Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 74

Akoakoga e Uiga ki te Talimalo mo te ‵Talo

Akoakoga e Uiga ki te Talimalo mo te ‵Talo

LUKA 10:38–11:13

  • NE ĀSI ATU A IESU KI A MALETA MO MALIA

  • E TĀUA TE TUMAU I TE ‵TALO ATU

I te feitu ki saegala o te Mauga o Olive, kāti se lua maila te ‵mao mai Ielusalema, e tu i ei a te fa‵kai ko Petania. (Ioane 11:18) Ne fanatu a Iesu ki ei kae ulu atu ki loto i te fale o se tautaina fa‵fine e tokolua, ko Maleta mo Malia. A lāua mo te lā tuagane ko Lasalo, ko taugasoa o Iesu, kae ne talimalo faka‵lei eiloa ne latou a tou tagata mo te atafai.

Ne taulia malosi eiloa latou ke fai a te Mesia mo fai se mālō i te lotou fale. Ne fiafia malosi a Maleta ke fakatoka faka‵lei a mea katoa mō Iesu, telā ne toka tou fafine ke ‵kuka ne mea‵kai gali ‵ki. I te taimi ne galue malosi ei a Maleta, kae ko tena taina ko Malia, ne sagasaga i mua o Iesu kae fakalogologo ki a ia. Ne seki leva, kae ne fai atu a Maleta ki a Iesu: “Te Aliki, e a, e ‵lei ki a koe ke tiaki mai au ne toku taina ke fai katoa ne au a mea konei? Fai atu la ki ei ke vau o fesoasoani mai ki a au.”—Luka 10:40.

I lō te fakamasei atu ki a Malia, ne fakatonutonu atu eiloa a Iesu ki a Maleta ona ko tena sōna manavase malosi ki mea faka-te-foitino: “Maleta, Maleta, a koe e manavase kae fakalavelave faeloa i mea e uke. Kae ne nai mea fua io me e tasi fua te mea e manakogina ke fai. Ne filifili ne Malia te vaega ‵lei, kae ka se mafai o ave keatea mai i a ia.” (Luka 10:41, 42) E tonu, ne fai atu a Iesu me e se ‵tau o fakamāumāu a taimi e uke i te fakatokaga o vaegā mea‵kai kese‵kese mō te ‵kaiga tenā. Ko lava fua i mū meakai.

Ne ‵lei eiloa te loto o Maleta. Ne manako tou fafine o talimalo faka‵lei atu. Kae ona ko tena manavase malosi ki mea‵kai, ko se maua ei ne ia a akoakoga tāua mai i te Tama eiloa a te Atua! Ne faka‵mafa atu ei ne Iesu a te manatu me i a Malia ne fai ne ia se filifiliga poto, se mea telā ka tumau te aoga ki a ia, e pelā foki loa me se akoakoga ke masaua ne tatou katoa.

I te suā taimi, ne tuku atu ne Iesu se akoakoga tai ‵kese kae e ‵pau eiloa tena tāua. Ne fakamolemole atu se soko ki a ia: “Te Aliki, akoako mai ki a matou te faiga o te ‵talo, e pelā eiloa mo te akoakoga ne Ioane o ana soko.” (Luka 11:1) Ko oti eiloa ne akoako atu ne Iesu a te mea tenā i se tasi mo te āfa tausaga mai mua atu i ei, i tena Lāuga i luga i te Mauga. (Mataio 6:9-13) Kāti ne galo te soko tenei i te taimi tenā, telā ne toe taku atu ne Iesu a manatu tāua. Oti aka, ne fai atu ne ia a te suā tala fakatusa telā e faka‵mafa mai i ei te tāua ke ‵talo atu faeloa.

“Kāti e isi se tino i a koutou e isi sena taugasoa kae e fanatu koe ki a ia i te valuapo kae fai atu ki ei, ‘Taugasoa, ke kaitalafu aka ne au ne falaoa e tolu, me isi soku taugasoa ne fatoa oko mai i se malaga ‵mao kae e seai ne aku mea ke tuku atu ki a ia.’ Kae ne tali atu te tino i loto i te fale, ‘Sa fakalavelave mai ki a au. Ko oti ne ‵loka te mataloa, kae ko ‵moe matou mo aku tama‵liki. E se mafai ne au o tu ki luga o tuku atu ki a koe se mea.’ Au e fai atu ki a koutou, e tiga eiloa e se tu a ia ki luga o tuku atu se mea ki a ia ona ko lāua e taugasoa, kae ona ko tena loto toa o kinau atu faeloa ka tu eiloa a te tagata tenā ki luga o tuku atu a mea e manako a ia ki ei.”—Luka 11:5-8.

Ne seki fakauiga ne Iesu pelā me e se fia talia ne Ieova a ‵tou fakamolemole, e pelā mo te taugasoa tenā. I lō te fai penā, ne fakaasi atu ne ia me kafai e gasuesue se taugasoa kaugata ona ko te fakamolemole ‵soko atu ki a ia, e mautinoa eiloa me ka tali fakavave atu te ‵tou Tamana faka-te-lagi ki fakamolemole ‵tonu o ana tavini fakamaoni! Telā ne toe fai atu penei a Iesu: “Au e fai atu ki a koutou, tumau i te fakamolemole atu, kae ka tuku mai ki a koutou; tumau i te salasala atu, kae ka maua ne koutou; tumau i te tukituki atu, kae ka ‵tala mai ki a koutou. Me i so se tino e fakamolemole atu ka tuku atu ki a ia, kae ko so se tino e salasala atu, ka maua ne ia, kae ko so se tino e tukituki atu, ka ‵tala atu ki a ia.”—Luka 11:9, 10.

Ne faka‵mafa atu ne Iesu tena manatu mai te fakatusatusaga ne ia o tamana faka-te-foitino: “Ko oi te tamana i a koutou e fakamolemole atu tena tama ki se ika, kae tuku atu ki a ia se gata i lō te ika? Io me e fakamolemole atu foki ki se fuamoa, kae tuku atu ki ei se akalava? Tela la, e tiga eiloa a koutou ne tino ma‵sei kae e iloa ne koutou o tuku atu a meaalofa ‵lei ki otou tama‵liki, e sili atu la te otou Tamana i te lagi i te fia tuku atu ne ia o te agaga tapu ki a latou kolā e fakamolemole atu ki a ia!” (Luka 11:11-13) Ko oko eiloa i te gali o te fakatalitonuga me e loto fiafia te ‵tou Tamana ke fakalogologo kae tali mai ki ‵tou manakoga.