Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 86

Ko Toe Foki Mai te Tamaliki Tagata Telā ne Galo

Ko Toe Foki Mai te Tamaliki Tagata Telā ne Galo

LUKA 15:11-32

  • TALA FAKATUSA E UIGA KI SE TAMALIKI TAGATA TELĀ NE GALO

Ne tuku atu ne Iesu a tala fakatusa e uiga ki te mamoe mo te tupe kolā ne ‵galo, i te taimi kāti koi nofo atu a ia i Pelea, i te feitu saegala o te Vaitafe o Iolitana. A te fekau telā ne akoako mai i tala e lua, me e ‵tau o fia‵fia tatou māfai ko salamō kae toe foki atu se tino agasala ki te Atua. Ko oti ne fakamasei faeloa ne te kau Falesaio mo failautusi a Iesu me ne talimalo ne ia a vaegā tino penā. Kae e mata, e isi se mea ne tauloto ne vaegā tino fakamasei tino penā mai i tala fakatusa e lua a Iesu? E mata, ne malamalama latou i lagonaga o Ieova ki tino agasala kolā ko sala‵mo? Ko fai atu nei ne Iesu se tala fakatusa fakaotia loto telā e faka‵mafa mai foki i ei a te akoakoga tāua tenā.

E aofia eiloa i te tala fakatusa a te tamana telā e tokolua ana tama‵liki tāgata, telā e fai a te toekimuli mo fai te tino tāua i te tala fakatusa tenei. Ne ‵tau eiloa o tauloto ne Falesaio mo failautusi, e pelā foki mo nisi tino ne fakalogo‵logo ki te tala a Iesu, se mea mai i fakamatalaga kolā ne fai atu e uiga ki te toekimuli. Kae ke se fakaseaoga foki a fakamatalaga a Iesu e uiga ki te tamana mo te toekimua, me e aoga foki ki a tatou a te kilokiloga ne fakaasi atu ne lāua. Tela la, ke mafaufau ki tāgata katoa konei e tokotolu i te taimi e fakamatala mai ei ne Iesu a te tala fakatusa:

“E isi se tagata e tokolua ana tama‵liki tāgata,” ne kamata te tala a Iesu. “Kae ne fai atu te tamaliki foliki ki tena tamana, ‘Toku tamana, tuku mai te vaega telā e ‵tau o maua ne au.’ Tenā ne ‵vae ei ne te tamana ana mea i a lāua.” (Luka 15:11, 12) Onoono la me ne seki manako a te toekimuli tenei ke tuku atu ana mea ona ko te mea ko oti ne mate tena tamana. Koi ola eiloa a te tamana. Kae ko manako eiloa nei a te tama tagata ki tena vaega ko te mea ke tu tokotasi a ia kae fai so se mea e manako a ia ki ei. Kae se a te mea tenā?

Ne fakamatala mai penei a Iesu: “I nai aso mai tua ifo, ne puke ne te tamaliki foliki ana mea katoa kae faimalaga atu ki se fenua ‵mao kae fakamāumāu ne ia i konā ana mea katoa mai te ola i se olaga faivalevale.” (Luka 15:13) I lō te nofo filemu atu i tena fale mo tena tamana telā e atafai kae tausi faka‵lei atu ki ana tama‵liki, ne fanatu eiloa a te tamaliki tagata tenei ki te suā fenua. I konā, ne fakamāumāu ne ia ana mea katoa i te ‵nofo fakatasi  mo fāfine ma‵sei mai te fakataunuga o ana manakoga fakatauavaga ma‵sei. Fakamuli ifo ne oko atu a aso faiga‵ta ki a ia, e pelā mo te mea ne toe fai mai ne Iesu:

“I te otiga ne fakamāumāu ana mea katoa, ne poko se oge lasi i te fenua kātoa, kae ne mativa ei a ia. Ne fano a ia o nofo i se tino tonu e tokotasi o te fenua tenā, kae ne uga atu a ia ke tausi ana puaka i te vao. Kae ne fia kai sāle tou tagata ki mea‵kai a puaka, me e seai se tino e fia tuku atu ne mea ki a ia.”—Luka 15:14-16.

E fakatulaga ne te Tulafono a te Atua a puaka me ne manu lai‵lai, kae ne galue te tamaliki tagata tenei e pelā me se tino tausi puaka. Ne logo‵fio eiloa tou tagata i te fiakai, telā ne iku atu eiloa ki tena fiakai ki mea‵kai mō manu, ko puaka kolā e tausi ne ia. Ona ko tena fakaalofa mo te loto fanoanoa, ne “ala aka ei tena mafaufau.” Ne a ana mea ne fai? Ne fai ifo a ia penei: “E tokouke a tino ga‵lue a toku tamana e lava kae ‵toe olotou falaoa, kae tenei au ka mate i te fiakai! Au ka tu ki luga o fano ki toku tamana kae fai atu ki ei: ‘Toku tamana, au ko oti ne agasala ki te lagi e pelā foki ki a koe. Ko se aoga au o taku ko tau tama. Kae ke fai fua au mo fai se tokotasi o au tino galue.’” Tenā ne tu aka ei tou tagata kae fano ki tena tamana.—Luka 15:17-20.

Ne saga atu pefea te tamana? E mata, ka ‵fuli atu a ia mo te kaitaua kae pati ‵mafa atu ne ia ona ko te fakavalevale ke fanatu keatea a ia mai te fale i te taimi muamua? E mata, ka fakaasi atu ne te tamana a te sē fiafia mo te uiga sē fia talimālō? Moi ko koe tenā, ne a au mea ka fai? Kae e a māfai ko tau tama tenā?

 KO MAUA TE TAMALIKI TAGATA NE GALO

Ne fakamatala atu ne Iesu a lagonaga mo faifaiga a te tamana: “Kae koi ‵mao a ia kae lavea a ia ne tena tamana, kae ne ‵fonu te loto o tena tamana i te alofa, tele atu ei, ‵sai ki a ia kae sogi atu ki ei.” (Luka 15:20) E tiga foki eiloa ko oti ne logo te tamana i te olaga masei o tena tama, ne toe talia mai ne ia tena tama. E mata, ka lavea ne takitaki Iutaia, kolā e fai mai me e iloa kae tapuaki atu latou ki a Ieova, a lagonaga o te Tamana faka-te-lagi ki tino agasala kolā ko sala‵mo tonu? E mata, e iloa foki ne latou me ne fakaasi mai foki ne Iesu a te vaegā uiga gali tenā?

Ne mafai eiloa o iloa ne te tamana poto me ko salamō tonu tena tama ona ko te mata fanoanoa. Kae ko te fakaasiatuga muamua o faiga a‵lofa a te tamana ne fai ei ke faigofie o taku atu ne ia ana agasala, e pelā mo te fakamatalaga a Iesu: “Tenā ne fai atu ei te tama ki a ia, ‘Toku tamana, au ko oti ne agasala ki te lagi e pelā foki ki a koe. Ko se aoga au o taku ko tau tama.’”—Luka 15:21.

Ne fakatonu atu te tamana ki ana pologa: “‘Fakavave! aumai se gatu ‵loa e tafasili i te ‵lei, kae fakapei atu ki a ia. Faulu atu se mama ki tena lima mo taka ki ana vae. Puke mai foki se tamā pulumakau putaputa o ta, ko te mea ke ‵kai kae fia‵fia tatou, me i taku tama tenei ne mate kae ko toe ola mai; ne galo kae ko toe maua.’ Kamata ei o fia‵fia latou.”—Luka 15:22-24.

I te taimi tenā ne nofo atu te toekimua a te tamana i te fatoaga. Ne fai mai a Iesu e uiga ki a ia: “I tena fokimaiga kae ko pili atu ki te fale, lagona ei ne ia a te ‵tagi o pese mo tino e ‵saka. Tenā ne kalaga atu ei a ia ki se tavini e tokotasi kae fesili atu me se a te mea e fai. Ne fai atu a ia ki ei, ‘Ko oti ne vau tou taina kae ko tou tamana ne ta ne ia se tamā pulumakau putaputa me ko foki mai tou tagata mo te malosi.’ Kae ne kaitaua tou tagata kae se manako o ulu atu ki loto. Tenā ne vau ei tena tamana ki tua kae fakamolemole atu ki a ia ke fanatu ki loto. Ne tali atu tou tagata ki tena tamana, ‘Kiloke! Ko oti au ne galue fakapologa mō koe i tausaga e uke kae ne seki soli aka eiloa ne  au au fakatonuga, kae ne seki tuku mai eiloa ne koe se tamā kouti ke fia‵fia fakatasi ei au mo oku taugasoa. Kae i te taimi eiloa ne oko mai ei tau tama telā ne fakamāumāu ne ia a mea e ola ei koe fakatasi mo fafine talitagata, ta ei ne koe se tamā pulumakau putaputa ma ia.’”—Luka 15:25-30.

Ko oi ne fai pelā mo te tamaliki matua, kolā ne fāmeo faeloa ki te alofa telā ne fakaasi atu ne Iesu ki tino ma‵lalo mo tino agasala? Ko failautusi mo Falesaio. Ne fai ne Iesu tena tala fakatusa ona ko te taku fakamasei ne latou a ia me ne talia ne ia a tino agasala. E tonu, e ‵tau eiloa o talia katoatoa a te akoakoga tāua tenei ne so se tino telā e taku fakamasei ne ia te alofa fakamagalo o te Atua.

Ne fakaoti ne Iesu tena tala fakatusa ki te fakamatalaatuga o te fakamolemole a te tamana ki tena tamaliki matua: “Taku tama, a koe ne nofo faeloa i oku tafa, kae ko aku mea katoa e a koe. Kae e ‵tau mo tatou o ‵lifu kae fia‵fia, i tou taina tenei ne mate kae ko toe ola mai, ne galo kae ko toe maua.”—Luka 15:31, 32.

Ne seki fakaasi atu ne Iesu a mea ne fai ne te tamaliki matua tenā. Kae mai tua o te mate mo te toetu o Iesu, “e tokouke a faitaulaga ne fai pelā me ne tino tali‵tonu.” (Galuega 6:7) Kāti ne aofia i ei a nisi tino kolā ne fakalogo‵logo ki te tala fakatusa magoi tenei a Iesu e uiga ki te tama telā ne galo. Ao, ne mafai foki o ala aka olotou mafaufau, sala‵mo, kae toe ‵foki atu ki te Atua.

Mai te aso tenā o vau ki mua, ne mafai kae e ‵tau foki mo soko o Iesu o talia katoatoa a akoakoga tāua kolā ne tuku mai ne ia i te tala fakatusa ‵lei tenei. A te akoakoga muamua, se mea poto ke tumau i loto i te olaga tokagamalie o tino o te Atua, mai lalo i te tausiga a te ‵tou Tamana telā e alofa kae tausi mai ki a tatou, i lō te takasese atu i fakafiafiaga o te foitino i “se fenua ‵mao.”

A te suā akoakoga, kafai e isi se tino i a tatou ko takase‵se atu keatea mai i auala o te Atua, e ‵tau mo tatou o toe ‵foki atu mo te loto mau‵lalo ki te ‵tou Tamana ko te mea ke toe maua ne latou tena taliaga.

Kae ko te suā akoakoga e mafai o lavea atu i te ‵kese o te taliaga mo te loto fakamagalo o te tamana, mo te uiga kaitaua kae se fiafia o te taina matua. E manino ‵lei i ei, me e ma‵nako a tavini a te Atua ke maua te loto fakamagalo kae ke talia mo te fiafia se tino telā ne takasese atu kae ko salamo tonu kae toe foki mai ki te ‘fale o te Tamana.’ Ke na fia‵fia tatou me i te ‵tou taina telā ‘ne mate ko toe ola’ mo ia telā ‘ne galo ko toe maua.’