Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 75

Ne Fakaasi Mai ne Iesu te Pogai o te Fiafia

Ne Fakaasi Mai ne Iesu te Pogai o te Fiafia

LUKA 11:14-36

  • TE ‵TULIGA O TEMONI E AUALA I TE “LIMA O TE ATUA”

  • POGAI O TE FIAFIA TONU

Ne fatoa taku atu ne Iesu ana fakatonuga e uiga ki te faiga o ‵talo, kae e se tenā fua te mataupu ne sae sāle aka i taimi e uke i te faiga o tena galuega. I te taimi ne fai ei ne ia a vavega i Kalilaia, ne fakafesagai atu a Iesu ki ‵losiga ‵se me ne fai ne ia a mea konā e auala i te ‵mana o te pule o temoni. Ko nofo atu nei a ia i Iuta kae ko toe sae aka foki a te ‵losiga tenei.

I te taimi ne ‵tuli ei ne Iesu a te temoni mai i se tagata telā ne fai ne ia ke gūgū, ne ōfo masei a te vaitino. Kae e se ko tino kolā ne ‵teke atu ki a ia. Ne avaka ne latou a te ‵losiga ‵se telā ne fakasae muamua mai ne latou: “E afuli keatea ne ia a temoni e auala i a Pelesepulo, te pule o temoni,” ko te lotou fakamatalaga. (Luka 11:15) Ne ‵sala atu a nisi tino ki fakamaoniga e uke atu e uiga ki a Iesu, mai te fakamolemole atu mō se fakailoga mai te lagi.

Ne iloa ne Iesu me ko taumafai latou ke tofotofo aka a ia, telā ne tali atu a ia e pelā mo tena tali ki tino ‵teke kolā ne fakafesagai atu a ia ki ei i Kalilaia. Ne fai atu a ia me i so se malo telā e nofo mavaevae i a ia eiloa ka maofa, ana muna: “Kafai e mavaevae foki a Satani i a ia eiloa, e mafai la pefea o tu tena malo?” Ne fai ‵tonu atu a Iesu ki a latou: “Kae kafai e afuli ne au a temoni e auala i te lima o te Atua, ko tena uiga ko oti ne oko mai te Malo o te Atua ki a koutou.”—Luka 11:18-20.

A te ‵takuatuga ne Iesu o te “lima o te Atua” ne ‵tau o fakamasaua atu ki ana tino fakalogo‵logo a mea ne ‵tupu i tala mua. Ne ōfo a tino kolā ne lavea ne latou a te faiga ne Mose se vavega telā ne fai mai: “Te mea tenei ne fai ne te Atua [ki te lima o te Atua]!” A “papa fatu e lua kolā e ‵tu a tulafono ne tusi eiloa ne te Atua [ki tena lima]” tela la, ne tusi eiloa ne ia a Tulafono e Sefulu i papa fatu e lua. (Esoto 8:19; 31:18) E penā foki loa, ko “te lima o te Atua”—tena agaga tapu, io me ko tena malosi galue—telā ne fai ei ke mafai ne Iesu o afuli kea‵tea a temoni kae faka‵lei aka foki a tino ma‵saki. Tela la, ne oko tonu atu te Malo o te Atua ki tino ‵teke konā, me i te tino telā ne filifili aka ke fai fakamuli mo fai te Tupu o te Malo, ko Iesu, ne nofo tonu atu i konā kae fai ne ia a galuega ‵mana konei.

A te mafai ne Iesu o afuli a temoni se fakamaoniga me e sili atu tena ‵mana i a Satani, e pelā mo se tagata mafi e fanatu o fakatakavale ne ia te tagata mafi kae katoatoa ana meatau katoa telā e leoleo ne ia tena palesi. Ne toe taku atu foki ne Iesu tena tala fakatusa e uiga ki te agaga sē ‵ma telā ne tiakina ne ia se tagata. Kafai e se fakaaoga ne te tagata te avanoaga tenā ki mea ‵lei, ka toe ‵foki atu te agaga tenā fakatasi mo nisi agaga e tokofitu, telā ko sili atu te masei o te tulaga o te tagata tenā i lō tena tulaga muamua. (Mataio 12:22, 25-29, 43-45) Tenā eiloa te tulaga o te fenua o Isalaelu.

Ne fakaosofia se fafine telā ne fakalogologo ki a Iesu ke kalaga atu: “E fiafia te moegatama telā ne tauave ne ia koe mo ū kolā ne fau ei koe!” Ne fakamoe‵moe eiloa a fāfine Iutaia ke fai latou mo fai te mātua o se pelofeta, maise ko te Mesia. Tela la, kāti ne mafaufau te fafine tenei me e mafai eiloa o lasi atu te fiafia o Malia me i a ia ko te mātua o se vaegā faiakoga penā. Kae ne faka‵tonu aka ne Iesu te fafine e uiga ki te pogai tonu o te fiafia: “Ikai, e se penā, kae e fia‵fia a latou kolā e lagona ne latou te muna a te Atua kae tausi ki ei!” (Luka 11:27, 28) Ne seki fai lele atu eiloa a Iesu me e ‵tau o fakaaloalo atu ki tena mātua i se auala fakapito. I lō te fai penā, e maua eiloa ne se tagata io me se fafine a te fiafia tonu mai te faiga mo fai se tavini fakamaoni a te Atua, kae e se auala i so se fesokotakiga io me ko galuega aoga i te feitu faka-te-foitino.

E pelā eiloa mo te mea ne fai ne Iesu i Kalilaia, ne ‵liko ne ia a tino kolā ne ma‵nako ki se fakailoga mai te lagi. Ne fai atu a ia me ka se tuku atu ne ia ki a latou se fakailoga kae na ko “te fakailoga o Iona.” Ne fai a Iona mo fai se fakailoga i tena nofoga i aso e tolu i te tinae o te ika, penā foki loa mo tena talaiga mo te loto toa, telā ne fakaosofia ei te kau Nineva ke sala‵mō. Muna a Iesu: “Kae kiloke! e isi se tino i konei e sili atu i a Iona.” (Luka 11:29-32) E sili atu foki a Iesu i a Solomona, telā ne fanatu a te tupu fafine mai Seepa o fakalogologo ki ei.

Ne toe fai atu a Iesu: “Kafai e oti ne faka‵ka ne se tino se moli, e se tuku ne ia i se koga sē lavea io me mai lalo i se kete, kae e tuku atu ki luga i te tugamoli,  ko te mea ke lavea ne tino kolā e ulu mai ki loto a te mainaga.” (Luka 11:33) Kāti ne fakauiga a ia me i tena akoako atu mo te faiga o vavega i mua o tino konei, e fai eiloa pelā me e ‵funa aka te mainaga o se molī. Ona ko te mea e se ‵saga tonu atu olotou mata, e galo i a latou a te pogai tāua o ana galuega.

Ne fatoa ‵tuli kea‵tea ne Iesu se temoni kae ne fai foki ne ia ke faipati se tagata gūgū. Ne ‵tau o fakamalosi aka ne te mea tenā a tino, ke tavae atu ki te Atua kae fai atu ki nisi tino a mea ne fai ne Ieova. Tela la, ne fakailoa atu penei a Iesu ki ana tino ‵teke ke fakaeteete: “Ke matapulapula koe, ko te mea ke se pouli a te mainaga telā i loto i a koe. Kafai e maina tou foitino kātoa kae e seai se vaega i ei e pouli, ka maina atu eiloa e pelā me se moli telā e maina atu ki a koe.”—Luka 11:35, 36.