Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 78

Ke Toka Faeloa, te Situati Fakamaoni

Ke Toka Faeloa, te Situati Fakamaoni

LUKA 12:35-59

  • E ‵TAU O TOKA FAELOA TE SITUATI FAKAMAONI

  • NE VAU IESU O FAKAMAVAE‵VAE A TINO

Ko oti ne fakamatala atu ne Iesu me ka maua fua ne se “lafu mamoe foliki” a te Malo i te lagi. (Luka 12:32) Kae ko te mauaga o te taui fakaofoofogia tenā e sē se mea e ‵tau o manatu māmā ki ei. A te ‵tonuga loa, ne toe faka‵mafa atu ne ia a te tāua ke maua ne se tino a te kilokiloga tonu māfai ko fai a ia mo fai se vaega o te Malo.

E ‵tusa mo te manatu tenā, ne fakamalosi atu a Iesu ki ana soko ke toka faeloa latou ki tena toe foki mai. Ana muna: “‵Pei otou gatu kae ke toka koutou kae ke ‵ka otou moli, kae ke fai koutou e pelā mo tino e fakatali‵tali ki te foki mai o te lotou matai mai i te fakaipoipoga me kafai ko oko mai kae tukituki mai e ‵tala fakavave atu ne latou te mataloa ki a ia. Ka fia‵fia eiloa a tavini konā māfai e maua atu latou ne te lotou matai e ala faeloa i te taimi e vau ei a ia!”—Luka 12:35-37.

Ne faigofie ki soko ke maina i te kilokiloga telā ne fakamatala atu ne Iesu. A tavini kolā ne taku atu ne ia ko toka, kae ne faka‵tali mō te foki mai o te lotou matai. Ne fakamatala atu a Iesu: “Ka fia‵fia eiloa latou māfai e vau a ia [te matai] i te lua o ‵tuga [mai i te iva ki te valuapo], io me ko te tolu o ‵tuga [mai te valuapo ki te tolu i te taeao], kae maua atu ne ia a latou e toka.”—Luka 12:38.

E uke atu a mea e manakogina i lō pati fakatonutonu e uiga ki te fai mo fai ne tavini, io me ne tino ga‵lue malosi. E lavea faka‵lei atu te mea tenā i te auala ne fakaaoga ei ne Iesu, te Tama a te tagata, a ia eiloa i te tala fakatusa. Ne fai atu a ia ki ana soko: “E ‵tau foki mo koutou o toka faeloa, me i te Tama a te tagata e vau i te itula telā ne seki mafau‵fau koutou ki ei.” (Luka 12:40) Tela la, i se aso mai mua, ka vau a Iesu. E manako a ia ko tino kolā e tau‵tali atu i a ia—maise eiloa a latou kolā e aofia i “te lafu mamoe foliki”—ke toka.

Ne fia maina a Petelu i te mea telā ne fakauiga tonu ki ei a Iesu, telā ne fesili atu ei a ia: “Te Aliki, a tau tala fakatusa tenā e fai mai fua ki a matou io me e fai atu foki ki tino katoa?” I lō te tali ‵tonu atu ki a Petelu, ne taku atu ne Iesu se tala fakatusa tai ‵pau: “Ko oi eiloa te situati fakamaoni, ko te tino poto telā ka fakasopo ne tena Matai ke pule i luga i tena kau tavini ke tuku atu faeloa ne ia ki a latou olotou meakai i te taimi tonu? Ka fiafia eiloa te tavini tenā māfai e vau tena matai kae e maua atu me e fai eiloa ne ia te mea tenā. Au e fai tonu atu ki a koutou, ka fakasopo eiloa ne ia a te tavini tenā ke pule i ana mea katoa.”—Luka 12:41-44.

I te tala fakatusa mai mua atu, e mautinoa eiloa me i a Iesu, te Tama a te tagata, ko “te matai.” Kae e ‵tau eiloa o aofia i “te situati fakamaoni” a tāgata kolā e fai mo fai ne vaega o “te lafu mamoe foliki” kae ka maua ne latou te Malo. (Luka 12:32) Ne fai mai ne Iesu i konei me ka isi ne tino o te potukau tenei ka tuku atu ne latou ki “tena kau tavini” a mea e tausi ei latou, “olotou meakai i te taimi tonu.” Tela la, ne mafai o fakaiku aka ne Petelu mo nisi soko kolā ne akoako kae fagai ne Iesu i te feitu faka-te-agaga, me ka isi foki se vaitaimi penā i te taimi telā ka vau ei te Tama a te tagata. Kae i te vaitaimi tenā, ka isi se fakatokaga mō te fagaiga i te feitu faka-te-agaga o soko o Iesu, ko te “kau tavini” a te Matai.

Ne faka‵mafa mai ne Iesu i te suā auala a te pogai e ‵tau ei o matapula‵pula ana soko kae ke iloilo aka faeloa olotou kilokiloga. Ne fai atu a ia penā ona ko te mea e mafai ne ana soko o gasolo o paie kae ke oko foki eiloa ki te ‵teke atu ki olotou taina: “Kae kafai e fai aka te tavini tenā i tena loto, ‘Ko tuai mai toku matai,’ kae kamata o ‵ta ne ia a tavini tāgata mo tavini fāfine; kae kai, kae inu kae konā, ka vau eiloa te matai o te tavini tenā i se aso telā e seki fakamoemoe a ia ki ei mo te itula telā e se iloa ne ia, kae ka fakasala ne ia te tavini tenā ki te ‵toe sala ‵mafa kae tuku atu foki tena vaega fakatasi mo tino sē fakamaoni.”—Luka 12:45, 46.

Ne fai mai a Iesu me ne vau a ia o “faka‵ka te afi i te lalolagi.” Kae ko oti eiloa ne fai ne ia, mai i te avakaga o mataupu kolā e māfua mai i ei a kinauga ‵lasi kae e iku atu ei ki te fakaseaiga o akoakoga mo  tuu ‵se. E fai ne te mea tenei ke mavae‵vae a tino kolā e fakamoe‵moe ke fealofani, “ko te tamana mo tena tama tagata kae ko te tama tagata mo tena tamana, te mātua mo tena tama fafine kae ko te tama fafine mo tena mātua, te mātua mo te avaga a tena tama tagata kae ko te avaga a tena tama tagata mo te mātua o tena avaga.”—Luka 12:49, 53.

Ne fakasino atu a pati konei, maise eiloa ki ana soko. Oti aka, ne toe mafuli atu a Iesu ki te vaitino. Ne ‵teke atu eiloa mo te loto ‵fika a te tokoukega o tino ke talia a te fakamaoniga me i a ia ko te Mesia, telā ne fai atu ei a ia ki a latou: “Kafai e lavea ne koutou se kaumana e fanaka i te feitu ki te togala, se mea vave eiloa o fai mai koutou, ‘Ka poko te kaumatagi,’ kae e fai eiloa penā. Kae kafai e lavea ne koutou me e agi mai te matagi i saute, e fai mai koutou, ‘Ka ‵vela te aso,’ kae ka taunu eiloa. A koutou ne tino ‵loi, e iloa ne koutou o fakamatala a foliga o te lalolagi mo te lagi, kae kaia e se iloa ei ne koutou te uiga o mea kolā ko ‵tupu i te taimi fakapito tenei?” (Luka 12:54-56) E manino ‵lei, me ne seki toka eiloa latou.