Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 73

Ne Fakamaoni Aka ne se Tino Samalia me i a Ia ko te Tuakoi Tonu

Ne Fakamaoni Aka ne se Tino Samalia me i a Ia ko te Tuakoi Tonu

LUKA 10:25-37

  • TE AUALA KE MAUA EI TE OLA SE-GATA-MAI

  • TE SAMALIA ALOFA

I te taimi koi nofo pili atu a Iesu ki Ielusalema, ne olo atu a tino Iutaia kese‵kese ki a ia. E ma‵nako a nisi tino ke tauloto mai i tou tagata kae ko nisi tino e ma‵nako o tofotofo aka a ia. E tokotasi mai i a latou, se tino poto i te Tulafono, ne fesili atu: “Te Faiakoga, se a te mea e ‵tau o fai ne au ke maua ei te ola se-gata-mai?”—Luka 10:25.

Ne iloa ne Iesu me i te tagata tenā, ne seki manako fua ki ne fakamatalaga. Kāti ne taumafai tou tagata ke tali mai a Iesu i se auala telā ka se fia‵fia ki ei te kau Iutaia. Ko oti ne iloa ne Iesu me ko oti eiloa ne fakaiku aka ne te tagata tenei tena kilokiloga. Telā ne tali atu eiloa a Iesu mo te poto i se auala telā ka fai ei ke fakaasi mai ne te tagata a mea e mafaufau a ia ki ei.

Ne fesili atu a Iesu: “Se a te mea e tusi i te Tulafono? Se a te mea ne faitau ne koe?” Ko oti eiloa ne tauloto faka‵lei ne te tagata tenei a te Tulafono a te Atua, telā ne tali atu eiloa a ia e ‵tusa mo te tulafono. Ne siki atu ne ia a pati mai i te Teutelonome 6:5 mo te Levitiko 19:18, ana muna: “‘E ‵tau mo koe o alofa ki a Ieova tou Atua mo tou loto kātoa mo tou ola kātoa mo tou malosi kātoa mo tou mafaufau kātoa’ kae alofa ki ‘tou tuakoi e pelā mo koe ki a koe eiloa.’” (Luka 10:26, 27) E a, tenā loa te tali?

Ne fai atu a Iesu ki te tagata: “E tonu tau tali. Ke na fai faeloa te mea tenā kae ka maua ei ne koe te ola.” Kae e mata, ne gata atu i konā a te sau‵talaga? Ne seki manako fua te tagata ki se tali tonu, me ne taumafai a ia “ke fakatalitonu atu i a ia e tonu,” ke fakatalitonu aka ei me e tonu eiloa tena kilokiloga kae fakamaoni foki a ia i ana faifaiga ki nisi tino. Telā ne fesili atu ei a ia: “Ko oi la toku tuakoi?” (Luka 10:28, 29) E ‵loto ‵ki eiloa a mea kolā e fakauiga ki ei a te fesili telā ne foliga mai me e faigofie fua. E pefea la?

Ne tali‵tonu te kau Iutaia me i te pati ko “te tuakoi,” e fakauiga fua ki a latou kolā e tausi a tuu a te kau Iutaia, kae e mafai foki o foliga mai me e ‵lago atu a te Levitiko 19:18 ki ei. A te ‵tonuga loa, e mafai o fai mai se tino Iutaia me “e tapu i te tulafono” ke fesokotaki atu ki tino kolā e se ne Iutaia. (Galuega 10:28) Tela la, ne kilo ifo a te tagata tenei, kae kāti mo nisi soko foki eiloa o Iesu, ki a latou eiloa e pelā me e amio‵tonu latou māfai e ‵lei olotou faifaiga ki olotou taina Iutaia. Kae kāti e ‵lei māfai e fai fakamasei ne latou se tino telā e sē se tino Iutaia; e se fai tonu a ia mo fai se “tuakoi.”

Ne mafai pefea ne Iesu o faka‵tonu aka te kilokiloga tenei e aunoa mo te fakaitaita atu ki te tagata tenei mo nisi tino Iutaia? Ne taku atu ne ia mai te faiga o se tala: “E isi se tagata ne fanaifo mai i Ielusalema ki Ieliko kae fetaui mo tino kai‵soa kolā ne tapale ne latou ana gatu kae ta, puke ana mea katoa, kae tiakina atu me ko tai mate.” Ne toe fai atu a Iesu: “Ne fanatu foki i te auala tenā se faitaulaga, kae i te laveaga ne ia tou tagata, ne fakasili a ia i te suā feitu o te auala o fano. E penā foki te tino Levi, i te okoatuga ki te koga tenā kae lavea ne ia te tagata tenā, fakasili aka foki i te suā feitu o te auala o fano. Kae ne faimalaga atu se tino Samalia i te auala kae oko atu ki te tagata tenā, kae i te laveaga ne ia, fanaka ei tena alofa ki a ia.”—Luka 10:30-33.

Ne iloa ‵lei ne te tagata telā ne faipati atu ki ei a Iesu me e tokouke a faitaulaga mo tino Levi kolā ne fesoasoani atu i te faletapu e ‵nofo i Ieliko. Ke ‵foki atu mai te faletapu, e ‵tau o faima‵laga atu latou kāti i se 14 maila te ‵mao. E mafai eiloa o fakamataku te auala tenā, i tino kai‵soa kolā e ‵nofo sāle i konā. Kafai ne maua atu ne se faitaulaga mo se tino Levi sena taina Iutaia telā e logo‵mae, e mata, e ‵tau o fesoasoani atu lāua ki a ia? I tena tala, ne fai atu a Iesu me e seki fai loa lāua penā. A te tino telā ne fesoasoani atu, se tino Samalia, se tagata mai i tino kolā e takalia‵lia sāle ki ei a tino Iutaia.—Ioane 8:48.

Ne fesoasoani atu pefea te Samalia ki te tino Iutaia telā ne pakia? Ne toe faka‵soko atu a Iesu: “Ne fanatu tou tagata kae fusi ne ia ana pa‵kiaga, kae ‵ligi atu a sinu mo uaina ki luga i ei. Oti aka, fakasopo ei ne ia te tagata tenā ki tena manu kae avatu ki se fale talimalo kae tausi atu ki a ia. I te suā aso, ne puke ne ia a tenali e lua, tuku atu ki te tausi o te fale talimalo, kae fai atu: ‘Tausi aka ne koe te tagata tenei, kae ka toe ‵togi atu ne au so se aofaki e sili atu i tupe konei māfai e toe foki mai au.’”—Luka 10:34, 35.

I te otiga o te tala, ne ‵sili atu ne te Faiakoga Pule ko  Iesu, se fesili ke mafaufau ki ei te tagata tenei: “Ko oi la i a latou tokotolu konei ne fai mo fai se tuakoi o te tagata telā ne ta ne tino kai‵soa?” Kāti ne tai faigata ki te tagata ke fai atu me ko te “tino Samalia,” telā ne fai atu penei tou tagata: “Ko te tino telā ne fai ne ia a faiga a‵lofa ki a ia.” Tenā fakaasi ‵tonu atu ei ne Iesu te uiga tonu o tena tala, mai te fakamalosi atu: “Fano la, kae fai foki ne koe te mea tenā.”—Luka 10:36, 37.

Ko se faka‵tau eiloa i te magoi o te auala tenei ke akoako atu! Moi ne taku tonu atu fua ne Iesu ki te tagata me i tino kolā e se ne tino Iutaia, ko fai foki mo fai ana tuakoi, e mata, ka talia ne te tagata mo nisi tino Iutaia kolā ne fakalogo‵logo atu a te mea tenā? Ikai loa. Kae mai te takuatuga o se tala telā e foliga mai me se tamā tala fua, kae fakaaoga a fakamatalaga kolā e masani ‵lei ki ei a tino fakalogo‵logo, ne iloa ‵lei atu eiloa te tali ki te fesili, “Ko oi la toku tuakoi?” A te tino telā ne fai mo fai se tuakoi tonu ko te tino telā ne fakaasi atu ne ia te alofa mo te atafai, telā ne fakatonu mai te Tusi Tapu ke fakaasi atu ne tatou.