Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 95

Ne Akoako Atu e Uiga ki te ‵Talaga o Avaga mo te Alofa ki Tama‵liki

Ne Akoako Atu e Uiga ki te ‵Talaga o Avaga mo te Alofa ki Tama‵liki

MATAIO 19:1-15 MALEKO 10:1-16 LUKA 18:15-17

  • NE FAKAASI ATU NE IESU TE KILOKILOGA A TE ATUA KI TE ‵TALAGA O AVAGA

  • TE MEAALOFA KO TE NOFO TAKA

  • KE FAI PELĀ MO TAMALIKI FO‵LIKI

Ne olo atu a Iesu mo ana soko mai Kalilaia ki te suā feitu o te Vaitafe o Iolitana kae ne ui atu latou i te feitu ki saute ki te fenua ko Pelea. I te taimi fakamuli ne nofo atu ei a Iesu i Pelea, ne fai atu ne ia ki te kau Falesaio a te tulaga o te Atua e uiga ki te ‵talaga o avaga. (Luka 16:18) Nei la, ko avaka ne latou te mataupu tenā ke tofotofo aka ei a Iesu.

Ne tusi mai a Mose me e mafai o ‵tala te avaga ne se tagata māfai “e isi se mea ko se fiafia ei a ia ki te fafine tenā.” (Teutelonome 24:1) E kese‵kese a kilokiloga ki mea e mafai ei o ‵tala te avaga. E tali‵tonu a nisi tino me e aofia foki i ei a tamā mea fo‵liki. Tela la, ne fesili atu te kau Falesaio: “E mata, e saoloto i te tulafono ke ‵tala ne se tagata tena avaga i so se pogai?”—Mataio 19:3.

I lō te talia ne ia te kilokiloga a tino, ne fakasino atu eiloa mo te atamai a Iesu ki te Mafuaga o te fakaipoipoga. “E a, e seki fai‵tau koutou e uiga ki a ia telā ne faite ne ia a tino i te kamataga, ne faite ne ia te tagata mo te fafine kae fai atu: ‘Tenei te pogai e tiaki ei ne te tagata tena tamana mo tena mātua kae ‵nofo fakatasi mo tena avaga kae ka fai ei lāua mo fai se foitino e tasi’? Tela la, ko se tokolua a lāua kae ko fai lāua mo foitino e tasi. Tela la, a lāua kolā ko oti ne fakatasi ne te Atua e se mafai o ‵tala ne se tino.” (Mataio 19:4-6) I te taimi ne fai ne te Atua te avaga a Atamu mo Eva, ne seki fai ne ia a fakatokaga ke fakagata ei te lā avaga.

Ne kinau atu a te kau Falesaio ki a Iesu: “Kaia la ne fakatonu atu ei a Mose ke tuku atu ne te tagata se pepa fakamaoni ke ‵tala ei te avaga?” (Mataio 19:7) Ne fai atu a Iesu ki a latou: “Ona ko te otou loto ma‵keke, ne fai ei ne Mose te fakatokaga ke mafai o ‵tala otou avaga, kae e se tenā eiloa te faiga i te kamataga.” (Mataio 19:8) A te “kamataga” tenā e se ko aso o Mose; ko te taimi telā ne kamata ei ne te Atua te fakaipoipoga i Etena.

Ne toe fai atu ei ne Iesu se munatonu tāua: “Au e fai atu ki a koutou, so se tagata e ‵tala tena avaga kae seki aofia i amioga fakatauavaga sē ‵tau [mai te ‵gana Eleni, por·neiʹa], e mulilua eiloa māfai e toe avaga ki se isi fafine.” (Mataio 19:9) Tela la, a te pogai faka-te-Tusi Tapu fua e tasi ke ‵tala te avaga, ko te aofia i amioga fakatauavaga sē ‵tau.

Ne fakaosofia te kau soko ke fai atu: “Kafai tenā loa te tulaga i te va o te tagata mo tena avaga, e sē se mea ‵lei ke avaga.” (Mataio 19:10) E manino ‵lei, me i te tino telā e fia avaga e ‵tau o mafaufau faka‵lei me i te fakaipoipoga e ‵tau o fakatumau!

Ne toe faipati foki a Iesu e uiga ki te nofo taka, kae ne fakamatala mai ne ia me ne fa‵nau mai a nisi tino e pelā me ne eunuka, kolā e se mafai o aofia i faifaiga fakatauavaga. Ne fai a nisi tino mo fai ne eunuka, me ne ‵pena latou. Kae ko nisi tino e fa‵ki olotou manakoga fakatauavaga. E fai eiloa latou penā ko te mea ke ‵saga katoatoa atu ki mea e uiga ki te Malo. “So se tino e talia ne ia ke se avaga a ia [ke nofo taka], ke na fai eiloa penā,” ko pati fakamalosi a Iesu ki ana tino fakalogo‵logo.—Mataio 19:12.

Ne kamata o avatu ne tino olotou tamaliki fo‵liki ki a Iesu. Kae ne ‵liko atu a soko ki tino, kāti ko te taumafaiga ke se fakalavelave atu ki a Iesu. I te laveaga ne Iesu a te mea tenei, ne seki fiafia tou tagata kae fai atu ki a latou: “Tuku a tama‵liki ke ‵mai ki a au, kae sa taumafai o taofi latou, me i o tino penā a te Malo o te Atua. Au e fai ‵tonu atu ki a koutou, so se tino e se talia ne ia te Malo o te Atua e pelā me se tamaliki ka se mafai eiloa o ulu atu ki loto i ei.”—Maleko 10:14, 15; Luka 18:15.

Ko tafaga la te gali o te akoakoga tenā! E ‵tau mo tatou o loto maulalo kae akoakogofie, e pelā mo tama‵liki fo‵liki. Ne fakaasi atu ei ne Iesu tena loto alofa ki tamaliki fo‵liki me ne kopi mai ne ia ki ana lima kae fakamanuia atu foki ki a latou. Kae e penā foki eiloa tena alofa ki so se tino telā e “talia ne ia te Malo o te Atua e pelā me se tamaliki.”—Luka 18:17.