Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

 MATAUPU E 134

Seai se Foitino i te Tanuga​—Me ko Toe Ola Mai Iesu!

Seai se Foitino i te Tanuga​—Me ko Toe Ola Mai Iesu!

MATAIO 28:3-15 MALEKO 16:5-8 LUKA 24:4-12 IOANE 20:2-18

  • KO TOETU A IESU

  • MEA NE ‵TUPU I TE TANUGA O IESU

  • NE FAKASAE ATU A IA KI FĀFINE KESE‵KESE

Ko oko eiloa i te fakapoi ki fāfine konei ke lavea atu me e seai eiloa se foitino i loto i te tanuga! Ne tele atu a Malia te Makatala “ki a Simona Petelu mo te suā soko telā ne alofa malosi a Iesu ki ei”—ko te apositolo ko Ioane. (Ioane 20:2) Kae ne lavea ne nisi fāfine i te tanuga se agelu. Kae ne nofo atu foki a te suā agelu i loto i te tanuga, telā “e pei ki gatu ‵kena.”—Maleko 16:5.

Ne fai atu se agelu e tokotasi ki a latou: “Sa ma‵taku, e iloa ne au i a koulua e salasala ki a Iesu telā ne tamate i luga i te lakau. E galo a ia i konei, me ko oti ne toe fakatu aka, e pelā eiloa mo ana muna. ‵Mai o onoono ki te koga ne takato ei a ia. Ka oti, olo fakavave o fakailoa ki ana soko me ko oti ne fakatu aka a ia mai te mate, kae kiloke! ko mua atu a ia i a koutou ki Kalilaia.” (Mataio 28:5-7) Tela la, “ko oko eiloa i te lotou pole‵pole kae ma‵taku,” telā ne ‵tele atu ei a fāfine o lipoti ki te kau soko.—Maleko 16:8.

Nei la, ko oti ne maua ne Malia a Petelu mo Ioane. Ne fai atu eiloa tou fafine mo te gaegae: “Ko oti ne ave keatea ne latou te Aliki mai te tanuga, kae e se iloa ne tatou te koga ne tuku ei ne latou a ia.” (Ioane 20:2) Ne ‵tele atu ei a Petelu mo Ioane. Ne makini atu a Ioane kae ne oko muamua a ia ki te tanuga. Ne onoono atu a ia ki loto kae ne lavea ne ia a peniteti, kae ne tu atu eiloa tou tagata mai tua.

I te okoatuga o Petelu, ne fanatu eiloa a ia ki loto. Ne lavea ne ia a laugatu lino mo laugatu kolā ne fakaaoga ke pulou ki ei te ulu o Iesu. Ne ulu atu a Ioane ki loto, kae ne talitonu a ia ki te tala a Malia. Faitalia a pati ne fai atu mua ne Iesu, e seai eiloa se tino i a latou ne malamalama me ko oti ne toe fakatu aka a ia. (Mataio 16:21) Ne ‵foki atu eiloa lāua mo te fanoa‵noa ki te fale. Kae ne nofo atu eiloa i konā a Malia, telā ne toe foki atu ki te tanuga.

I te taimi tenā, ko olo atu a nisi fāfine o fai atu ki te kau soko me ko oti ne toetu aka a Iesu. Kae koi  ‵tele atu latou, ne fakafetaui atu a Iesu ki a latou, kae fai atu: “Talofa!” Ne faka‵siga ifo latou ki lalo i ana vae kae “ifo atu ki a ia.” Ne fai atu ei a Iesu: “Sa ma‵taku! Olo o fakailoa atu ki oku taina ke olo ki Kalilaia, kae ka lavea ne latou au i konā.”—Mataio 28:9, 10.

Mai mua atu i ei, i te taimi ne poko ei te mafuie kae faka‵sae atu a agelu, “ne pole‵pole a leoleo [i te tanuga] e pelā eiloa me ne tino ko ‵mate.” Mai tua ifo i ei, ne olo atu latou ki te fa‵kai kae “fakailoa atu ki faitaulaga pule a mea katoa kolā ko oti ne ‵tupu.” Ne olo atu ei a faitaulaga ki toeaina o te kau Iutaia. Ne fai ei te fakaikuga ke fakakolekole a sotia ki tupe kae ke ‵funa aka ne latou te tala tenā kae ke fai penei: “Ne olo atu ana soko i te po o kaisoa tena foitino i te taimi ne ‵moe ei matou.”—Mataio 28:4, 11, 13.

E mafai o tamate a sotia Loma māfai ne ‵to olotou ‵moe i olotou ‵tuga, telā ne tauto atu ei a faitaulaga: “Kafai e logo te kovana i te mea tenei [te lotou loi e uiga ki te ‵to olotou ‵moe], kae ka fakamatala ne matou te mea tenā ki a ia, ko se ‵tau ei o manava‵se koutou.” (Mataio 28:14) Ne talia ne sotia a te ‵togi fakakolekole kae ne fai ne latou a pati ne fai atu ne faitaulaga. Tela la, ne salalau valevale atu i tino Iutaia a te tala ‵loi e uiga ki te kaisoaga o te foitino o Iesu.

Koi fanoanoa eiloa a Malia te Makatala i te tanuga. Ne fatio atu a ia ki mua, kae ne lavea ne ia a agelu e tokolua e ‵pei ki gatu ‵kena! E tokotasi e sagasaga i fogaulu o te koga ne takato ei te foitino o Iesu kae tokotasi i ana mulivae. Ne fesili atu lāua: “Te fafine, kaia e tagi ei koe?” Ne tali atu Malia: “Ko oti ne ave ne latou toku Aliki keatea, kae e se iloa ne au te koga ne tuku ne latou a ia i ei.” I te taimi ne mafuli atu ei a Malia, kae ne lavea ne ia se tino fakaatea. Ne fakafoki atu ne ia te fesili a agelu kae toe fai atu: “Ko oi e ‵sala koe ki ei?” Ne mafaufau tou fafine me i a ia ko te tino faifatoaga, ne fai atu tou fafine: “Tou ‵malu, kafai ne ave keatea ne koe a ia, fakaasi mai la ki a au te koga ne tuku ne koe i ei, kae ka ave ne au a ia keatea.”—Ioane 20:13-15.

A te ‵tonuga loa, ne faipati a Malia ki a Iesu, kae ne seki iloa ne tou fafine me ko ia tenā. Kae i te taimi ne fai atu ei tou tagata: “Malia!,” iloa ei ne ia me ko Iesu tenā, ona ko te auala masani ne faipati sāle atu ei tou tagata ki a ia. Ne kalaga atu a Malia mo te fiafia: “Laponi!” (ko tena uiga “Te Faiakoga!”). Kae ona ko te manavase me ko pili o fanatu a ia ki te lagi, ne ‵piki ‵mau atu ei ki tou tagata. Tela la, ne fakamalosi atu a Iesu ki tou fafine: “Sa ‵piki mai ki a au, me i a au e seki fanaka ki te Tamana. Kae fano nei ki oku taina o fai atu ki a latou, ‘Au ka fanaka ki toku Tamana telā ko te otou Tamana, ki toku Atua telā ko te otou Atua.’”—Ioane 20:16, 17.

Ne tele atu a Malia ki te koga telā e maopoopo ei a te kau apositolo mo te kau soko. Ne fai atu a ia ki a latou: “Ko oti ne lavea ne au te Aliki!” telā ne fakaopoopo atu tena tala ki mea ko oti ne lagona ne latou mai i nisi fāfine. (Ioane 20:18) Kae ne foliga mai “me e se ‵tonu a tala konei ki a latou.”—Luka 24:11.