Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 69

Te Lotou Tamana​—Apelaamo io me ko te Tiapolo?

Te Lotou Tamana​—Apelaamo io me ko te Tiapolo?

IOANE 8:37-59

  • NE TAKU NE TE KAU IUTAIA A APELAAMO E PELĀ ME KO TE TAMANA

  • A KOI TUAI O OLA MAI A APELAAMO KAE KO LEVA NE OLA A IESU

A koi ‵nofo atu i Ielusalema mō te ‵Kaiga o Faleie Tapu (io me ko, Fale Fakamalumalu), ne tumau eiloa a Iesu i te akoako atu o muna‵tonu tāua. Ne fatoa fai atu ki a ia a nisi tino Iutaia kolā ne ‵nofo atu i konā: “A matou ko fanau a Apelaamo kae ne seki ‵nofo pologa eiloa matou ki se tino.” Ne tali atu a Iesu: “E iloa ne au i a koutou ko fanau a Apelaamo. Kae ko koutou e lamalama ke tamate au, me e se talia ne koutou aku muna. E faipati ne au a mea kolā ko oti ne lavea ne au i te taimi ne fakatasi ei au mo toku Tamana, kae ko koutou e fai ne koutou a mea kolā ne lagona ne koutou mai te otou tamana.”—Ioane 8:33, 37, 38.

E faigofie fua te manatu o Iesu: E ‵kese tena Tamana mai i te lotou tamana. Ona ko te mea e se iloa ne latou a te uiga o pati a Iesu, ne fai atu faeloa ne te kau Iutaia te lotou manatu: “A te motou tamana ko Apelaamo.” (Ioane 8:39; Isaia 41:8) A latou ko ana fanau i te feitu faka-te-foitino. Tela la, ne ma‵natu aka latou me e ‵pau te lotou fakatuanaki mo te fakatuanaki o te taugasoa o te Atua, ko Apelaamo.

Kae ne tuku atu ne Iesu se tali fakapoi: “Kafai koutou ko fanau a Apelaamo, ke fai la a galuega a Apelaamo.” E tonu eiloa, me e ‵tau o soko te tama tonu ki tena tamana. “Kae nei ko lamalama koutou ke tamate au,” ne toe fai atu a Iesu, “te tagata telā ne fai atu ne ia ki a koutou a te mea tonu telā ne lagona ne au mai te Atua. Ne seki fai ne Apelaamo a te mea tenei.” Tela la, ne fai atu ei ne Iesu a pati faka‵numi: “E fai ne koutou a galuega a te otou tamana.”—Ioane 8:39-41.

Ne seki maina eiloa a te kau Iutaia me ko oi ne fakauiga ki ei a Iesu. Ne fai atu eiloa latou me i a latou ne tama ‵tonu a Apelaamo, olotou muna: “A matou e seki fa‵nau mai i amioga ma‵sei; e tokotasi te motou Tamana, ko te Atua.” Kae e mata, a te Atua ko te lotou Tamana eiloa? “Moi fai te otou Tamana ko te Atua,” ne fai atu a Iesu, “penei ko a‵lofa mai koutou ki a au, me i a au ne vau mai te Atua kae tenei au ko nofo atu i konei. Ne seki vau au i a au eiloa, kae ko te Tino tenā ne uga mai ne ia au. Kaia e se maina ei koutou i aku pati? Me e se mafai o faka‵logo koutou ki aku muna.”—Ioane 8:41-43.

Ko oti ne taumafai a Iesu o fakaasi atu a ikuga o te ‵teke atu ki a ia. Kae ne fai ‵tonu atu nei a ia: “A koutou ko fanau a te otou tamana ko te Tiapolo, kae e fai ne koutou a mea e manako ki ei te otou tamana.” A te lotou tamana se vaegā tino pefea? Ne fakaasi faka‵lei atu ne Iesu a mea e uiga ki tou tagata: “A ia se tino tatino i te kamataga, kae ne seki tumau i te munatonu.” Ne toe fai atu a Iesu: “A te tino telā e vau mai te Atua e fakalogo ki muna a te Atua. Tenei te pogai e se faka‵logo ei koutou, i a koutou ne seki ‵mai mai te Atua.”—Ioane 8:44, 47.

Ona ko pati fakamasei konā, ne ita malosi ei te kau Iutaia kae tali atu: “E a, e se ‵tonu a motou muna konei, ‘A koe se tino Samalia kae e isi se temoni i a koe’?” A te ka‵laga atu o latou ki a Iesu me se “tino Samalia,” e fakaasi atu ei te lotou sē fia‵fia ki a ia. Kae ne seki saga atu a Iesu ki olotou pati fakaitaita, i tena tali: “E seai se temoni i a au, kae e āva au ki toku Tamana, kae ko koutou e se āva mai ki a au.” Ne fakamataku eiloa te mea tenā ona ko te folafolaga fakaofoofogia a Iesu: “So se tino e fakalogo ki aku pati, ka se lavea eiloa ne ia te mate.” Ne seki fakauiga ne Iesu ana pati me i te kau apositolo mo nisi tino kolā e tau‵tali atu ki a ia ka se ‵mate tonu. I lō te fai penā, ka se iku atu latou ki te fakaseaiga se-gata-mai, tela ko “te mate fakalua,” e aunoa mo se fakamoemoega ki te toetuga.—Ioane 8:48-51; Fakaasiga 21:8.

Kae ne fakauiga tonu eiloa ne te kau Iutaia a pati a Iesu, kae fai atu: “Nei la, ko iloa eiloa ne matou me e isi se temoni i a koe. Ko mate a Apelaamo e pelā foki mo te kau pelofeta, kae e fai mai koe, ‘So se tino e fakalogo ki aku pati, ka se tami eiloa ki te mate.’ E a, e sili atu koe i te motou tamana ko Apelaamo telā ko mate? . . . Ko oi la koe?”—Ioane 8:52, 53.

E mautinoa eiloa me ne taku atu ne Iesu a te manatu me i a ia ko te Mesia. Kae i lō te tali tonu atu ki te lotou fesili me ko oi a ia, ne fai atu a ia: “Kafai e faka‵malu ne au a au eiloa, e seai se aoga o toku ‵malu. Ko toku Tamana e faka‵malu ne ia au, ko te tino telā e fai mai koutou me ko te otou Atua. E se iloa ne koutou a ia kae e iloa ne au a ia. Kafai e fai atu au me e se iloa ne au a ia, ka fai eiloa au e pelā mo koutou, se tino loi.”—Ioane 8:54, 55.

 Ne toe fakasino atu nei a Iesu ki te fakaakoakoga ‵lei a te lotou tupuga fakamaoni: “Ne fiafia malosi a Apelaamo te otou tamana ki te fakamoemoega ke kilo mai a ia ki toku aso, kae ne lavea eiloa ne ia mo te fiafia.” E tonu, ona ko te talitonu ki te folafolaga a te Atua, ne kilo atu eiloa mo te olioli a Apelaamo ki te okomaiga o te Mesia. “E seki kātoa tou 50 tausaga, kae e fai mai koe me ko oti ne lavea ne koe a Apelaamo?” ne fai atu te kau Iutaia mo te sē tali‵tonu. Ne tali atu a Iesu: “Au e fai ‵tonu atu ki a koutou, a koi tuai o fanau mai a Apelaamo, kae ko leva au ne ola.” Ne fakasino atu a ia ki tena olaga mua e pelā me se agaga malosi i te lagi, a koi tuai o ola a ia i te lalolagi.—Ioane 8:56-58.

Ne kaitaua malosi te kau Iutaia me ne fai atu a Iesu i a ia ne ola mai mua atu i a Apelaamo, fakatoka ei ke peipei ne latou a ia. Kae ne fanatu kea‵tea a Iesu e aunoa mo te pakia.