Ne taumafai a Iesu i auala e uke ke fakamalosi atu ki tino ke mafau‵fau ki te lotou tulaga i mua o te Atua. I te suā taimi, ne sae aka foki mai tua o tena sau‵talaga mo tino mai i tua o te fale o te Falesaio.

Ne taku mai ne nisi tino o latou se fakalavelave lasi ne tupu. Ne fai‵pati latou e uiga ki “tino Kalilaia kolā ne palu fakatasi ne [te Kovana Loma ko Ponitio] Pilato olotou toto mo olotou taulaga.” (Luka 13:1) Se a te mea ne fakauiga latou ki ei?

Kāti a tino Kalilaia konei, ko latou kolā ne tamate i te taimi ne ‵teke atu ei te fia afe o tino Iutaia me ne fakaaoga ne Pilato a tupe mai te faletapu ke faite ei ne ia se auala loa ‵ki ke aumai ei a vai ki loto i Ielusalema. Kāti ne maua ne Pilato a tupe mai te ga‵lue fakatasi mo tino tausi o te faletapu. Kāti ne fakauiga ne tino kolā ne fai atu ne latou te tala tenā me ne logo‵mae a tino Kalilaia konā ona ko olotou amioga ma‵sei. Ne seki lotomalie ki ei a Iesu.

Ne fesili atu a ia: “I te otou faka‵tau a tino Kalilaia konā e uke atu olotou agasala i lō nisi tino Kalilaia katoa me ne ‵tupu ki a latou a mea konei?” A tena tali ko te ikai. Kae ne fakaaoga ne ia te tala tenā ke fai atu ki te kau Iutaia ke fakaeteete: “Ka fakaseai atu foki penā a koutou katoa seiloga ke sala‵mo koutou.” (Luka 13:2, 3) Ne toe fakasino atu ei a Iesu ki te suā fakalavelave telā ne tupu fakamuli kae kāti i te taimi ne faite ei te alāvai tenā, mai te fesili atu:

“Io me mafau‵fau koutou me e sili atu te uke o agasala a te toko 18 kolā ne siga ki ei te taoa i Siloama, kae ‵mate, i lō nisi tino katoa kolā ne ‵nofo i Ielusalema?” (Luka 13:4) Kāti ne mafau‵fau a te vaitino me ne ‵mate a tino konā ona ko mea ma‵sei ne fai ne latou. Ne seki lotomalie foki a Iesu ki ei. Ne iloa ne ia me i “te malaia” e oko ki tino katoa, tenā te pogai e ‵tupu i ei a vaegā fakalavelave penei. (Failauga 9:11) Ne ‵tau o tauloto ne tino se akoakoga tāua mai i te mea ne tupu. Ne fai mai a Iesu: “Ka fakaseai atu foki a koutou katoa e pelā mo latou, seiloga ke sala‵mo koutou.” (Luka 13:5) Kae kaia ko faka‵mafa atu nei ne ia a te akoakoga tenei?

Ne fakalagolago loa ki te taimi o tena taviniga, kae ne fakamatala mai ne ia i te auala tenei: “Ne ‵toki ne se tagata a te lakau ko te mati i tena togavine, fanatu ei o onoono me e isi ne fuaga i luga i ei, kae e seai ne ana mea ne maua. Tenā ne fai atu ei a ia ki te tino galue i te togavine, ‘Ko tolu nei tausaga ne vau ei au o onoono me e isi ne fuaga i luga i te mati tenei, kae e seai eiloa. ‵Kati ki lalo! Kaia e fakamāumāu ei ne ia te laukele?’ Ne tali atu ei a ia: ‘Te Matai, tuku penā i te tausaga tenei ke keli fakatamilo ne au se lua i ei kae ‵fao atu ki kaiao. Kafai e fua mai i se taimi mai mua ko ‵lei ei; kae kafai e se fua mai, ko ‵kati ei ki lalo.’”—Luka 13:6-9.

E sili atu i te tolu tausaga ne fakamāumāu ne Iesu i te taumafaiga ke fakamalosi aka te fakatuanaki o te kau Isalaelu. Kae ne nai tino ko oti ne fai mo fai ana soko kae e mafai o ‵kilo atu ki a latou e pelā me ne fuataga o ana galuega. Nei la, i te fa o tausaga o tena galuega talai, ne momea aka ana taumafaiga ki ei. Ne fai eiloa e pelā me ne keli ne ia se lua kae ne faka‵fonu ki vailakau i tafa o te mati telā ne fakauiga ki te kau Iutaia, mai te talai atu mo te loto finafinau i Iuta mo Pelea. Kae ne a mea ne iku mai i ei? Ne nai tino Iutaia fua ne talia ne latou. E pelā me se fenua, ne ita fitifiti latou  ke sala‵mo kae ko ‵tau nei o fakaseai atu latou.

Ne toe lavea faka‵lei atu a te sē fia‵fia o te tokoukega o latou i se taimi mai tua malie o te Sapati. Ne akoako atu a Iesu i te sunako. Ne matea atu ne ia a te fafine telā ne mākau i tausaga e 18, ona ko te fakalavelave atu o se temoni ki a ia. Ona ko tena alofa, ne fai atu a Iesu ki a ia: “Te fafine, ko fakasaoloto koe mai tou masaki.” (Luka 13:12) Ne tuku atu ana lima ki luga i tou fafine, kae ne mafola ‵lei ei tena foitino, telā ne kamata o ‵viki atu tou fafine ki te Atua.

Ne fai ne te mea tenā ke kaitaua malosi a te ofisa tausi o te sunako, telā ne fai atu: “E ono aso e ‵tau o fai i ei a galuega, tela la, ‵mai ke faka‵lei koutou i aso konā kae e se ko te Sapati.” (Luka 13:14) Ne seki fakafiti ne te ofisa pule tenā me e isi se malosi o Iesu ke faka‵lei a masaki; i lō te fai penā, ne taku fakamasei ne ia a tino me ne olo atu ke faka‵lei olotou masaki i te Sapati! Ne tali faka‵lei atu a Iesu i se auala manino: “A koutou ne tino ‵loi, e a, e se ‵tala ne tino taki tokotasi i a koutou a tena pulumakau io me se asini kae ‵taki atu o fainu i te Sapati? E a, e se ‵tau mo te fafine tenei, ko te tama fafine a Apelaamo, telā ne saisai ne Satani i tausaga e 18 o fakasaoloto mai te saisaiga tenei i te Sapati?”—Luka 13:15, 16.

Ne ma‵vale a tino ‵teke, kae ne fia‵fia malosi te vaitino ki mea fakaofoofogia kolā ne matea ne latou ko fai ne Iesu. Ne toe taku atu ei ne Iesu i konei i Iuta, se avā tala fakatusa fakavaloaga e uiga ki te Malo, telā ne taku atu muamua ne ia mai i te poti i te Tai o Kalilaia.—Mataio 13:31-33; Luka 13:18-21.