Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 80

Te Tausi Mamoe ‵Lei mo Lulu Mamoe

Te Tausi Mamoe ‵Lei mo Lulu Mamoe

IOANE 10:1-21

  • NE FAIPATI A IESU E UIGA KI TE TAUSI MAMOE ‵LEI MO LULU MAMOE

I te taimi ne tumau ei a Iesu i te akoako atu i Iuta, ne fakasino atu nei a ia ki se mea telā ne faigofie o fakaataata ne ana tino fakalogo‵logo i olotou mafaufau—mamoe mo lulu mamoe. Kae ne faipati a ia i se auala fakatusa. Kāti ne masaua ne te kau Iutaia a pati a Tavita: “Te Aliki [Ieova] ko toku tausi mamoe; e seai se mea e mativa ei au. E tuku mai ne ia au ke takato i vao mouku lauusiusi, kae takitaki ne ia au i tafatafa o vai e tafetafe malie.” (Salamo 23:1, 2) Ne fakamalosi atu a te suā faisalamo ki te fenua: “Ke to‵tuli tatou i mua o te Aliki [Ieova], tela ne faite ne ia tatou! A ia ko te Atua o tatou; ka ko tatou ko tino e tausi ne ia, ko te lafu mamoe telā e fagai ne ia.” (Salamo 95:6, 7) Ao, ko leva loa ne fakatusa a te kau Isalaelu mai lalo i te Tulafono ki se lafu mamoe.

Ko oti eiloa ne ‵nofo atu a “mamoe” konei i te “lulu mamoe” ona ko te mea ne fa‵nau eiloa latou mai lalo i te feagaiga o te Tulafono faka-Mose. Ne fai te Tulafono pelā me se ‵pui, telā ne ‵vae keatea ei latou mai i amioga ma‵sei a tino kolā e se ‵nofo mai lalo i te fakatokaga tenei. Kae ne seki fai faka‵lei ne nisi tino Isalaelu a te lafu mamoe a te Atua. Ne fai mai a Iesu: “Au e fai tonu atu ki a koutou, a te tino telā e se ulu atu ki te lulu mamoe i te mataloa kae e kake aka i se isi koga, a te tino tenā se tino kaisoa kae ‵faomea. Kae ko te tino telā e ulu atu i te mataloa ko te tausi mamoe o te lafu mamoe.”—Ioane 10:1, 2.

Kāti ne mafau‵fau a te fenua ki tāgata kolā ne fai mai i a latou ko te Mesia, io me ko te Keliso. Ne fai a latou konei mo fai ne tino kai‵soa kae ‵faomea. Ne seki ‵tau mo tino o tau‵tali atu ki vaegā tino faka‵se tino penā. I lō te fai penā, ne tau‵tali atu latou i “te tausi mamoe o te lafu mamoe,” telā ne fai mai a Iesu e uiga ki ei, penei:

“E ‵tala ne te tino tausi mataloa a te mataloa ki te tino tenei, kae e faka‵logo a mamoe ki tena leo. E kalaga atu a ia ki ana mamoe i olotou igoa, takitaki ei ne ia a latou ki tua. Kafai ko oti ne aumai ne ia ana mamoe katoa ki tua, ko mua ei a ia i a latou, kae e tau‵tali atu a mamoe i a ia, me e iloa ne latou a tena leo. E se mafai o tau‵tali atu latou i se tino fakaa‵tea kae ka ‵tele latou keatea mai i a ia, me e se iloa ne latou a leo o tino fakaa‵tea.”—Ioane 10:3-5.

Mai mua atu i ei, ne iloa ne Ioane te Papatiso, te tino tausi mataloa, me i a Iesu ko te tino telā e tau‵tali ki ei a mamoe fakatusa konā mai lalo i te Tulafono. Ka ko oti foki ne iloa ne nisi mamoe, i Kalilaia penā foki mo Iuta, a te leo o Iesu. Ka ‘‵taki atu latou ki tua’ i fea? Kae ne a mea e iku mai i te lotou tau‵tali atu ki a ia? Kāti ne seki malama‵lama a nisi tino kolā ne lagona ne latou te tala fakatusa tenei, me “ne seki iloa ne latou a pati kolā ne fai atu ne ia ki a latou.”—Ioane 10:6.

Ne fakamatala mai a Iesu: “Au e fai tonu atu ki a koutou, au ko te mataloa o mamoe. A tino katoa kolā ne ‵mai kae fakaaoga ‵se ne latou toku igoa ne tino kai‵soa kae ‵faomea; kae ne seki faka‵logo a mamoe ki a latou. Au ko te mataloa; so se tino e ulu mai e auala i a au ka sao, kae ka ulu a ia ki loto kae fano ki tua kae ka maua ne ia a koga e uke a mouku i ei.”—Ioane 10:7-9.

E manino ‵lei, me ne fakaasi mai ne Iesu se mea fou. Ne iloa ne ana tino fakalogo‵logo me i a ia e se ko te mataloa ki te feagaiga o te Tulafono, telā ne fakagalue aka i te fia o senitenali. Tela la, kāti ne fai mai a ia me i mamoe kolā e ‘takitaki atu ki tua’ ne ia, e ‵tau o ulu atu ki te suā lulu mamoe. Ne a mea e iku mai i ei?

Ne toe fakamatala atu ne Iesu tena tulaga, ana muna: “Au ne vau ko te mea ke maua ne latou a te ola kae ke katoatoa. Au ko te tausi mamoe ‵lei; e tuku atu ne te tausi mamoe ‵lei a tena ola mō ana mamoe.” (Ioane 10:10, 11) Ko oti ne fakamafanafana atu muamua a Iesu ki ana soko, penei: “Sa ma‵taku, e taku lafu mamoe foliki, me ko oti ne talia ne te otou Tamana ke tuku atu ki a koutou a te Malo.” (Luka 12:32) A te ‵tonuga loa, a latou kolā e aofia i “te lafu mamoe foliki,” ko latou kolā ka takitaki atu ne Iesu ki loto i te lulu mamoe fou, ko te mea “ke maua ne latou te ola kae ke katoatoa” foki. Ko oko eiloa i te gali o te fakamanuiaga ke aofia tatou i te lafu tenā!

Kae ne seki fakagata atu ne Iesu a te mataupu i konā. Ne fai mai a ia: “Kae e isi aka foki ne aku nisi mamoe, kolā e se ‵tu i te lulu tenei; e ‵tau foki o aumai ne au a latou ki loto, kae ka faka‵logo latou ki toku leo, kae  ka fai latou mo lafu mamoe e tasi, mo te tausi mamoe e tokotasi.” (Ioane 10:16) A “nisi mamoe” konei e “se ‵tu i te lulu tenei.” Tela la, e ‵tau o ‵nofo atu i te suā lulu mamoe, e ‵kese mai i te lulu telā e ‵tu i ei a “te lafu mamoe foliki” kolā ka maua ne latou te Malo. E kese‵kese a fakamoemoega o te avā lulu mamoe konei. Kae koi maua eiloa ne mamoe i te avā lulu konei a mea aoga mai i te tulaga o Iesu. Ana muna: “Tenei te pogai e alofa mai ei te Tamana ki a au, me e tuku atu ne au toku ola, ko te mea ke toe maua ne au.”—Ioane 10:17.

Ne fai atu a tino e tokouke i te vaitino: “E isi se temoni i a ia kae ko masei foki tena ulu.” Kae ne fakaasi atu eiloa ne nisi tino me e fakalogo‵logo atu latou mo te fia‵fia kae fia tau‵tali atu foki ki te Tausi Mamoe ‵Lei. Ne fai atu latou: “A pati konei e se ne pati a se tagata e pukea ne temoni. E a, e mafai ne se temoni o faka‵pula a mata o tino ‵kivi?” (Ioane 10:20, 21) E manino ‵lei, me ne fakasino atu eiloa latou ki te faka‵leiga muamua ne Iesu o te tagata telā ne fanau mai kae ‵kivi.