Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 127

Ne Fai Tena Fono ne te Sanetulini, Kae Toe Avatu ki a Pilato

Ne Fai Tena Fono ne te Sanetulini, Kae Toe Avatu ki a Pilato

MATAIO 27:1-11 MALEKO 15:1 LUKA 22:66–23:3 IOANE 18:28-35

  • TE FAIGA O TE FONO I TE VAVEAO I MUA O TE SANETULINI

  • KO TAUMAFAI A IUTA TE ISIKALIOTA O NOUA

  • NE AVATU A IESU KI A PILATO KE FAKASALA

Ko pili o teka atu te po tenā i te taimi ne fakafiti ei ne Petelu a Iesu i te tolu o taimi. Ko oti ne fai ne sui o te Sanetulini te lotou fono sē ‵tau kae olo atu keatea. Ne oko atu ki te vaveao o te Aso Lima, ne toe faka‵soko atu te lotou fono, kāti ke taumafai o fakafoliga atu me ne talia loa i te tulafono a te faiga o te fono i te po. Ne avatu a Iesu ki mua o latou.

Ne toe fakatonu atu te fono: “Kafai koe ko te Keliso, taku mai ki a matou.” Ne tali atu Iesu: “Kafai e fai atu ne au ki a koutou, e se tali‵tonu eiloa koutou ki ei. E se gata i ei, kafai e fesili atu au ki a koutou, e se tali mai eiloa koutou.” Kae ne fakaasi atu mo te loto malosi ne Iesu me ko oi a ia e pelā mo te mea ne ‵valo mai i te Tanielu 7:13. E fai mai a ia: “Mai te taimi tenei o fano ki mua, ka sagasaga eiloa te Tama a te tagata i te feitu fakaatamai o te Atua malosi.”—Luka 22:67-69; Mataio 26:63.

Ne tumau eiloa latou i te fai atu: “Ko tena uiga, a koe ko te Tama a te Atua?” Ne tali atu Iesu: “Tenā eiloa e fai mai ne koutou me ko au.” Ne fakamautinoa atu ne te mea tenei ki a latou me ko ‵tau eiloa o tamate a Iesu ona ko te pati masei. Ne fesili mai latou: “Kaia e toe ‵sala ei tatou ki nisi molimau?” (Luka 22:70, 71; Maleko 14:64) Tela la, ne saisai ne latou a Iesu kae ‵taki atu ki te Kovana Loma ko Ponitio Pilato.

Kāti e lavea ne Iuta te Isikaliota a te avatuga o Iesu ki a Pilato. I te taimi ne iloa ei ne Iuta me ko oti ne fakasala a Iesu, ne fanoanoa kae mafatia malosi a ia. Kae i lō te ‵fuli atu ki te Atua mo te loto salamō tonu, ne fanatu a ia o faka‵foki a tupe siliva e 30. Ne fai atu a ia ki faitaulaga pule: “Au ko agasala i te faiga o te togafiti masei ki se tino e seai sena mea ‵se ne fai.” Kae ne tali atu latou mo te sē a‵lofa: “Se a te motou fekau i te mea tenā? Faitalia atu eiloa koe!”—Mataio 27:4.

Ne ‵pei atu ne Iuta a tupe siliva e 30 ki loto i te faletapu, kae ne toe fai foki ne ia a te suā mea ‵se mai te taumafai o fakamate. I te taimi ne noua ei a Iuta, e foliga mai me ne fati a te kaula telā ne tautau i ei a te lopu. Ne tō ifo tena foitino ki luga i kaupapa mai lalo, telā ne mapā ei tena tinae.—Galuega 1:17, 18.

Koi tafataeao ‵malu eiloa i te taimi ne avatu ei a  Iesu ki te palesi o Ponitio Pilato. Kae ne ita fitifiti a te kau Iutaia i konā ke ulu atu ki ei. Ne mafau‵fau latou me ka lai‵lai latou māfai e fesokotaki atu latou penā ki tino mai Fenua Fakaa‵tea. Ko se mafai ei ne latou o ‵kai i te ‵kaiga i a Nisani 15, te aso muamua o te ‵Kaiga o Falaoa sē Faka‵fete, telā ne ‵kilo atu ki ei e pelā me se vaega o te vaitaimi o te Paseka.

Ne fanatu a Pilato ki tua kae fesili atu: “Ne a otou ‵losiga e uiga ki te tagata tenei?” Ne tali atu latou: “Moi fai a te tagata tenei e sē se tino fai mea ‵se, penei e se aumai ne matou a ia ki a koe.” Kāti ne mafaufau a Pilato me ko faimālō ne latou a ia, telā ne fai atu ei a ia: “Ave la kae fakamasino ne koutou e ‵tusa mo te otou tulafono.” Ne fakaasi atu ei ne te kau Iutaia te lotou manakoga tatino, mai te tali atu: “E se saoloto i te tulafono ke tamate ne matou se tino.”—Ioane 18:29-31.

A te ‵tonuga loa, kafai e tamate ne latou a Iesu i te ‵kaiga o te Paseka, e mafai eiloa o tupu se kinauga lasi. Kae kafai e mafai o fai ne latou ke tamate ne te kau Loma a Iesu ona ko pogai fakapolitiki, telā e saoloto a te kau Loma ke fai ne latou, e mafai ei o saoloto a te kau Iutaia i mua o tino mai te ‵losi atu ki a latou.

Ne seki fai atu ne takitaki lotu ki a Pilato me ko oti ne fakasala ne latou a Iesu ona ko te pati masei. Nei la, ko faite aka foki ne latou se isi ‵losiga ‵kese: “Ne maua ne matou te tagata tenei [1] e takitaki ‵se ne ia te motou fenua [2] kae fakatapu ne ia te ‵togiga o lafoga ki a Kaisala [3] kae fai mai foki i a ia ko te Keliso, te tupu.”—Luka 23:2.

E pelā me ko te sui o Loma, ne isi eiloa se pogai ‵lei ke manavase a Pilato ki te ‵losiga me ne fai atu a Iesu i a ia se tupu. Tela la, ne toe ulu atu a ia ki loto i te palesi, kalaga atu ki a Iesu ke fanatu ki a ia, kae fesili atu: “A koe ko te Tupu o tino Iutaia?” I nisi tugapati, ‘Kai soli aka eiloa ne koe te tulafono a te fenua mai te folafolaatuga i a koe ko te tupu kae ‵teke atu koe ki te Kaisala?’ Kāti ne taumafai tou tagata ke iloa aka me e pefea te uke o mea ne lagona ne Pilato e uiga ki a ia, telā ne fesili atu ei a Iesu: “E mata, i a koe eiloa a pati konā e fai mai, io me e isi ne tino ne fai atu ki a koe e uiga ki a au?”—Ioane 18:33, 34.

Mai te fakafoliga atu me e se iloa ne ia a fakamatalaga ‵tonu e uiga ki a Iesu kae e manako a ia ke iloa ne ia, ne tali atu a Pilato: “E a, au se tino Iutaia?” Ne toe fai atu a ia: “A koe ne aumai ne tou fenua tonu mo faitaulaga pule ki a au. Ne a au mea ne fai?”—Ioane 18:35.

Ne seki taumafai a Iesu o fakaseke mo te mataupu fakavae—ko te tulaga fakatupu. Ne tali atu a ia i se auala telā e mautinoa ‵lei me ne ofo malosi a te Kovana ko Pilato.