Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 129

Ne Fai Atu a Pilato: “Kiloke! Tenei te Tagata!”

Ne Fai Atu a Pilato: “Kiloke! Tenei te Tagata!”

MATAIO 27:15-17, 20-30 MALEKO 15:6-19 LUKA 23:18-25 IOANE 18:39–19:5

  • NE TAUMAFAI A PILATO O FAKASAOLOTO A IESU

  • NE MA‵NAKO A TE KAU IUTAIA KE FAKASAOALOTO A PALAPA

  • NE FAKATAUEMU KAE TA FAKAMASEI A IESU

Ne fai atu a Pilato ki te vaitino kolā ne ma‵nako ke tamate a Iesu: “Ko oti ne sukesuke ne au . . . kae e seai eiloa sena ‵se i agasala katoa kolā ne ‵losi atu ne koutou ki a ia. E penā foki a Helota.” (Luka 23:14, 15) Nei la, i ana taumafaiga ke fakasaoloto a Iesu, ne fakaaoga ne Pilato a te suā auala, mai te fai atu ki tino: “E isi se tu a koutou ke fakasaoloto atu ne au se tagata ki a koutou i te taimi o te Paseka. Tela la, e ma‵nako koutou ke ‵tala atu ne au ki a koutou a te Tupu o tino Iutaia?”—Ioane 18:39.

Ne iloa ne Pilato se pagota e igoa ki a Palapa, telā ne lauiloa e pelā me se tino kaisoa, se tino ‵teke, kae tatino. Tela la, ne fesili atu a Pilato: “Ko oi te tino e ma‵nako koutou ke ‵tala atu ne au ki a koutou, ko Palapa io me ko Iesu telā e fakaigoa ki a Keliso?” Ona ko fakamalosiga a faitaulaga pule, ne fai atu a tino ke fakasaoloto a Palapa, kae e se ko Iesu. Ne toe fesili atu a Pilato: “Ko oi i a lāua konei e ma‵nako koutou ke ‵tala atu ne au ki a koutou?” Ne paka‵laga atu a te vaitino: “Ko Palapa”!—Mataio 27:17, 21.

Ne toe fesili atu ei a Pilato mo te fanoanoa: “Ne a la aku mea ka fai ki a Iesu telā e fakaigoa ki a Keliso?” Ne fai atu a tino mo te kaitaua: “‵Tuki atu a ia ki te lakau!” (Mataio 27:22) Ne masiasi eiloa latou me ne ma‵nako ke tamate se tino ‵lei. Ne fakamolemole atu a Pilato: “Kaia? Se a te mea masei ne fai ne te tagata tenei? E seai se mea ne maua ne au e ‵tau ei o tamate a ia; tela la, ka fakasala ne au a ia ko ‵tala atu ei.”—Luka 23:22.

Faitalia eiloa a taumafaiga a Pilato, ne ka‵laga fakatasi atu a te vaitino mo te ita “‵Tuki atu a ia ki te lakau!” (Mataio 27:23) Ko oti eiloa ne fakamalosi ne takitaki lotu a te vaitino ke ma‵nako eiloa ki toto! Kae e se ko toto o tino solitulafono, io me se tino tatino. Ko te toto eiloa o te tagata ‵lei telā ne taliagina i Ielusalema e pelā me ko te Tupu i te lima o aso ko ‵teka atu. Kafai ne ‵nofo atu i konā a soko o Iesu, ne ‵nofo filemu kae ne fakaeteete eiloa latou.

Ne lavea ne Pilato me e seai eiloa se aoga o tena manakoga. Ne gasolo aka eiloa ki luga a te kaitaua o tino, telā ne puke mai ne ia a vai i se pola kae ‵fulu ana lima i mua o te vaitino. Ne fai atu a ia ki a latou: “Au e ‵ma i toto o te tagata tenei. Faitalia atu koutou.” Kae ne seki ‵fuli eiloa te kilokiloga a tino e uiga ki ei. I lō te fai penā, ne fai atu latou: “Ke i luga i a matou mo omotou tama‵liki ana toto.”—Mataio 27:24, 25.

Ne manako fua te kovana o fakamalie atu ki a latou i lō tena manakoga ke fai a te mea tonu. Tela la, e ‵tusa mo te lotou manakoga, ne fakasaoloto ne Pilato a Palapa ki te potukau tenā. Ne fai ei a ia ke tapale a gatu o Iesu kae fakasaua atu ki a ia.

 Mai tua o te ‵kiniga fakamasei ne latou, ne ave ne sotia a Iesu ki te palesi o te kovana. Ne maopoopo i konā a te potukau sotia kae ne toe fai fakamasei ne latou a ia. Ne ‵fili ne latou se kalauna ki mea makai‵kai kae fakafou mālō atu ne latou ki tena ulu. Ne tuku atu foki ne sotia se tokotoko ki te lima fakaatamai o Iesu kae fakapei atu a ia ki se gatu lanu ‵kula, ko gatu kolā e ‵pei ki ei a tupu. Ne fakatauemu atu latou: “Talofa, te Tupu o tino Iutaia!” (Mataio 27:28, 29) I tafa i ei, ne popoki atu latou ki a Iesu kae ‵pa faeloa ne latou ana mata. Ne puke mai ne latou a te tokotoko malosi mai i tou tagata, kae ‵pago ne latou tena ulu ki ei, telā ne ‵galo loa ki loto i tena ulu a mea makai‵kai i tena “kalauna” fakamasiasi.

A te ‵malu mo te malosi fakaofoofogia o Iesu i mea katoa ne fai ei ke ofo malosi a Pilato telā ne toe taumafai ei a ia o toe fakamatala faka‵lei atu tena kilokiloga, i ana muna: “Kiloke! Ko aumai ne au a ia ki tua i a koutou ko te mea ke iloa ne koutou me seai se mea ‵se ne maua ne au i a ia.” E mata, ne mafaufau a Pilato me i te avatuga o Iesu ki tua, ko uliuli kae to‵toto valevale, ka fai ei a te vaitino ke a‵lofa ki tou tagata? I te ‵tuatuga o Iesu i mua o te potukau sē loto a‵lofa, ne folafola atu a Pilato: “Kiloke! Tenei te tagata!”—Ioane 19:4, 5.

E tiga eiloa ne ta fakamasei kae pakiakia a Iesu, ne fakaasi atu eiloa ne ia se uiga ‵malu kae filemu telā ne ‵tau foki o lavea ne Pilato, me ne fakaasi atu eiloa i ana pati a te āva mo te loto alofa.