Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 123

Ke ‵Talo Māfai ko Loto Mafatia Koe

Ke ‵Talo Māfai ko Loto Mafatia Koe

MATAIO 26:30, 36-46 MALEKO 14:26, 32-42 LUKA 22:39-46 IOANE 18:1

  • KO IESU I TE FATOAGA O KETESEMANE

  • NE FAI ANA TAUTA E PELĀ ME NE MOTIGA TOTO

Ne fatoa oti ne ‵talo atu a Iesu fakatasi mo ana apositolo fakamaoni. “I te otiga ne usu ne latou a pese o vikiga, olo ei latou ki te Mauga o Olive.” (Maleko 14:26) Ne olo atu latou i te feitu ki saegala ki te fatoaga e igoa ki a Ketesemane, telā ne masani o fanatu sāle ki ei a Iesu.

I te taimi ne oko atu ei latou ki te koga gali tenei i va o olive, ne tiakina ne Iesu ana apositolo e tokovalu i konā. Kāti ne pili atu latou ki te mataloa o te fatoaga, me ne fai atu a ia ki a latou: “‵Nofo i konei ke fano au o ‵talo i te koga telā.” Ne ave ne ia a apositolo e tokotolu—ko Petelu, Iakopo, mo Ioane—ne toe mumea atu a Iesu ki loto i te fatoaga. Ne kamata o mafatia malosi tou tagata kae ne fai atu a ia ki te tokotolu konā: “Ka mafatia eiloa au ke oko ki te mate. ‵Nofo i konei kae ke matapula‵pula koutou.”—Mataio 26:36-38.

Ne tai momea atu a ia keatea mai i a latou, ne ‘fakasiga ifo ki lalo a Iesu kae kamata o ‵talo.’ Se a te mea ne ‵talo atu a ia ki te Atua i te taimi tāua tenei? Ne ‵talo atu a ia: “Te Tamana, e mafai ne koe o fai a mea katoa. Ke ave keatea te ipu tenei mai i a au. Kae ke se fai te mea e manako au ki ei ka ko te mea e manako koe ki ei.” (Maleko 14:35, 36) Se a te mea ne fakauiga a ia ki ei? E mata, ko taumafai a ia o ‵kalo keatea mai te tulaga e pelā me ko te Tino ke tuku atu ne ia te togiola? Ikai!

Ne lavea ne Iesu mai te lagi a te logo‵mae o nisi tino kolā ne tamate ne te kau Loma. Nei la, e pelā me se tino telā e isi ne ana lagonaga alofa kae e mafai foki o logo‵mae, ne seki olioli eiloa a Iesu ki mea kolā e faka‵tali mai ki a ia. Kae e sili atu te tāua, ne logo‵mae a ia ona ko te iloa atu me i tena mate e pelā me se tino solitulafono matagā e mafai o taku fakamasei ei a te igoa o tena Tamana. I nai itula fua, ka fakatautau ei a ia ki luga i se lakau fakasaua e pelā me se tino ne pati masei ki te Atua.

Mai tua o te ‵talo atu mō se taimi leva, ne foki atu a Iesu kae maua atu ne ia ana apositolo e tokotolu e ‵moe. Ne fai atu a ia ki a Petelu: “E a, ko se mafai eiloa ne koutou o ‵pula fakatasi mo au i se itula e tasi? Ke tumau i te matapula‵pula kae ‵talo faeloa, ko te mea ke se fakaosoosogina koutou.” Ne iloa ne Iesu me ne fe‵paki foki ana apositolo mo tulaga faiga‵ta, kae ko leva foki te po. Ne toe fai mai a ia: “E manako ki ei te loto, kae ko vāivāi te foitino.”—Mataio 26:40, 41.

Ne toe fanatu a Iesu i te lua o taimi kae fakamolemole atu ki te Atua ke ave keatea mai i a ia a “te ipu tenei.” I tena fokiatuga, ne toe maua atu foki ne ia ana apositolo e ‵moe, i te taimi e ‵tau ei o ‵talo atu ko te mea ke se fakaosoosogina latou. I te taimi ne faipati ei a Iesu ki a latou, “ne seki iloa ne latou me ne a olotou pati e ‵tau o fai atu ki a ia.” (Maleko 14:40) Ne toe fanatu a Iesu i te tolu o taimi, kae ne totuli ifo ki lalo i ana tuli o ‵talo atu.

Ne manavase malosi a Iesu ki fakamaseiga ki te igoa o tena Tamana telā ka tuku atu ne tena mate e pelā me se tino solitulafono. Ne lagona ne Ieova a ‵talo a tena Tama, kae i te taimi e tasi, ne uga atu ne te Atua se agelu ke fakamalosi ki a ia. Kae ne seki gata eiloa te fakatagi atu o Iesu ki tena Tamana, kae ne “tumau eiloa a ia i te ‵talo malosi.” Ne gasolo aka eiloa tena mafatia. Ko oko eiloa i te ‵mafa o te amoga ne amo ne Iesu! Ne tu atu eiloa i se tulaga fakamataku a tena ola  ki te se-gata-mai e penā foki mo ola o tino tali‵tonu. A te ‵tonuga loa, “ne fai tena tauta e pelā me ne motiga toto e sali‵sali ki te laukele.”—Luka 22:44.

I te taimi ne toe foki atu ei a Iesu i te tolu o taimi ki ana apositolo, ne toe maua atu ne ia latou e ‵moe. Ne fai atu a ia: “A koutou e ‵moe kae malō‵lo i se vaegā taimi penei! Kiloke! Ko pili mai te itula ka tuku atu ei te Tama a te tagata i se auala faitogafiti ki lima o tino agasala. ‵Tu ki luga, tatou ka olo. Kiloke! A te tino ka fakatogafiti ne ia au ko pili mai.”—Mataio 26:45, 46.