Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 110

Te ‵Toe Aso o Iesu i te Faletapu

Te ‵Toe Aso o Iesu i te Faletapu

MATAIO 23:25–24:2 MALEKO 12:41–13:2 LUKA 21:1-6

  • NE TOE TAKU FAKAMASEI NE IESU A TAKITAKI LOTU

  • KA FAKASEAI ATU TE FALETAPU

  • NE TUKU FAKAMEAALOFA ATU NE SE FAFINE MATIVA KO MATE TENA AVAGA A TUPE FO‵LIKI E LUA

I te ‵toe taimi o Iesu i te faletapu, ne tumau eiloa a Iesu i te fakaasi faka‵sau atu o amioga ‵pelo a failautusi mo Falesaio, mai i te taku ne ia o latou ki tino ‵loi. Ne fakaaoga ne ia a te ‵gana fakatusa, ana muna: “E ‵fulu ne koutou te tua o te ipu mo te tifa, kae i loto i ei e ‵fonu i te kaimanako mo te manako lasi. Falesaio ‵kivi, ‵fulu muamua te koga i loto o te ipu mo te tifa, ko te mea ke mafai foki o ‵ma i tua.” (Mataio 23:25, 26) E tiga eiloa ne faka‵mafa malosi mai ne latou a te ‵ma i feitu tau tapuakiga mo foliga i tua, ne seki fia ‵saga atu latou ki te tino i loto kae fakata‵mala o faka‵ma olotou loto.

E fakaasi mai foki te lotou ‵loi i te lotou fia‵fia ke faite kae fakagali‵gali a tanuga mō pelofeta. Kae ne fai a Iesu me i a latou ko “tama a latou kolā ne tamate ne latou a pelofeta.” (Mataio 23:31) E fakamaoni mai eiloa te mea tenei i olotou taumafaiga ke tamate a Iesu.—Ioane 5:18; 7:1, 25.

Ne toe fakasino atu a Iesu ki mea kolā e faka‵tali mai mō takitaki lotu konei māfai e se sala‵mo latou: “A koutou ne gata, ko tama a gata ‵poisini, e mafai pefea o ‵sao koutou mai te fakasalaga i Kena?” (Mataio 23:33) Ne fakaaoga sāle a te Vanu o Hinomo telā e tu pili mai mo ‵sunu a kaiga, se ata o te fakaseaiga tumau mō failautusi mo Falesaio ma‵sei.

Ka sui ne soko o Iesu a ia e pelā me ne “pelofeta mo tāgata ‵poto mo faiakoga o tino katoa.” Ka pefea a faifaiga ki a latou? Ne fai atu a Iesu ki takitaki lotu: “Ka tamate kae ‵tuki ne koutou a nisi [o oku soko] i lakau, kae ko nisi ka ‵ta fakamasei ne koutou i loto i otou sunako kae fakasaua atu ki a latou mai te fa‵kai e tasi ki te suā fa‵kai, ko te mea ke i luga i a koutou a toto o tino amio‵tonu katoa kolā ne ma‵ligi i luga i te lalolagi, mai te toto o te tino amiotonu ko Apelu ki te toto o Sakalia . . . telā ne tamate ne koutou.” Ne toe fakailoa atu a ia ke fakaeteete: “Au e fai tonu atu ki a koutou, a mea katoa konei ka oko mai eiloa ki luga i te kautama tenei.” (Mataio 23:34-36) Tenā loa te mea ne tupu i te 70 T.A. i te taimi ne fakamaofa ei ne kautau Loma a Ielusalema kae ne ‵mate i ei a te fia afe o tino Iutaia.

Ne fanoanoa a Iesu i te mafaufau atu ki te tulaga fakamataku tenei. Ne fai atu a ia mo te fanoanoa: “Ielusalema, Ielusalema, ne tamate ne koe a pelofeta kae peipei ki fatu a tino kolā ne uga atu ki a koe. Ko oko eiloa i te uke o taimi ne manako ei au o fakamaopoopo mai au tama‵liki e pelā me se moa fafine e fakamaopoopo ne ia ana punua moa mai lalo i ana kapakau! Kae ne seki ma‵nako koutou ki ei. Kiloke! A koutou ka afuli keatea mai te otou fale.” (Mataio 23:37, 38) Kāti ne fia iloa ne tino kolā ne lagona ne latou ana pati me se a te “fale” ne fakauiga a ia ki ei. E mata, ne fakasino atu eiloa a ia ki te faletapu gali telā ne tu atu i Ielusalema, telā e foliga atu me ne puipui ne te Atua?

Ne toe fai atu a Iesu: “Me e fai atu au ki a koutou, ka se toe lavea ne koutou au mai te taimi nei ke oko ki te taimi ka fai aka ei koutou penei, ‘Ke manuia a te tino telā e vau i te igoa o Ieova!’” (Mataio 23:39) Ne siki atu ne ia a pati fakapelofeta i te Salamo 118:26: “Fakamanuia atu ki a ia tena e vau i te igoa o te Aliki; mai te Faletapu o te Aliki, e fakamanuia atu ei matou ki a koutou.” E manino ‵lei i ei, me kafai ko oti ne fakaseai atu a te faletapu faka-te-foitino tenei, ka se toe ai se tino e fanatu ki ei i te igoa o te Atua.

Ne fanatu a Iesu ki te koga telā e ‵tu i ei a pusa tupe i te faletapu. Ne mafai o tuku ne tino olotou meaalofa tupe i tamā pūga mai luga. Ne lavea ne Iesu a tino Iutaia kese‵kese e fai penā, ko tino mau‵mea “ne lafo ne latou a tupe siliva e uke” e pelā me ne meaalofa. Kae ne lavea ne Iesu se fafine mativa ko mate tena avaga telā ne tuku atu ne ia ki loto “a tupe fo‵liki e lua kolā e se taulia malosi.” (Maleko 12:41, 42) Ne mautinoa eiloa i a Iesu me ne fiafia a te Atua ki tena meaalofa.

Ne kalaga atu a Iesu ki ana soko kae fai atu: “Au e fai tonu atu ki a koutou, me e uke atu a tupe ne lafo ne te fafine mativa tenei ko mate tena avaga i lō tupe a tino katoa kolā ne lafo ki loto i pusa tupe.”  E mafai pefea o fai penā? Ne fakamatala atu ne ia: “Me ne lafo ne latou katoa konā mai i olotou tupe silia, kae ko te fafine tenā ne lafo atu ana mea katoa eiloa e ola ei a ia.” (Maleko 12:43, 44) Ne ‵kese malosi eiloa tou fafine i ana mafaufauga mo faifaiga mai i takitaki lotu!

I te gasoloatuga ki mua o te aso i a Nisani 11, ne tiakina ne Iesu a te faletapu mō te ‵toe taimi. Ne fai atu se tokotasi o ana soko: “Te Faiakoga, onoono aka la ki te ‵gali o fatu mo fale konei!” (Maleko 13:1) E tonu, me ne ‵lasi eiloa a nisi fatu konā, telā ne fai ke mafau‵fau me e malosi kae ‵mautakitaki a te fale. Kae ne fai fakaa‵tea eiloa a pati konei a Iesu ki a latou: “E lavea ne koe te ‵lasi o fale konei? Ka seai se fatu ka ‵toe i luga i te suā fatu kae e se ‵pei ki lalo.”—Maleko 13:2.

I te otiga o ana pati konei, ne olo atu ei a Iesu mo ana soko ki te suā feitu i te Vanu ko Ketalono kae ‵kake aka ki se koga i luga i te Mauga o Olive. I konā, ne ‵nofo atu ei a ia mo apositolo e tokofa—ko Petelu, Anitelea, Iakopo, mo Ioane. Mai konā, ne mafai ei ne latou o ‵kilo atu ki lalo i te faletapu mata ‵malu tenā.