fakanofonofoga o te tagata, ne fai atu ei a Iesu: “Tuku ei a tino ‵mate ke tanu olotou tino ‵mate, kae fano koe o folafola atu te tala ‵lei e uiga ki te Malo o te Atua ki koga katoa.” (Luka 9:59, 60) E mautinoa eiloa me e seki mate te tamana o te tagata tenā. Moi fai ko oti ne mate, penei e se nofo atu tena tama i konā o faipati ki a Iesu. Ne seki toka te tama tenā ke fakamuamua te Malo o te Atua i tena olaga.

I te taimi ne olo atu ei latou i te auala ki Ielusalema, kae ne fai atu penei te suā tagata ki a Iesu: “Ka tautali atu au i a koe, e te Aliki, kae talia mai ke fakatofa muamua au ki tino o toku kāiga.” Ne tali atu a Iesu: “E seai se tino e puke tena lima ki se mea fakamalū laukele, kae toe kilo ki mea i ana tua e aoga mō te Malo o te Atua.”—Luka 9:61, 62.

E ‵tau o ‵kilo tonu atu faeloa a tino kolā e ma‵nako ke fai mo soko o Iesu ki te taviniga ki te Malo. Kafai e se kilo tonu faeloa ki mua te tino fakamalū te laukele, ka piko valevale te auala telā e fanatu a ia i ei. Kafai e tuku ne ia te mea fakamalū laukele ko te mea ke onoono faeloa ki mea i ana tua, ka fakatuai ne ia te galuega i te fatoaga. E penā foki loa so se tino telā e toe kilo ki tua i te lalolagi nei, kāti e mafai o tō atu keatea a ia mai i te auala telā e tau atu ei ki te ola se-gata-mai.