Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 87

Ke Fakatoka Faka‵lei mō Aso Mai Mua​—Kae Fakaaoga te Poto Tāua

Ke Fakatoka Faka‵lei mō Aso Mai Mua​—Kae Fakaaoga te Poto Tāua

LUKA 16:1-13

  • TALA FAKATUSA E UIGA KI TE SITUATI SĒ AMIOTONU

  • KE “FAI TAUGASOA” E AUALA I AU KOLOA

A te tala fakatusa e uiga ki te tamaliki tagata ne galo, telā ne fatoa oti ne fakamatala atu ne Iesu, ne ‵tau o ofo i ei a tino ‵tae lafoga, failautusi mo Falesaio kolā ne fakalogo‵logo atu, me e loto fiafia a te Atua o fakamagalo a tino agasala kolā ko sala‵mo tonu. (Luka 15:1-7, 11) Ko saga atu nei a Iesu ki ana soko. Ne fakaaoga ne ia a te suā tala fakatusa e uiga ki te tagata maukoloa telā ne iloa aka ne ia me i tena menetia io me ko te situati i tena fale ne seki ‵lei ana amioga.

Ne fakamatala mai ne Iesu, me ne fakaaoga ‵se ne te situati a kope o tena matai. Tela la, ne fai atu te matai me ka fakatea te situati. Ne mafaufau ifo te situati: “Se a nei taku mea ka fai me ko oti au ne fakatea ne toku matai? E se lava toku malosi o keli a lua, kae e mā foki au ma akai atu ke maua ne aku mea.” Ke fakafesagai atu ki mea ka ‵tupu i aso mai mua, ne fakaiku aka tou tagata: “Aaa! Ko iloa ne au taku mea ka fai ko te mea kafai e fakatea au mai te galuega fakasituati, ka talia au ne tino ki loto i olotou fale.” Ne kalaga fakavave atu a ia ki a latou kolā e ‵nofo kaitalafu, kae fesili atu: “E fia tau kaitalafu i toku matai?”—Luka 16:3-5.

Ne tali atu te tino muamua: “E 600 kalone o sinu olive.” Kāti e nofo ki te 580 kalone o sinu olive. Kāti te tino kaitalafu e isi sena fatoaga olive io me se tino faipisinisi telā e ‵togi atu ne ia a sinu. Ne fai atu a te situati ki a ia: “Toe puke mai tau feagaiga, nofo ki lalo kae tusi fakavave te aofaki e 300.”—Luka 16:6.

Ne fesili atu a te situati ki te suā tino: “Kae ko koe, e fia tau kaitalafu?” A te tali: “E selau tulamu saito.” Ne fai atu te situati ki te tino kaitalafu: “Toe puke mai tau feagaiga kae tusi ki lalo te aofaki e 80.” Telā, ne ‵toli ifo ei ne ia a te kaitalafu i se 20 pasene.—Luka 16:7.

Koi pule eiloa te situati i mea tau tupe a tena matai, tela la, koi mafai eiloa ne ia o ‵kati ki lalo a kaitalafu a nisi tino i tena matai. Mai i te ‵katiga o kaitalafu konā, ne fai taugasoa ei a te situati mo tino kolā e fesoasoani atu māfai ko seai sena galuega.

Kae ne logo eiloa te pule i te mea ne tupu. E tiga eiloa ne lūsi a ia i te mea ne fai, ne ofo tou tagata i te situati kae fakamālō atu ki a ia, me ne “gasuesue a ia mo te poto faitalia tena sē amiotonu.” Ne toe fai atu a Iesu: “Me i tama o te olaga tenei e ‵poto i te fakafesagai atu ki te lotou kautama eiloa i lō tama o te mainaga.”—Luka 16:8.

Ne seki tavae ne Iesu a faifaiga a te situati, kae e se fakamalosi foki ne ia a tino faipisinisi ke fai penā. Se a la te manatu tāua? Ne fakamalosi atu a ia ki ana soko: “Ke fai ne otou taugasoa i koloa sē amio‵tonu me kafai ko se aoga a mea konā ka mafai ne latou o faka‵lafi a koutou ki loto i fale se-gata-mai.” (Luka 16:9) Ao, e isi se akoakoga e lavea atu i konei e uiga ki te kilo ‵mao mo te fakaaogaga o te poto. E ‵tau eiloa mo tavini a te Atua, “tama o te mainaga,” o fakaaoga olotou kope faka-te-foitino i se auala poto mo te mafaufau ki te ola se-gata-mai i aso mai mua.

 Ko Ieova te Atua fua mo tena Tama e mafai o talia ne lāua se tino ki te Malo faka-te-lagi io me ko te Palataiso i te lalolagi mai lalo i te Malo tenā. E ‵tau o ati aka ne tatou mo te loto fia‵fia a te va fakataugasoa mo lāua mai te fakaaogaga o koloa faka-te-foitino e maua ne tatou, ke ‵lago atu ki manakoga o te Malo. Ka mautinoa eiloa ‵tou olaga ki te se-gata-mai i aso mai mua māfai ko se aoga io me ko fakaseai atu a aulo, siliva, mo nisi koloa faka-te-foitino.

Ne fai mai foki a Iesu me i a latou kolā e fakamaoni i te tausi mo te fakaaogaga o so se koloa io me ko mea faka-te-foitino e maua ne latou, ka fakamaoni foki i te tausiga ki mea kolā e sili atu te tāua. “Tela la, kafai e se fakamaoni koutou e uiga ki koloa sē amio‵tonu, ko oi la ka fia tuku atu ne ia ki a koutou a tinā mea ‵tonu [e pelā mo manakoga o te Malo]?”—Luka 16:11.

Ne fakaasi atu ne Iesu ki ana soko me ka uke a mea e manakogina ke fai ne latou māfai e talia ke ulu atu latou “ki loto i fale se-gata-mai.” E se mafai o fai se tino mo tavini tonu a te Atua kae e fai foki mo pologa ki koloa faka-te-lalolagi, kope faka-te-foitino. Ne fakaoti ne Iesu ana pati penei: “E seai se tavini e mafai o pologa ki matai e tokolua, me ka takalialia a ia ki te tino e tokotasi kae alofa ki te suā tino, io me ka ‵piki a ia ki te tino e tokotasi kae manatu fatauva ki te suā tino. E se mafai o pologa koutou ki te Atua fakatasi mo Koloa.”—Luke 16:9, 13.