Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 83

Kamiga ki se ‵Kaiga​—Ko oi e ‵Kami ne te Atua?

Kamiga ki se ‵Kaiga​—Ko oi e ‵Kami ne te Atua?

LUKA 14:7-24

  • SE AKOAKOGA E UIGA KI TE LOTO MAULALO

  • E FAI NE TINO ‵KAMI A FAKAMASAKOGA

I te otiga ne faka‵lei ne ia se tagata telā ne masaki fula‵fula, kae koi nofo atu eiloa a Iesu i te fale o te Falesaio. Ne kilokilo atu a Iesu ki nisi tino ‵kami kolā ne filifili ne latou a toe koga tāua i te ‵kaiga, kae ne fakaaoga ne ia te mea tenei e pelā me se avanoaga ke akoako atu e uiga ki te loto maulalo.

“Kafai e ‵kami koe ne se tino ki se ‵kaiga o se fakaipoipoga,” ne fakatonu atu a Iesu, “sa nofo i te ‵toe nofoga tāua. Kāti e isi se tino telā e lauiloa atu i a koe ko oti foki ne ‵kami ne ia. Tenā ko vau ei a te tino telā ne ‵kami ne ia koulua kae fai atu ki a koe, ‘Tuku tou nofoga ki te tagata tenei.’ Ko fano ei koe mo te masiasi o nofo i te ‵toe nofoga sē taulia.”—Luka 14:8, 9.

Ne toe fai atu a Iesu: “Kae kafai koe e ‵kami, fano o nofo i te ‵toe nofoga sē taulia, ko te mea kafai e vau te tino ne ‵kami ne ia koe ka fai atu ki a koe, ‘Toku taugasoa, fano o nofo i se nofoga tai maluga atu.’ Ko fakaaloalogina ei koe i mua o tino ‵kami katoa.” E uke atu a mea e aofia i ei i lō te fakaasi atu fua o uiga ‵lei. Ne fakamatala mai a Iesu: “Me ko so se tino e fakamaluga ne ia a ia eiloa ka fakamalalogina, kae ko so se tino e fakamalalo ne ia a ia eiloa ka fakamalugagina.” (Luka 14:10, 11) Ao, ne fakamalosi atu a ia ki ana tino fakalogo‵logo ke ati aka a te uiga ko te loto maulalo.

Ne toe fai atu ei ne Iesu a te suā akoakoga ki te Falesaio telā ne ‵kami ne ia a ia—e uiga ki te auala ke fai ei se ‵kaiga telā e tāua ki te Atua. “Kafai e fai sau ‵kaiga i te tutonu io me ko te afiafi, sa ‵kamigina ou taugasoa io me ko ou taina io me ko ou kāiga io me ko ou tuakoi mau‵mea. I te mea ma ‵kami foki ne latou a koe i se taimi ke toe taui atu ki a koe. Kae kafai e fai sau ‵kaiga, ‵kami mai a tino ma‵tiva, tino ‵pili, tino vae ma‵sei, mo tino ‵kivi; kae ka fiafia eiloa koe, me e seai ne olotou mea ke toe taui atu ki a koe.”—Luka 14:12-14.

Se mea masani ke ‵kami sāle ne tatou a taugasoa, kāiga, io me ko tuakoi ki se ‵kaiga, kae e se fai mai a Iesu me i te mea tenei se mea ‵se. Kae ne faka‵mafa mai ne ia me i te fakatokaga o se ‵kaiga mō tino ma‵tiva, vae ma‵sei, io me e ‵kivi, e mafai o aumai i ei a fakamanuiaga e uke. Ne fakamatala atu a Iesu ki te tino e a ia te ‵kaiga: “Ka toe taui atu eiloa ki a koe i te taimi e toe faka‵tu aka ei a tino amio‵tonu.” Ne lotomalie se tino ‵kami ki ei kae fai atu: “E fiafia a te tino telā ka kai i te Malo o te Atua.” (Luka 14:15) Ne lavea ne ia me i te mea tenei se tauliaga tāua. Kae e se ko tino katoa e maua ne latou a te vaegā loto fakafetai penā, e pelā mo te tala fakatusa tenei a Iesu:

“Ne fai ne se tagata se ‵kaiga lasi i te afiafi, kae ne ‵kami ne ia a tino e tokouke. Ne uga atu ne ia tena pologa . . . ke fai atu ki tino ‵kami, ‘‵Mai, me ko toka nei a mea katoa.’ Kae ne kamata a latou katoa o fai olotou fakamasakoga. Ne fai atu te tino muamua ki a ia, ‘Ne ‵togi ne au se manafa kae e ‵tau o fano au o onoono ki ei; au e fakamolemole atu i a au ko se oko atu.’ Kae ne fai atu te suā tino, ‘Ne ‵togi ne au a pulumakau e sefulu kae ka fano au o iloilo aka latou. Au e fakamolemole atu i a au ko se oko atu.’ Kae ne fai atu foki te suā tino, ‘Au ne fatoa avaga kae ona ko te pogai tenei ko se mafai ei ne au o fanatu.’”—Luka 14:16-20.

Ko oko eiloa i te sē ‵lei o fakamasakoga konā! E masani sāle o iloilo aka ne se tagata a te manafa io me ko manu a koi tuai o ‵togi ne latou a mea konā, tela la, e se manakogina fakavave ke toe onoono atu ki ei. A te tagata i te tokotolu e seki fakatoka ke avaga. Ko oti eiloa ne avaga tou tagata, tela la, e seki ‵tau o se talia ne ia a te kamiga tāua tenā. I te lagonaga ne te matai a fakamasakoga konei, ne fai atu a ia mo te kaitaua ki tena pologa:

“Fano fakavave nei eiloa i loto i auala ‵lasi mo auala fo‵liki o te fakai kae aumai ki konei a tino ma‵tiva, mo tino ‵pili mo tino ‵kivi mo tino vae ma‵sei.” I te otiga ne fai ne te pologa a te mea tenā, kae koi seki ‵fonu eiloa te fale. Ne fai atu ei te matai ki tena pologa, “Fano ki auala katoa mo tamā auala, kae fakamalosi atu latou ke ‵mai ki loto ko te mea ke ‵fonu toku fale. Me e fai atu au ki a koutou, e seai eiloa se  tino i a latou kolā ne ‵kami ka tami ki aku meakai i te afiafi tenei.”—Luka 14:21-24.

A te tala telā ne fatoa fakamatala mai ne Iesu, e fakaasi mai i ei a te kamiga telā e tuku atu ne Ieova te Atua ki a Iesu Keliso, ke ‵kami mai a tino taki tokotasi ke mafai o talia ki te Malo o te lagi. A te kau Iutaia, maise a takitaki lotu, ko tino muamua ke ‵kami. Ne seki talia ne te tokoukega o latou a te kamiga tenā, i taimi katoa ne fai ei te galuega a Iesu. Kae ne seki taofi aka ei te kamiga i a latou eiloa konā. Ne fakaasi faka‵lei mai ne Iesu me ka isi foki se kamiga i te lua telā ka avatu i aso mai mua ki tino Iutaia ma‵lalo mo tino tali‵tonu mai nisi fenua. Mai tua ifo i ei, ka isi foki se kamiga i te tolu, ko te kamiga foki eiloa ki tino kolā ne ‵kilo atu ki ei a te kau Iutaia me e se ‵tau o ‵tu atu i mua o te Atua.—Galuega 10:28-48.

Ao, e fakamaoni mai ne muna a Iesu a te ‵tonu o pati a te mālō tokotasi, telā ne fai mai: “E fiafia a te tino telā ka kai i te Malo o te Atua.”