Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 137

Ne Lavea a Ia ne te Fia Selau o Tino Mai Mua o te Penitekoso

Ne Lavea a Ia ne te Fia Selau o Tino Mai Mua o te Penitekoso

MATAIO 28:16-20 LUKA 24:50-52 GALUEGA 1:1-12; 2:1-4

  • NE FAKASAE ATU A IESU KI TINO E TOKOUKE

  • KO FANAKA A IA KI TE LAGI

  • NE LIGI ATU NE IESU TE AGAGA TAPU KI SOKO E TOKO 120

Mai tua o te toetuga o Iesu, ne fakatoka ne ia ke fetaui latou mo ana apositolo e toko 11 i se mauga i Kalilaia. Ne ‵nofo atu foki i konā a nisi soko, kāti se toko 500 o latou, telā ne aofia i ei a nisi tino kolā ne fakalotolotolua muamua. (Mataio 28:17; 1 Kolinito 15:6) Kae ne fesoasoani atu a pati kolā ko fai atu nei ne Iesu ke fakatalitonu atu ki tino taki tokotasi me i a ia ko ola tonu eiloa.

Ne fakamatala atu ne Iesu me ne tuku atu ne te Atua te pule i mea katoa i te lagi mo te lalolagi: Ne fakamalosi atu ei a Iesu ki a latou: “Tela la, olo atu koutou ki fenua katoa o fai a tino i ei mo fai a soko, kae papatiso atu latou i te igoa o te Tamana mo te Tama mo te agaga tapu, akoako atu latou ke faka‵logo ki mea katoa ne fakatonu atu ne au ki a koutou.” (Mataio 28:18-20) Ao, e se gata fua i te ola mai o Iesu kae koi manako eiloa a ia ke talai atu te tala ‵lei.

A soko katoa o Iesu—tāgata, fāfine, mo tama‵liki—ne maua katoa ne latou a te fakatonuga tenei ke fai a soko. Kāti e taumafai a tino ‵teke o taofi te lotou galuega talai mo te akoakoatuga, kae ne fakatalitonu atu a Iesu ki a latou: “Ko oti ne tuku mai ki a au a te pule i mea katoa i te lagi mo te lalolagi.” Se a la te aoga o te mea tenā ki ana soko? Ne fai atu a ia ki a latou: “Kae kiloke! Au e fakatasi faeloa mo koutou i aso katoa ke oko eiloa ki te gataga o te olaga tenei.” Ne seki fai atu a Iesu me i tino katoa kolā e ‵kau atu ki te talaiatuga o te tala ‵lei ka mafai o fai ne latou a galuega fakaofoofogia. Kae ka fesoasoani atu eiloa te agaga tapu ki a latou.

A taimi katoa ne fakasae atu ei a Iesu ki ana soko mai tua o tena toetuga e ‵tusa mo “aso e 40.” Ne fakaaoga ne ia a foitino kese‵kese kae “fakaasi atu ne ia a ia eiloa ki a latou konei, e auala i fakamaoniga mautinoa e uke i a ia ko toe ola mai,” kae akoako atu latou “e uiga ki te Malo o te Atua.”—Galuega 1:3; 1 Kolinito 15:7.

E manino ‵lei me i te taimi koi ‵nofo atu ei a te kau apositolo i Kalilaia, ne fakatonu ne Iesu latou ke toe ‵foki atu ki Ielusalema. I te taimi ne maopoopo ei latou i te fa‵kai, ne fai atu a ia: “Sa tiaki ne koutou a Ielusalema, kae ‵nofo fakatali‵tali faeloa ki te mea telā ne folafola mai ne te Tamana, kae ne lagona ne koutou mai i a au; me ne papatiso eiloa a Ioane ki te vai, kae se leva nei ka papatiso eiloa koutou ki te agaga tapu.”—Galuega 1:4, 5.

Fakamuli ifo, ne toe maopoopo a Iesu mo ana apositolo. Ne ‵taki atu ne ia “latou ke oko ki Petania,” telā e tu i te sifoga o te Mauga o Olive i te feitu ki saegala. (Luka 24:50) Faitalia a mea katoa ne fai atu ne Iesu ki a latou e uiga ki te taimi ka fano keatea ei a ia, koi tali‵tonu eiloa latou me ka fakatu tena Malo i te lalolagi.—Luka 22:16, 18, 30; Ioane 14:2, 3.

Ne fesili atu te kau apositolo ki a Iesu: “Te Aliki, e a, ka toe fakatu aka ne koe a te Malo o Isalaelu i te taimi tenei?” Ne tali atu fua a ia: “E se ‵tau o iloa ne koutou a taimi mo tau o aso kolā ko oti ne fakatoka ne te Tamana i tena pule eiloa.” Ne toe faka‵mafa atu ei ne ia a te galuega e ‵tau o fai ne latou, ana muna: “Ka maua ne koutou a te ‵mana māfai e oko atu te agaga tapu ki luga i a koutou, kae ka fai koutou mo molimau ki a au i Ielusalema, i Iuta kātoa mo Samalia, ke oko eiloa ki toe koga ‵mao i te lalolagi.”—Galuega 1:6-8.

Ne ‵nofo atu a te kau apositolo i luga i te Mauga o Olive fakatasi mo Iesu telā ne toetu, i te taimi ne kamata ei o masagi aka a ia ki luga i te lagi. E seki leva kae ne ‵pono ne te kaumana a ia mai i olotou mata. Mai tua o tena toetuga, ne fakaaoga sāle ne Iesu a foitino faka-te-foitino. Kae nei la, ne tiakina ne Iesu te foitino telā ne fakaaoga ne ia i te taimi tenei, kae ne fanaka a ia ki te lagi e pelā me se tino faka-te-agaga. (1 Kolinito 15:44, 50; 1 Petelu 3:18) I te taimi ne kilo‵kilo atu ei a apositolo fakamaoni ki a ia, ne faka‵sae atu i olotou tafa “a tāgata e tokolua e ‵pei ki gatu ‵kena.” A lāua konei ne agelu foki ne ‵fuli ki foitino faka-te-tagata, kolā ne fesili atu: “Tāgata Kalilaia, kaia e ‵tu ei koutou kae kilo‵kilo ki te lagi? A Iesu telā ne avaka mai i a koutou ki luga i te lagi ka toe  foki mai i te auala eiloa telā ne lavea ne koutou e fanaka ei a ia ki te lagi.”—Galuega 1:10, 11.

vNe tiakina ne Iesu te lalolagi e aunoa mo ne faifaiga fakaaloalo mai tino, ko ana soko fakamaoni fua ne lavea ne latou. Ka toe foki mai eiloa a ia “i te auala eiloa” tenā—e aunoa mo ne faifaiga fakaaloalo mai tino, kae na ko soko fakamaoni fua e iloa ne latou tena fakatasi mai i te malosi o te Malo.

Ne toe ‵foki atu a te kau apositolo ki Ielusalema. I aso mai tua ifo, ne maopoopo a te kau soko, e aofia i ei a “Malia te matua o Iesu mo . . . taina . . . o Iesu.” (Galuega 1:14) Ne tumau eiloa te potukau tenei i te ‵talo. A te mataupu e tasi e ‵talo atu latou ki ei ko te filifiliga o se soko ke sui ei a Iuta te Isikaliota ke maua te aofaki tonu o te kau apositolo e toko 12. (Mataio 19:28) Ne ma‵nako latou ki se soko telā ne molimau ne ia a galuega mo te toetuga o Iesu. E pelā mo mea ne taku mai i te Tusi Tapu, ne fai a te vili ke iloa tonu aka ei te loto o te Atua. (Salamo 109:8; Faataoto 16:33) A Matatia, telā kāti ne aofia i te toko 70 kolā ne uga atu ne Iesu, ne filifili kae ne fakatasi a ia “mo te toko 11 apositolo.”—Galuega 1:26.

I te sefulu o aso mai tua o te fanakaga a Iesu ki te lagi, ne fai ei te ‵Kaiga Fakamanatu a te kau Iutaia ko te Penetekoso i te 33 T.A. E nofo loa ki te toko 120 o soko ne maopoopo i se potu tafa ki luga i Ielusalema. Ne oko fakapoi atu a te ‵gulu e pelā me se āfa kae ne ‵fonu ei a te fale kātoa. Ne lavea atu a kalokaloafi e pelā me ne alelo i luga o ulu o tino taki tokotasi kolā ne ‵nofo atu i konā. Ne kamata o fai‵pati a soko i ‵gana kese‵kese. Tenei eiloa te taimi ne ‵ligi ifo ei a te agaga tapu telā ne folafola atu ne Iesu!—Ioane 14:26.