Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 113

Se Akoakoga e Uiga ki te Galue Malosi​—Ko Taleni

Se Akoakoga e Uiga ki te Galue Malosi​—Ko Taleni

MATAIO 25:14-30

  • NE FAI ATU NE IESU A TE TALA FAKATUSA E UIGA KI TALENI

I te taimi ne ‵nofo ei mo ana apositolo e tokofa i luga i te Mauga o Olive, ne fai atu ne Iesu a te suā tala fakatusa. I nai aso mai mua atu i ei, i te taimi ne nofo atu ei a ia i Ieliko, ne fai atu ne ia a te tala fakatusa e uiga ki mina ke fakaasi atu ei me i te Malo se mea i aso mai mua. Kae ko te tala fakatusa ko fakamatala atu nei ne ia, e tai uke eiloa a mea e tai ‵pau ei. Se vaega o tena tali ki te fesili e uiga ki tena fakatasi mai mo te gataga o te olaga masei tenei. E fakaasi mai i ei me e ‵tau o ga‵lue malosi ana soko ki mea ne tuku atu ke fai ne latou.

Ne kamata atu a Iesu: “Me ka pelā eiloa mo se tagata telā ka fai o fano ki se isi fenua, ne kalaga atu ki ana pologa kae tuku atu ana mea ke tausi ne latou.” (Mataio 25:14) Ona ko te mea ko oti ne faka‵pau ne Iesu a ia ki se tagata telā ne faimalaga atu ki se koga ‵mao “ke fakamautinoa aka i ei tena pulega fakatupu,” ne mafai ei o iloagofie ne te kau apositolo me i a Iesu ko te “tagata” telā e faipati ki ei i konei.—Luka 19:12.

A koi tuai o faimalaga atu a te tagata i te tala fakatusa ki se koga ‵mao, ne tuku atu ne ia ana kope tāua ki ana pologa ke tausi. I te tolu mo te āfa tausaga o tena galuega, ne saga tonu atu a Iesu ki te talaiatuga o te tala ‵lei o te Malo o te Atua, kae ne fakamasani ne ia ana soko ke fai te galuega tenei. Nei la, ka fano keatea a ia mo te loto talitonu me ka fai eiloa ne latou a mea kolā ko oti ne akoako atu ne ia ki a latou ke fai.—Mataio 10:7; Luka 10:1, 8, 9; fakatusa ki te Ioane 4:38; 14:12.

I te tala fakatusa, ne tufatufa atu ne ia pefea ana mea? Ne fakamatala mai a Iesu: “Ne tuku atu ne ia ki te tino e tokotasi e lima taleni, ki te suā tino e lua, kae ko te suā tino e tasi, e ‵tusa mo te mea a te tino e mafai o fai, kae fano tou tagata.” (Mataio 25:15) Ne a mea ka fai ne pologa konei ki mea ne tuku atu ki a latou? E mata, ka ga‵lue malosi latou ke fakaopoopo atu a mea a te lotou matai? Ne fai atu a Iesu ki ana apositolo:

“Ne fano fakavave a te tino telā ne tuku atu ki ei a taleni e lima, fakagalue ne ia, kae ne maua mai i ei a nisi taleni e lima. Ne fai foki penā a te tino telā ne maua ne ia a taleni e lua, ne toe maua foki a nisi taleni e lua. Kae ko te pologa telā ne maua ne ia te taleni e tasi, ne fano o keli te lua kae tanu ne ia te tupe a tena matai.” (Mataio 25:16-18) Ne a mea ka ‵tupu i te fokimaiga o te matai?

“Mai tua o se taimi leva ‵ki, ne toe foki atu te matai o pologa konā ke maua ne ia se tala e uiga ki ana tupe kolā ne tuku ki a latou.” (Mataio 25:19) A pologa muamua ne fai eiloa te ‵toe mea e mafai o fai ne lāua, “e ‵tusa mo te mea a te tino e mafai o fai.” Ne ga‵lue malosi a pologa takitasi kae ne uke a mea ne maua mai i mea ne tuku atu ke tausi ne lāua. A iatelā ne tuku atu a taleni e lima ki ei ne fakaopoopo fakalua atu, e pelā foki mo ia telā ne tuku atu a taleni e lua ki ei. (I aso konā, ne ‵tau o ga‵lue malosi se tino mō tausaga e 19 ke maua se aofaki tupe telā e ‵pau mo te taleni e tasi.) Ne ‵pau eiloa a pati fakamālō mō lāua konā: “Mālō, a  koe se pologa ‵lei kae fakamaoni! A koe ne fakamaoni i te faiga o nai mea. Ka ‵tofi ne au a koe ke pule i mea e uke. Ulu mai ki loto o fia‵fia fakatasi mo tou matai.”—Mataio 25:21.

Kae ne ‵kese eiloa a te pologa telā ne maua ne ia a te taleni e tasi. Ne fai mai a ia: “Toku Matai, ne iloa ne au i a koe se tagata faigata, e tau ne koe a fuataga i lakau e seki ‵toki ne koe kae e ‵luku a fuataga kolā e seki faka‵ma ne koe. Tela la, au ne mataku, fano ei au o ‵funa tau taleni i te laukele. Tenei la tau mea.” (Mataio 25:24, 25) Ne seki faulu ne ia a te tupe ki te pagike ko te mea ke fakaopoopo atu a te pasene ki ei. Ne seki galue malosi ke fakaopoopo atu a tupe a tena matai.

E fetaui ‵lei i ei, ne fai atu a te matai me i a ia se “pologa matagā kae paie.” Ne ave keatea a te mea ne tuku atu ki a ia kae tuku atu ki te pologa telā e sili atu tena loto fiafia o galue malosi. Ne fakaasi atu ei ne te matai ana tulaga: “Me i so se tino telā e isi ne ana mea, ka tuku ki ei a mea e uke atu kae ka maua ne ia a mea e uke ‵ki. Kae ko ia telā e seai ne ana mea, ka tapale keatea mai i a ia a nai mea kolā e i a ia.”—Mataio 25:26, 29.

Ne uke ‵ki eiloa a mea ne ‵tau o mafau‵fau ki ei a soko o Iesu, ke oko foki eiloa ki te tala fakatusa e tasi tenei. Ne ‵kilo atu latou ki te mea ne tuku atu ne Iesu ki a latou—te tauliaga tāua o te faiga o soko—me se mea tafasili i te tāua. Kae ne fakamoemoe a ia ke ga‵lue malosi latou i te tauliaga tenei. Ne seki mafaufau a Iesu me e ‵tau o ‵pau a mea e fai ne latou katoa i te galuega talai telā ne fakatonu atu ne ia ke fai ne latou. E pelā mo te mea ne fakaasi mai, e ‵tau mo latou katoa o fai “e ‵tusa mo te mea a te tino e mafai o fai.” E se fakauiga a te mea tenei me e fiafia a Iesu māfai e “paie” kae fakatamala o fai te ‵toe mea ‵lei i te tausi atu ki kope a te Matai.

Kae ne pefea te fia‵fia o apositolo, ki te fakatalitonuga tenei: “Me i so se tino telā e isi ne ana mea, ka tuku ki ei a mea e uke atu”!