Koi nofo eiloa a Iesu i Ielusalema i te Sapati. I te taimi ne sa‵sale atu a ia mo ana soko i te fa‵kai, ne matea atu ne latou se tagata akai mea telā ne ‵kivi talu tena fanaumaiga. Ne fesili atu a soko ki a Iesu: “Te Faiakoga, ko oi ne agasala, ko te tagata tenei io me ko ana mātua, ko ala ei o fanau mai a ia e ‵kivi?”—Ioane 9:2.

Ne iloa ne te kau soko, me e seai se agaga sē matea o te tagata a koi tuai o fanau mai a ia, kae e fia iloa ne latou me e mafai o agasala se tino a koi nofo atu i te moegātama o tena mātua. Ne tali atu a Iesu: “E se ko te tagata tenei io me ko ana mātua, kae ne fai penei ko te mea ke fakaasi atu a galuega a te Atua e auala i a ia.” (Ioane 9:3) Ne seki māfua mai a te ‵kivi o te tagata tenei ona ko te mea ‵se io me se agasala ne fai ne ia io me ko ana mātua. I lō te fai penā, ona ko te agasala a Atamu, ne fa‵nau mai ei a tino katoa mo te tulaga sē ‵lei katoatoa, kae e maua ei ne latou a tulaga vāi‵vai, e pelā mo te ‵kivi. Kae ne tuku mai ne te ‵kivi o te tagata tenei se avanoaga mō Iesu ke fakaasi atu ne ia a galuega a te Atua, e pelā mo mea ne fai ne ia i nisi taimi i te faka‵leiga o ma‵saki o tino.

Ne faka‵mafa ne Iesu a te tāua ke fai fakavave a galuega konei. “E ‵tau o fai ne tatou a galuega a te Tino telā ne uga mai ne ia au a koi ao,” ko ana muna. “Me kafai ko oko mai te po e seai se tino e mafai o galue. Au ko te mainaga o te lalolagi, i te taimi e nofo ei au i te lalolagi.” (Ioane 9:4, 5) Ao, e se leva kae ka fakaoko atu a Iesu ne tena mate ki te pouliga i te tānuga telā ko se mafai ei ne ia o fai se mea. A koi tuai o fai penā, e fai a ia mo fai se mainaga ki te lalolagi.

E mata, ka faka‵lei eiloa ne Iesu te tagata, kae kafai e penā loa, ka fai pefea ne ia? Ne puaki atu a Iesu ki te laukele, kae ne palu ne ia ke ‵poto. Ne nini ne ia a nai mea ki mata o te tino ‵kivi kae fai atu: “Fano o mulumulu i te vai o Siloama.” (Ioane 9:7) Ne fakalogo eiloa tou tagata. I te otiga, ne toe ‵kite ei ana mata! Mafaufau la ki te lasi o tena fiafia i te taimi ne fatoa mafai ei o ‵kite ana mata!

Ne ōfo masei ana tuakoi mo nisi tino kolā ne iloa ne latou me i a ia ne ‵kivi. “E se ko ia tenei ne sagasaga sāle kae akai mea?” ne fesili mai latou. “Ko ia eiloa tenei,” ne tali mai a nisi tino. Kae e se tali‵tonu a nisi tino ki ei kae fai atu: “Ikai, kae e pelā loa mo ia.” Kae ne fai atu eiloa te tagata tenā: “Ko au eiloa te tino tenā.”—Ioane 9:8, 9.

Tela la, ne fesili atu latou ki a ia: “Ne ‵kite la pefea ou mata?” Ne tali atu a ia: “A te tagata telā e igoa ki a Iesu ne palu ne ia a te pela kae nini ki oku mata kae fai mai ki a au, ‘Fano ki Siloama o mulumulu i ei.’ Ne fano au o mulumulu, ‵kite ei oku mata.” Ne fesili atu latou: “Tefea te tagata tenā?” Ne tali atu te tagata akai mea: “E se iloa ne au.”—Ioane 9:10-12.

Ne ‵taki atu ne tino a te tagata tenā ki te kau Falesaio, kolā ne fia iloa foki ne latou me ne toe ‵kite pefea ana mata. Ne fai atu a ia ki a latou: “Ne tuku ne ia a pela ki oku mata, mulumulu ne au, ‵kite ei oku mata.” Ne ‵tau o fia‵fia te kau Falesaio fakatasi mo te tino akai mea telā ko ‵lei tena masaki. I lō te fai penā, ne taku fakamasei ne nisi o latou a Iesu. “A ia tenei e sē se tagata mai te Atua,” ko olotou muna, “me e se  tausi ne ia te Sapati.” Kae e fai mai a nisi tino: “E mafai pefea o fai ne se tagata agasala a vaegā galuega ‵mana penā?” (Ioane 9:15, 16) Telā, ne kese‵kese ei olotou manatu.

Ona ko te kese‵kese o kilokiloga konei, ne ‵saga atu latou ki te tagata telā ko ‵kite nei kae fesili atu: “Se a tau faka‵tau e uiga ki te tagata telā ne faka‵pula ne ia ou mata?” Ne talitonu katoatoa a ia ki a Iesu kae fai atu: “A ia se pelofeta.”—Ioane 9:17.

Ne ita te kau Iutaia ma tali‵tonu ki te mea tenei. E mafai o mafau‵fau latou me e isi ne togafiti ne fai i te va o Iesu mo te tagata tenei ko te mea ke fakaloiloi ei a tino. Ne fakaiku aka ei ne latou me i te auala e tasi ke faka‵lei aka ei te mea tenei, ko te fesili atu ki mātua o te tino akai mea tenā, me e tonu eiloa ne fanau mai a ia kae ‵kivi.