Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 84

Te Fai mo Fai se Soko​—E Pefea te Tāua?

Te Fai mo Fai se Soko​—E Pefea te Tāua?

LUKA 14:25-35

  • TIUTE O SE SOKO

Ko oti ne akoako atu ne Iesu a manatu tāua i te taimi ne ‵kai ei i te fale o te takitaki o Falesaio. I te taimi ne faka‵soko atu ei te malaga a Iesu ki Ielusalema, ne faima‵laga atu se vaitino tokouke fakatasi mo ia. Kaia? E mata, ne fia fai eiloa latou mo fai ana soko ‵tonu, faitalia me ne a mea e ‵tau o fai ne latou?

A koi faima‵laga atu latou, ne fai atu ne Iesu se mea ki a latou telā kāti ne ‵poi a nisi tino i ei: “So se tino e vau ki a au kae e se takalialia ki tena tamana mo tena mātua mo tena avaga mo ana tama‵liki mo ana taina mo ana tuagane, e tonu, ke oko eiloa ki tena ola, e se mafai o fai te tino tenā mo oku soko.” (Luka 14:26) Se a te uiga o ana pati konei?

Ne seki fai atu a Iesu me e ‵tau eiloa o takalia‵lia tonu a tino katoa kolā e fai mo fai ana soko ki olotou kāiga. I lō te fai penā, ne fakauiga a ia me e ‵tau o foliki ifo te lotou a‵lofa ki tino konā i lō te lotou a‵lofa ki a Iesu, e se pelā mo te tagata i tena tala fakatusa e uiga ki te ‵kaiga i te afiafi telā ne seki talia ne ia se ‵kamiga tāua, ona ko te mea ne fatoa avaga a ia. (Luka 14:20) A te tupuga mua o te kau Iutaia ko Iakopo ne fai pelā me ne “takalialia” a ia ki a Lea kae alofa ki a Lasela, telā e fakauiga i ei, me ne foliki ifo tena alofa ki a Lea i lō tena taina ko Lasela.—Kenese 29:31.

Onoono foki la, me ne fai mai a Iesu me e ‵tau o takalialia a te soko ki “tena ola” io me ki a ia eiloa. Ne fakauiga i ei me e ‵tau mo te soko tonu o sili atu tena alofa ki a Iesu i lō te alofa ki tena ola eiloa, ke oko foki ki te loto fiafia ke galo atu tena ola māfai e manakogina. E manino ‵lei, me i te fai mo fai se soko o Keliso, se tiute tāua. E sē se mea e sōnafai fua e aunoa mo te mafaufau faka‵lei ki ei.

E mafai o aofia i te fai mo fai se soko a mea faiga‵ta mo fakasauaga, me ne fai mai a Iesu: “So se tino telā e se amo tena lakau fakasaua kae tautali mai i a au e se mafai o fai mo oku soko.” (Luka 14:27) Ao, e ‵tau o lotomalie te soko tonu o Iesu ke oko atu ki a ia a fakamaseiga e pelā mo mea ne fe‵paki mo Iesu. Ne fai atu foki a Iesu me ka mate a ia i lima o ana fili.

Tela la, ne ‵tau o mafau‵fau faka‵lei a te vaitino kolā ne faima‵laga fakatasi atu mo Iesu ki te uiga ke fai mo fai se soko o Keliso. Ne faka‵mafa mai ne Iesu a te manatu tenei i se tala fakatusa. “E pelā mo te mea tenei,” ne fai atu a ia, “ko oi te tino i a koutou e manako o fakatu se taoa kae e se nofo muamua ki lalo o galue tena ‵togi, ke iloa aka me e lava ana tupe ke fakaoti tena galuega? Me kafai e se fai penā, ka fakatakato fua ne ia te fakavae kae ka se mafai ne ia o fakaoti.” (Luka 14:28, 29) Tela la, a koi tuai o fai mo fai a soko o Iesu, ne ‵tau eiloa o fakaiku faka‵lei aka ne tino kolā ne faima‵laga fakatasi atu mo ia ki Ielusalema, ke fakataunu katoatoa a te tiute tenā. Ne toe faka‵mafa atu ne ia te manatu tenā i te suā tala fakatusa:

“Ko oi te tupu e fanatu o taua ki se isi tupu e se sagasaga muamua ki lalo o mafaufau me e mafai ne ia mo tena kautau e toko 10,000 o fakafesagai ki te suā tupu telā e taua mai ki a ia mo tena kautau e toko 20,000? Kae kafai e se mafai ne ia, e uga atu  ne ia ana sui a koi tai ‵mao te tupu tenā kae fakamolemole atu ke maua se filemu.” Ke faka‵mafa atu tena manatu, ne fai atu a Iesu: “I se auala tai ‵pau, e mafai o mautinoa i a koe, me e seai se tino i a koutou e se fakatofa atu ki ana mea katoa e mafai o fai mo oku soko.”—Luka 14:31-33.

E tonu, e se fai atu a Iesu me ko te vaitino fua kolā ne tau‵tali atu ki a ia e ‵tau o fai penā. Ko latou katoa kolā e tau‵loto e uiga ki te Keliso, e ‵tau o loto fia‵fia ke fai a mea kolā ne fakaasi mai ne ia i konei. E fakauiga i ei me e ‵tau mo latou o toka ke tuku atu olotou mea katoa pelā me ne taulaga—olotou kope, ke oko foki ki olotou ola—māfai e fia fai latou mo ana soko. Tenā eiloa te mea e ‵tau o mafau‵fau kae ‵talo e uiga ki ei.

Nei la, ko fakasae aka ne Iesu a te mataupu telā ne patele malie a ia ki ei i tena Lāuga i luga i te Mauga i te taimi ne fai atu ei a ia me i ana soko “ko te masima o te lalolagi.” (Mataio 5:13) Kāti ne fakauiga a ia me e pelā mo te masima tonu telā e tausi leva ei a mea, e penā foki te malosi o ana soko ki luga i tino, e puipui ei latou mai i fakamaseiga i te feitu faka-te-agaga mo mea tau amioga. Nei la, ko pilipili ki te fakaotiga o tena galuega, ne fai mai a ia: “E mautinoa eiloa me e ‵lei te masima. Kae kafai e galo te malosi o tena ‵kona, se a la te mea e mafai o toe faka‵kona ki ei?” (Luka 14:34) Ne iloa ne ana tino fakalogo‵logo me e isi ne masima i te vaitaimi tenā, ne seki ‵ma kae palu tasi mo mea i te laukele telā e se aoga malosi.

Tela la, ne fakaasi mai ne Iesu me e se ‵tau mo latou kolā ko leva ne fai mo fai ana soko, o fakavāi‵vai. Kafai e tupu te mea tenā, ka se aoga ei latou, e pelā mo te masima telā e galo atu tena malosi. E mafai o fakatauemu atu te lalolagi ki a latou. E sili atu i ei, ka se talia foki latou ne te Atua, kae ka taku fakamaseigina tena igoa. Ne faka‵mafa mai ne Iesu a te tāua ke ‵teke atu ki te ikuga tenā, i ana pati konei: “A te tino telā e isi ne ana taliga, ke na fakalogo la ki ei.”—Luka 14:35.