Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 68

“Te Mainaga o te Lalolagi”​—Te Tama a te Atua

“Te Mainaga o te Lalolagi”​—Te Tama a te Atua

IOANE 8:12-36

  • NE FAKAMATALA ATU NE IESU ME KO OI TE TAMA

  • E PEFEA A POLOGA IUTAIA?

I te ‵toe aso o te ‵Kaiga o Faleie Tapu, ko te fitu o aso, ne akoako atu a Iesu i te koga o te faletapu telā ne taku ki “te koga ‵teu tupe.” (Ioane 8:20; Luka 21:1) E foliga mai me ne tu te potu tenā i te Koga Ateatea mō Fāfine telā ne lafo atu ne tino ki ei olotou meaalofa.

I taimi o te ‵kaiga tenā i po, ne malapulapu malosi mai eiloa te koga tenei i te faletapu. Ne maua atu i ei a molī gako ‵lasi e fa, fakatasi mo tanoa ‵lasi e fa kolā ne ‵fonu i sinu. E malosi ‵ki te mainaga mai molī konei, telā ne mafai eiloa o oko atu ki koga ‵mao.. A pati kolā ne fai atu ne Iesu kāti ne fakamasaua atu i ei ki ana tino fakalogo‵logo e uiga ki te mainaga tenei: “Au ko te mainaga o te lalolagi. So se tino e tautali mai i a au ka se mafai eiloa o sasāle i te pouliga, kae ka maua ne ia te mainaga o te ola.”—Ioane 8:12.

Ne ‵teke atu te kau Falesaio ki pati a Iesu kae fai atu: “E molimau koe ki a koe eiloa; a tau molimau e se tonu.” Ne tali atu a Iesu: “Kafai foki e molimau au ki a au eiloa, e tonu loa taku molimau, me e iloa ne au te koga ne vau ei au mo te koga ka fano au ki ei. Kae e se iloa ne koutou te koga ne vau ei au mo te koga ka fano au ki ei.” Ne toe fai atu a ia: “Kae e tusi mai foki i te otou Tulafono: ‘A te molimau a tino e tokolua e tonu.’ Au ko te tino telā e molimau e uiga ki a au, kae ko te Tamana telā ne uga mai ne ia au e molimau foki ki a au.”—Ioane 8:13-18.

Ne ita fitifiti latou ke talia tena fakamatalaga, telā ne fesili atu te kau Falesaio: “Tefea tou Tamana?” Ne tali ‵tonu atu a Iesu: “E se iloa ne koutou au io me ko toku Tamana. Moi ne iloa ne koutou au, e iloa foki ne koutou toku Tamana.” (Ioane 8:19) E tiga eiloa koi ma‵nako te kau Falesaio ke puke fakapagota ne latou a Iesu, kae e seai eiloa se tino ne puke atu ki a ia.

Ne fai atu ne Iesu se pati telā ko oti ne fai atu muamua ne ia: “Au ka fano keatea, ka salasala koutou ki a au, kae ka ‵mate koutou i otou agasala. Ko te koga e fano au ki ei e se mafai ne koutou o ‵mai  ki ei.” Ne ‵numi valevale te kau Iutaia i te mea ne fakauiga ki ei a Iesu, telā ne kamata ei latou o mafau‵fau penei: “E a, ka tamate ne ia a ia eiloa? Me e fai mai a ia, ‘Ko te koga e fano au ki ei e se mafai ne koutou o ‵mai ki ei.’” Ne seki malama‵lama latou i te mea ne fakauiga ki ei a Iesu me e se iloa ne latou a te kamataga o Iesu. Ne fakamatala atu tou tagata: “A koutou ne tino i lalo nei; au se tino mai i luga. A koutou ne tino o te lalolagi nei; kae ko au e sē se tino mai te lalolagi nei.”—Ioane 8:21-23.

Ne fakauiga a Iesu ki tena olaga i te lagi a koi tuai o liu tagata a ia, e penā foki loa mo tena fai mo fai te Mesia, io me ko te Keliso, telā ne ‵tau o ‵nofo fakatali‵tali ki ei a takitaki lotu konei. E tiga eiloa te feitu tenā, ne fesili atu latou mo te fakatauemu lasi: “Ko oi la koe?”—Ioane 8:25.

Ne tali atu penei a Iesu ki olotou pati ‵teke: “Kaia e faipati atu ei au ki a koutou?” Ne tumau eiloa tou tagata i te fakasino atu ki tena Tamana kae fakamatala atu te pogai e ‵tau ei o faka‵logo a te kau Iutaia ki te Tama: “Se mea tonu me i te Tino telā ne uga mai ne ia au e tonu, kae ko mea eiloa kolā ne lagona ne au mai i a ia e faipati ne au i te lalolagi.”—Ioane 8:25, 26.

Ne fakaasi atu ne Iesu te loto talitonu ki tena Tamana, telā ne galo i te kau Iutaia konei: “Kafai ko oti ne sisi aka ne koutou te Tama a te tagata, ko iloa ei ne koutou i a au ko ia kae seai se mea e fai ne au i toku loto eiloa, kae ko mea fua kolā e akoako mai ne te Tamana ki a au e faipati ne au. Kae ko te Tino telā ne uga mai ne ia au e fakatasi mai ki a au; e seki tuku tiaki ne ia au, me fai faeloa ne au a mea kolā e fiafia a ia ki ei.”—Ioane 8:28, 29.

Ne fakatuanaki a nisi tino Iutaia ki a Iesu, kae ne fai atu a ia ki a latou: “Kafai e tumau koutou i aku muna, ko oku soko ‵tonu koutou, kae ka iloa ne koutou te munatonu, kae ko te munatonu ka fakasaoloto ne ia koutou.”—Ioane 8:31, 32.

Ne logosala ki nisi tino a pati konei. Ne ‵teke atu latou: “A matou ko fanau a Apelaamo kae ne seki ‵nofo pologa eiloa matou ki se tino. E mafai la pefea o fai mai koe, ‘Ka fakasaoloto koutou’?” Ne iloa ne te kau Iutaia me ne ‵nofo latou i pulega a tino fakaa‵tea i nisi taimi kae ne ita latou ma taku pelā me ne pologa. Kae ne fai atu a Iesu me i a latou koi fai eiloa mo pologa: “Au e fai ‵tonu atu ki a koutou, so se tino e fai ne ia te agasala ko te pologa eiloa a te agasala.”—Ioane 8:33, 34.

Ne oko atu te kau Iutaia ki se tulaga fakamataku ona ko te ita o latou ma taku pelā me ne pologa ki te agasala. “A te pologa e se tumau i loto i te kaufale ki te se-gata-mai,” ko te fakamatalaga a Iesu. “Kae ko te tama e tumau ki te se-gata-mai.” (Ioane 8:35) E mafai o fakatea te pologa i so se taimi, kae e se mafai foki o isi sena tofi ki se mea. Ko te tama tagata fua telā ne fanau mai io me ne puke mai ki loto i te kāiga ka tumau eiloa i te fale ki “te se gata mai,” ko tena uiga, i tena olaga kātoa.

Tela la, a te munatonu e uiga ki te Tama ko te munatonu telā e fakasaoloto ki ei ki te se gata mai a tino mai te agasala telā e iku atu ki te mate. “Kafai e fakasaoloto koutou ne te Tama, ka saoloto tonu eiloa koutou,” ko te folafolaga a Iesu.—Ioane 8:36.