Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 72

Ne Uga Atu ne Iesu a Soko e Toko 70 ke Talai Atu

Ne Uga Atu ne Iesu a Soko e Toko 70 ke Talai Atu

LUKA 10:1-24

  • NE FILIFILI NE IESU A SOKO E TOKO 70 KAE UGA ATU LATOU KE OLO O TALAI

Ko tai oti atu a te tausaga ko te 32 T.A., kāti ko tolu tausaga talu mai te papatisoga o Iesu. Ne fatoa ‵kau atu latou mo ana soko ki te ‵Kaiga o Faleie Tapu i Ielusalema. Kāti koi ‵nofo ‵pili atu eiloa latou ki ei. (Luka 10:38; Ioane 11:1) A te ‵tonuga loa, ne fakamāumāu ne Iesu a te lasiga o masina e ono kolā ne ‵toe mai o tena galuega i Iuta io me ko te suā feitu o te Vaitafe o Iolitana i te kogā koga ko Pelea. Ne ‵tau eiloa o talai atu foki i koga konei.

Mai tua malie ifo o te Paseka i te 30 T.A., ne fakamāumāu ne Iesu a nai masina ke talai atu i Iuta kae faimalaga atu foki ki Samalia. Kāti ko te vaitaimi o te Paseka i te 31 T.A., ne taumafai a te kau Iutaia o tamate a ia. I te tasi mo te āfa tausaga mai tua ifo i ei, ne galue malosi eiloa a Iesu i te akoako atu i te feitu ki matū o Kalilaia. I te vaitaimi tenā, ne fai eiloa a tino e tokouke mo fai ana soko. I Kalilaia, ne fakaakoako ne Iesu ana apositolo kae uga atu mo te fakatonuga: “Olo o talai atu penei: ‘A te Malo o te lagi ko pili mai.’” (Mataio 10:5-7) Tela la, ne fakatoka ei ne ia i konā a te ‵toe galuega fakapito lasi ke talai atu i Iuta.

Ke kamata te galuega fakapito tenei, ne filifili aka ne Iesu a soko e toko 70 kae uga ne ia ke olo atu taki tokolua. Tela la, e ‵tusa mo te 35 a ‵pea o tino talai o te Malo i te koga talai, telā e uke a “fuataga e ‵tau o ‵kati, kae e mu‵tana a tino ga‵lue.” (Luka 10:2) Ne ‵mua atu latou ki koga kolā kāti ne fanatu fakamuli a Iesu ki ei. Ne ‵tau mo te toko 70 o faka‵lei a tino ma‵saki kae fakasalalau atu te fekau foki eiloa telā ne folafola atu ne Iesu.

Ne seki ‵tau o ‵saga atu a soko konei ki te akoako atu i te sunako. Ne fai atu a Iesu ke olo atu latou ki fale o tino. “I so se fale e ulu koutou ki ei, fai atu muamua penei: ‘Ke i te fale tenei a te filemu.’ Kae kafai e nofo i konā se taugasoa o te filemu, ka maua ne ia te otou filemu.” Se a te lotou fekau? Ne fai atu a Iesu: “Fai atu ki a latou: ‘A te Malo o te Atua ko pili mai ki a koutou.’”—Luka 10:5-9.

A fakatonuga ne tuku atu ne Iesu ki te toko 70 e tai ‵pau mo fakatonuga ne tuku atu ne ia i te taimi ne uga atu ei a apositolo e toko 12 i se tausaga mai mua atu i ei. Ne fakailoa atu ne ia me e se ko tino katoa ka talia ne latou mo te fiafia te lotou galuega. Kae ka taumafai latou o fakatokatoka a tino fia‵fia ko te mea kafai ko oko atu a Iesu, ka olioli eiloa mo te fia‵fia a tino e tokouke ke fetaui mo te Matai kae ke tauloto ki mea e uke mai i a ia.

E seki leva kae toe ‵foki atu a ‵pea e toko 35 o tino talai o te Malo ki a Iesu. Ne fai atu latou mo te fia‵fia ki a ia: “Te Aliki, ne faka‵logo mai foki a temoni ki a matou mai te fakaaogaga o tou igoa.” Kāti ne fiafia ‵ki a Iesu i te vaegā tala ‵lei tenā, me ne tali atu a ia: “Ne lavea ne au a Satani ko tō ifo  mai te lagi e pelā me se uila. Kiloke! ko oti ne tuku atu ne au ki a koutou a te pule ke lakalaka a gata mo akalava.”—Luka 10:17-19.

Ne fakatalitonu atu ne Iesu ki ana soko me ka mafai eiloa o manumalo latou i mea fakalogo‵mae, mai te lakalaka ne latou i se auala fakatusa a gata mo akalava. E sili atu i ei, e mafai eiloa o tali‵tonu latou me ka to ifo a Satani mai te lagi i aso mai mua nei. Ne fesoasoani atu foki a Iesu ki te toko 70 ke lavea ne latou a te ‵toe mea tāua i taimi mai mua. Ne fai atu a ia: “Sa fia‵fia me i agaga ma‵sei ko faka‵logo ki a koutou, kae ke na fia‵fia me ko oti ne tusi otou igoa i te lagi.”—Luka 10:20.

Ne fiafia malosi a Iesu i ei kae ne tavae atu a ia ki tena Tamana i mua o tino me ne fakaaoga ne ia ana tavini ma‵lalo i se vaegā auala ‵mana penā. Ne ‵fuli atu a ia ki ana soko, kae fai atu: “E fia‵fia a mata kolā e lavea ne latou a mea kolā e lavea ne koutou. Me e fai atu au ki a koutou, e tokouke a pelofeta mo tupu ne ma‵nako o ‵kilo ki mea ko lavea ne koutou kae e seki lavea ne latou, kae fia faka‵logo ki mea ko lagona ne koutou kae e seki lagona ne latou.”—Luka 10:23, 24.