Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 66

Ne Olo Atu ki Ielusalema mō te ‵Kaiga o Faleie Tapu

Ne Olo Atu ki Ielusalema mō te ‵Kaiga o Faleie Tapu

IOANE 7:11-32

  • NE AKOAKO ATU A IESU I TE FALETAPU

Ne gasolo o lauiloa a Iesu i tausaga talu mai tena papatisoga. Ko oti ne matea ne te fia afe o tino Iutaia ana vavega, kae ko salalau atu foki a tala e uiga ki ana galuega i te fenua kātoa. Kae i te ‵Kaiga o Faleie Tapu (io me ko, Fale Fakamalumalu) i Ielusalema, ne ‵sala atu a tino e tokouke ki a ia i konā.

Ne kese‵kese a kilokiloga a tino e uiga ki a Iesu. Muna a nisi tino, “A ia se tagata ‵lei.” Ne fai mai a nisi tino: “Ikai, e takitaki ‵se ne ia a te vaitino.” (Ioane 7:12) A te lasiga o pati musu‵musu konei ne fai i te kamataga o te ‵kaiga. Kae e seai eiloa se tino ne loto toa ke tu atu mō Iesu i mua o nisi tino, ona ko te ma‵taku i kilokiloga a takitaki Iutaia.

I te ‵sekega o nai aso o te ‵kaiga, ne fanatu ei a Iesu ki te faletapu. Ne ofo a tino e tokouke i tena poto i te akoako atu. Ne seki fanatu a Iesu ki se akoga fakafaifeau, telā ne fesili ifo ei te kau Iutaia: “Ne poto pefea a te tagata tenei i Tusitusiga konei, me ne seki akoga a ia i se akoga?”—Ioane 7:15.

“A mea kolā e akoako atu ne au e se i a aku,” ne fakamatala atu ne Iesu, “kae i a te tino telā ne uga mai ne ia au. Kafai e manako se tino ke fai ne ia te loto o te Atua, ka iloa ei ne ia me i akoakoga konei e aumai mai te Atua io me e fai atu fua ne au i aku pati eiloa.” (Ioane 7:16, 17) E fetaui ‵lei eiloa a akoakoga a Iesu mo te Tulafono a te Atua, tela la, e mautinoa ‵lei me ne taumafai a Iesu o faka‵malu te Atua, kae e se ko ia eiloa.

Ne fai atu ei a Iesu: “E a, e seki tuku atu ne Mose ki a koutou te Tulafono? Kae e seai se tino i a koutou e fakalogo ki te Tulafono. Kaia la e lamalama ei koutou o tamate au?” A nisi tino i te vaitino, kāti ne tino mai tua o te fa‵kai kolā ne āsi atu, ne seki iloa ne latou a vaegā taumafaiga penā. E foliga atu ki a latou me e seai se tino e fia tamate ki se faiakoga e pelā mo ia. Tela la, ne fakaiku aka ne latou me kāti e masei te ulu o Iesu ona ko ana pati konā. “E isi se temoni i a koe,” ko olotou muna. “Ko oi e lamalama o tamate koe?”—Ioane 7:19, 20.

A te ‵tonuga loa, i te tasi mo te āfa tausaga mai mua atu i ei, ne fia tamate a takitaki Iutaia ki a Iesu mai tua o te faka‵leiga ne ia o se tagata i te Sapati. Ko fakaaoga nei ne Iesu a fakamatalaga ke mafau‵fau latou ki ei, telā e fakaasi faka‵sau atu ei te ‵se o olotou manatu. Ne fakasino atu a ia ki te manatu tonu me mai lalo i te Tulafono, e ‵tau o pilitome se pepe tagata i te valu o aso, faitalia me ko te Sapati tenā. Ne fesili atu ei a ia: “Kafai e pilitome se tagata i te sapati ko te mea ke se soli i ei te tulafono a Mose, e a, e kaitaua malosi koutou ki a au me ne faka‵lei katoatoa ne au se tino i te sapati? Sa fakamasino ne koutou a mea i olotou foliga i tua, kae fai ke tonu te otou fakamasinoga.”—Ioane 7:23, 24.

Ne fai mai a tino Ielusalema, kolā ne iloa ‵lei ne latou a mea kolā ne ‵tupu: “E a, e se tenei te tagata e lamalama ne latou ke tamate? Kae kiloke! tenā eiloa e faipati mai a ia ki tino e tokouke, kae e seai ne olotou pati e fai atu ki a ia. E a, e seki fakamautinoa aka eiloa ne tino pule me tenei te Keliso?” Kae kaia ne seki tali‵tonu ei latou i a Iesu ko te Keliso? “E iloa ne matou te koga ne vau ei te tagata tenei; kae kafai e vau te Keliso e seai eiloa se tino e ‵tau o iloa ne ia me ne vau a ia mai fea,” ko olotou pati.—Ioane 7:25-27.

Ne tali atu eiloa a Iesu i konā i te faletapu: “E iloa ne koutou au kae e iloa foki ne koutou te koga ne vau ei au. Kae ko au ne seki vau i a au eiloa, a te Tino ne uga mai ne ia au se tino tonu eiloa, kae e se iloa ne koutou a ia. E iloa ne au a ia, me i a au ko tena sui, kae ko te Tino tenā ne uga mai ne ia au.” (Ioane 7:28, 29) A te tali ki fakamatalaga manino ‵lei konā, ne fai ei se taumafaiga ke puke a Iesu, kāti ke ‵pei a ia ki te falepuipui io me ke tamate a ia. Kae ne seki iku manuia te taumafaiga tenā me e se tenei te taimi ne ‵tau ei o mate a Iesu.

E tokouke a tino ne fakatuanaki ki a Iesu, kae ne ‵tau eiloa o fai latou penā. Ko oti ne sasale a ia i luga i te vai, ne fakafilemu ne ia a matagi, fagai fakavavega te fia afe o tino ki nai falaoa mo ika,  faka‵lei a tino ma‵saki, fai a tino ‵pili ke sa‵sale, a tino ‵kivi ke ‵kite olotou mata ke toe ‵lei a tino lepela, kae toe faka‵tu aka a tino ‵mate. Ao, tela la, ne maua eiloa ne latou se pogai ‵lei ke fesili atu: “Kafai e vau te Keliso, e a, ka uke atu ana galuega ‵mana e fai i lō te tagata tenei?”—Ioane 7:31.

I te taimi ne ‵logo ei te kau Falesaio i tino ko fai‵pati ki mea konā, ne uga atu ei ne latou fakatasi mo te kau faitaulaga sili a ofisa ke puke fakapagota ne latou a Iesu.