Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 94

Manakoga Tāua e Lua​—Te ‵Talo mo te Loto Maulalo

Manakoga Tāua e Lua​—Te ‵Talo mo te Loto Maulalo

LUKA 18:1-14

  • TALA FAKATUSA KI TE FAFINE KO MATE TENA AVAGA TELĀ NE TUMAU I TE FAKAMOLEMOLE ATU

  • TE FALESAIO MO TE TINO ‵TAE LAFOGA

Ko oti ne fai atu ne Iesu ki ana soko se tala fakatusa e uiga ki te tumau faeloa i te faiga o ‵talo. (Luka 11:5-13) Kāti ko nofo atu nei a ia i Samalia io me ko Kalilaia, kae ne toe faka‵mafa atu ne ia te tāua ke se fakagata te faiga o ‵talo. Ne fai atu penā a ia mai i te toe taku atu o te suā tala fakatusa tenei:

“Ne nofo atu i se fakai e tasi se famasino telā e se mataku ki te Atua kae se āva foki ki tino. E isi foki se fafine ko mate tena avaga i te fakai tenā ne fanatu sāle ki tou tagata kae fai atu, ‘Onoono faka‵lei ke maua ne au se fakamasinoga tonu mai toku fili telā ne fai tena tagi.’ Ne seki fia saga sāle atu a ia ki te fafine tenā, kae fakamuli ifo, ne fai ifo a ia penei, ‘E tiga eiloa e se mataku au ki te Atua io me e se āva ki se tino, kae ona ko te fakalavelave mai faeloa o te fafine tenei ki a au ka fai eiloa ne au se fakamasinoga tonu mō ia ko te mea ke se toe foki mai a ia o fakafi‵ta au ki tena manakoga.’”—Luka 18:2-5.

Ne fai mai ne Iesu te aoga o tena tala: “Faka‵logo ki pati ne fai atu ne te famasino, e tiga eiloa e se amiotonu a ia! E tonu la, e mata, ka se fai eiloa ne te Atua se fakamasinoga tonu mō ana tino filifilia kolā e ka‵laga atu ki a ia i te ao mo te po, e tiga eiloa te lasi o tena loto kufaki mō latou?” (Luka 18:6, 7) Se a te mea ne fakaasi mai ne Iesu e uiga ki tena Tamana?

Ne seki fakauiga a Iesu me i a Ieova te Atua e fai pelā mo te famasino sē amiotonu. Kae e aofia i tena manatu se fakatusatusaga: Kafai e talia ne se famasino sē amiotonu a fakamolemole kolā e fai ‵soko atu ki a ia, e seai eiloa se fakalotolotolua me ka fai eiloa penā te Atua. A ia e amiotonu kae ‵lei, kae ka tali mai a ia māfai ana tino kolā e se ‵mapu eiloa i te ‵talo atu. E lavea ne tatou te mea tenā i pati ne toe fai mai ne Iesu: “Au e fai atu ki a koutou, ka fai fakavave eiloa ne ia te fakamasinoga tonu mō latou.”—Luka 18:8.

E se maua sāle ne tino ma‵lalo kae ma‵tiva a faifaiga fakamaoni, kae e fai faka‵lei faeloa ki tino ma‵losi mo tino mau‵mea. Kae e se tenā loa te mea e manako ki ei te Atua. Kafai ko oko ki te taimi tonu, ka fakamautinoa aka ei ne ia mo te fakamaoni ke fakasala a tino amio ma‵sei kae ke maua ne ana tavini a te ola se-gata-mai.

Ko oi e fakatuanaki e pelā mo te fafine ko mate tena avaga? E tokofia a tino e tali‵tonu me ka fai ne te Atua te “fakamasinoga tonu”? Ne fatoa taku atu ne Iesu a te manakoga ke tumau i te ‵talo atu. Nei la, ke fakaasi atu te fakatuanaki ki te malosi o te ‵talo, ne fesili atu a Iesu: “Kafai e oko mai te Tama a te tagata, e mata, ka maua eiloa ne ia te fakatuanaki tenei i te lalolagi?” (Luka 18:8) E fakaasi mai i ei me kāti e se tokouke a tino ka maua ne latou a te vaegā fakatuanaki tenā māfai e oko mai a Keliso.

Ne tali‵tonu eiloa a nisi tino kolā ne fakalogo‵logo atu ki a Iesu me e ‵lei eiloa te lotou fakatuanaki. Ne tali‵tonu eiloa latou me i a latou e amio‵tonu, kae e manatu ma‵mā latou ki nisi tino. Ne fakasino atu eiloa ne Iesu a te suā tala fakatusa tenei ki vaegā tino penā:

“E tokolua tāgata ne olo atu ki te faletapu o ‵talo i ei, e tokotasi se Falesaio kae ko te suā tino se tino ‵tae lafoga. Ne tu te Falesaio kae kamata o ‵talo kae fai atu a pati konei i tena loto, ‘Te Atua, au e fakafetai atu ki a koe i a au e se fai pelā mo nisi tino katoa, ne tino kaisoa, tino sē amio‵tonu, tino mulilua io me fai pelā mo te tino ‵tae lafoga tenei. Au e fakalikiliki fakalua i te vaiaso; kae e tuku atu ne au te tasi-vae-sefulu o aku mea katoa e maua.’”—Luka 18:10-12.

 Ne lauiloa sāle te kau Falesaio ona ko te fia fakaasi atu o te lotou amiotonu fakaloiloi. E fai latou penā ko te mea ke ōfo a nisi tino i ei. Ne fakaliki‵liki sāle latou i Aso Gafua mo Aso Fa katoa, ko aso kolā e tokouke a tino e olo atu ki maketi ‵lasi, telā ka mafai ei o lavea latou ne tino e tokouke. Kae e ‵togi atu ne latou te tasi-vae-sefulu o mea katoa ke oko foki eiloa ki tamā lakau fo‵liki. (Luka 11:42) I nai masina mai mua atu i ei, ne fakaasi atu ne latou te lotou takalia‵lia ki tino ma‵lalo, penei: “Kae ko te vaitino kolā e se iloa ne latou te Tulafono [i te kilokiloga a Falesaio] ne tino malaia.”—Ioane 7:49.

Ne toe faka‵soko atu ne Iesu tena tala fakatusa: “Kae ne tu atu te tino ‵tae lafoga i se koga tai ‵mao kae e se mafai o kilo aka ona mata ki te lagi, kae ne pāpā faeloa tena fatafata, ana muna, ‘Te Atua, alofa mai ki a au te tino agasala.’” Ao, nee taku ‵tonu atu mo te loto maulalo ne te tino ‵tae lafoga ana vāivāiga. Ne fakaoti ne Iesu ana pati penei: “Au e fai atu ki a koutou, ne foki atu te tagata tenei ki tena fale kae ne sili atu tena amiotonu i lō te Falesaio tenā. Me ko so se tino e fakamaluga ne ia a ia eiloa ka fakamalalogina, kae ko so se tino e fakamalalo ne ia a ia eiloa ka fakamalugagina.”—Luka 18:13, 14.

Tela la, ne toe fakaasi faka‵lei mai ne Iesu a te tāua o te loto maulalo. E tāua eiloa a pati fakatonutonu konā ki ana soko, kolā ne ‵tupu aka i te fenua telā ne faka‵mafa atu ne Falesaio fia amio‵tonu a tulaga mo tofi. Kae ka aoga foki a manatu fakatonutonu konā ki soko katoa o Iesu.