Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 97

Te Tala Fakatusa ki Tino Ga‵lue i te Togavine

Te Tala Fakatusa ki Tino Ga‵lue i te Togavine

MATAIO 20:1-16

  • KA “‵MUA” A TINO GA‵LUE I TE TOGAVINE KOLĀ NE “FAKAMULI”

Ne fatoa fai atu eiloa ne Iesu ki ana tino fakalogo‵logo i Pelea me i tino e “tokouke kolā ne ‵mua ka faka‵muli, kae ko tino kolā ne faka‵muli ka ‵mua.” (Mataio 19:30) Ne faka‵mafa atu ne ia te fakamatalaga tenei i se tala fakatusa e uiga ki tino ga‵lue i te togavine:

“Me i te Malo o te lagi e fakatusa ki te matai o te fale telā ne alausu i te vaveao o ‵sala ne tino ke ga‵lue i tena togavine. I te taimi ne lotoma‵lie fakatasi ei a ia mo tino ga‵lue ke ‵togi latou ki se tenali e tasi i te aso, uga atu ei ne ia ki tena togavine. I tena fanatuga foki i te tolu o itula, ne lavea ne ia a nisi tino e seai ne galuega e takatu‵tu i te maketi; ne fai atu a ia ki a latou, ‘Olo foki koutou o ga‵lue i te togavine, kae ka ‵togi ne au koutou ki se ‵togi ‵lei.’ Tenā ne olo ei latou. Ne toe fanatu foki a ia kāti i te ono o itula mo te iva o itula kae e penā foki te mea ne fai ne ia. Fakamuli loa, ne toe fanatu a ia i te 11 o itula kae ne maua atu ne ia a nisi tino e takatu‵tu fua, ana muna ki a latou, ‘Kaia e takatu‵tu ei koutou i konei i te aso kātoa kae se ga‵lue?’ Ne tali atu latou, ‘Me e seai se tino e fakagalue ne ia matou.’ Ne fai atu tou tagata ki a latou, ‘Olo foki koutou ki te togavine.’”—Mataio 20:1-7.

Kāti ne mafau‵fau a tino fakalogo‵logo a Iesu ki a Ieova te Atua i te taimi ne lagona ei ne latou a te ‵takuatuga o “te Malo o te lagi” mo te “matai o te fale.” E fakaasi mai i te Tusi Tapu me i te tino i ō ia te togāvine, ko Ieova, telā e fakasino atu ki te fenua o Isalaelu. (Salamo 80:8, 9; Isaia 5:3, 4) A tino ga‵lue i te togāvine ko tino kolā ne aofia i te feagaiga o te Tulafono. Kae ne seki taku mai ne Iesu a mea ne ‵tupu i aso mua. Ne fakamatala mai ne ia te tulaga i ana aso.

Ne tofotofo aka ne takitaki lotu, e pelā mo te kau Falesaio kolā ne fatoa tofotofo aka ne latou a ia i te mataupu e uiga ki te ‵talaga o avaga, ne ‵tau o ga‵lue malosi faeloa i te taviniga ki te Atua. Ne fai latou e pelā mo tino ga‵lue tumau kolā e ‵tau o maua ne latou te ‵togi kātoa mō te aso, telā ko te tenali i te aso.

Ne ‵kilo fatauva atu a faitaulaga mo nisi tino i te potukau tenei ki tino Iutaia kolā e masani o tavini atu ki te Atua, kae ga‵lue sē tumau latou i te togavine a te Atua. I te tala fakatusa a Iesu, konei a tāgata kolā ne fakaga‵lue “i te tolu o itula” (9:00 i te taeao) io me se taimi fakamuli ifo i te aso galue tenā—i te ono, iva, mo te 11 o itula (5:00 i te afiafi).

Ne ‵kilo atu eiloa ki tāgata mo fāfine kolā ne tau‵tali atu i a Iesu e pelā me ne “tino malaia.” (Ioane 7:49) Ne fai eiloa latou mo fai ne tino faiika io me ko nisi galuega ma‵lalo i te lasiga o olotou olaga. Kae i te 29 T.A., i te taimi ne ‵to ei a lau o lakau, ne uga atu ei ne te “matai o te togavine” a Iesu ke kalaga atu ki tino ma‵lalo konei ke ga‵lue mō te Atua e pelā me ne soko o Keliso. Ne fai latou mo tino “fakamuli” kolā ne taku mai ne Iesu, me ko tino ga‵lue i te togavine i te 11 o itula.

I te fakaotiga o tena tala fakatusa, ne fakamatala mai ne Iesu a mea ne ‵tupu i te fakaotiga o te aso galue tenā: “I te okoatuga ki te afiafi, ne fai atu te matai o te togavine ki te pule o te kau faigaluega, ‘Kalaga atu ki tino ga‵lue ke ‵mai o puke olotou peofuga, e kamata mai i a latou kolā ne ga‵lue fakamuli kae fakaoti ki a latou kolā ne ga‵lue muamua.’ Ne ‵mai a tāgata kolā ne ga‵lue i te 11 o itula, kae ne maua ne latou a tenali e takitasi. Kae i te ‵maiga o tino kolā ne ga‵lue muamua, ne mafau‵fau latou me ka uke atu olotou mea e maua, kae ne ‵togi foki latou ki se tenali e tasi. I te mauaga o olotou peofuga ne kamata ei latou o fameo ki te matai o te fale kae fai atu, ‘A tāgata konei ne fakamuli mai e tasi fua te itula ne ga‵lue i ei; kae e faka‵pau eiloa ne koe olotou peofuga mo matou kolā ne fi‵ta i te ga‵luega i te aso kātoa mo te ‵vela o te la!’ Kae ne fai atu a ia i tena tali ki se tokotasi o latou, ‘Toku tagata, e seai soku ‵se. E a, ne seki lotomalie koe ke galue mō se tenali e tasi? Puke tou peofuga kae fano. E manako au o tuku atu ki te tino tenei ne fakamuli a te ‵togi foki tenā ne maua ne koe. E a, e se saoloto au o fai a te mea e manako au ki ei i aku mea totino? Io me e loto masei fua koe ona ko au e ‵lei?’ I te feitu la tenei, ko latou kolā ne ‵mua ka faka‵muli, kae ko latou kolā ne faka‵muli ka ‵mua.”—Mataio 20:8-16.

Kāti ne mafau‵fau a soko e uiga ki te fakaotiga o te tala fakatusa a Iesu. Ka fakaataata pefea ne takitaki  lotu Iutaia a latou eiloa e pelā me ko tino kolā ne “‵mua,” kae ka “fakamuli”? Kae ka fai pefea a soko o Iesu mo tino kolā ka “‵mua”?

A soko o Iesu, kolā ne ‵kilo atu ki ei a te kau Falesaio mo nisi tino e pelā me ko tino “fakamuli,” ne fetaui ‵lei ke fai mo tino kolā ka “‵mua,” ke maua te ‵togi kātoa. E auala i te mate o Iesu, ka ‵pei atu keatea a te Ielusalema faka-te-lalolagi, kae ka filifili ne te Atua se fenua fou, telā ko “te Isalaelu a te Atua.” (Kalatia 6:16; Mataio 23:38) Ne fakasino atu a Ioane te Papatiso ki vaegā tino penā i te taimi ne faipati ei a ia e uiga ki te papatisoga ki te agaga tapu. A latou kolā ne “fakamuli” ka fai mo tino muamua ke fetaui mō te papatisoga tenā kae tuku atu foki te tauliaga ke molimau atu e uiga ki a Iesu “ke oko eiloa ki toe koga ‵mao i te lalolagi.” (Galuega 1:5, 8; Mataio 3:11) Mai i te malamalama o te kau soko i te matugā ‵fuliga lasi telā ne fakasino atu ki ei a Iesu, ne mafai o matea ‵mao ne latou a te lasi o te sē fia‵fia o takitaki lotu, kolā ka “fakamuli.”