Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 120

Te ‵Fua Mai o Fuataga e Pelā me ne Kaula mo te Fai mo Taugasoa o Iesu

Te ‵Fua Mai o Fuataga e Pelā me ne Kaula mo te Fai mo Taugasoa o Iesu

IOANE 15:1-27

  • TE VINE TONU MO KAULA

  • TE AUALA KE TUMAU I TE ALOFA O IESU

Ko oti ne fakamalosi atu a Iesu ki ana apositolo fakamaoni e auala i se sau‵talaga ‵loto mo latou. Ko leva te po, kāti ko teka atu foki te valuapo. Ko fakamatala atu nei ne Iesu se tala fakatusa kae fakamalosi loto:

Ne kamata mai tena fakamatalaga: “Au ko te vine tonu, kae ko toku Tamana ko te tino galue i vine.” (Ioane 15:1) E fakaata mai i tena tala fakatusa a mea kolā ne fai atu muamua i nai senitenali mai mua atu i ei e uiga ki te fenua o Isalaelu, telā ne taku ki te vine a Ieova. (Ielemia 2:21; Hosea 10:1, 2) Kae ne tiakina ne Ieova a te fenua tenā. (Mataio 23:37, 38) Tela la, ne fakaasi atu ne Iesu se manatu fou. A iako te vine telā ne galue ki ei tena Tamana talu mai te taimi ne fakaeke ei a Iesu ki te agaga tapu i te 29 T.A. Kae ne fakaasi atu ne Iesu me e se ko ia fua e fakaata mai i te vine, i ana muna:

“E ‵kati ne [toku Tamana] keatea a kaula katoa i a au kolā e se ‵fua mai, kae velevele ne ia a kaula kolā e ‵fua mai ei a fuataga. . . . E pelā eiloa mo te kaula telā e se mafai o fua mai i a ia eiloa ne fuataga seiloga ke ‵piki ‵mau ki te vine, e penā foki koutou māfai e se tumau i te ‵kau fakatasi mo au. Au ko te vine, kae ko koutou ko kaula.”—Ioane 15:2-5.

Ne tauto atu a Iesu ki ana soko me kafai ko fano a ia keatea, ka uga mai ne ia te fesoasoani, ko te agaga tapu. E lima sefulutasi aso mai tua ifo i ei, kae maua ne te kau apositolo mo nisi tino a te agaga tenā, telā ne fai ei latou mo kaula o te vine. Kae ne ‵tau o ‵kau fakatasi mo Iesu a “kaula” katoa. Se a te mea e fakataunu mai i ei?

Ne fai mai tou tagata: “So se tino e tumau i te ‵kau fakatasi mo au, kae ko au e ‵kau fakatasi mo ia, a te tino tenā e fua malosi mai; me e seai eiloa se mea e mafai ne koutou o fai e aunoa mo au.” A “kaula” konei—ko ana soko fakamaoni—ka ‵fua malosi mai i te fakaakoako atu ki uiga o Iesu, te fai‵pati malosi atu ki nisi tino e uiga ki te Malo o te Atua, mo te faiga o soko e uke atu. Kae e a māfai e se tumau se tino i te ‵kau fakatasi mo Iesu kae e seai ne fuataga e ‵fua mai i ei? Ne fakamatala mai a Iesu: “Kafai e se tumau se tino i te ‵kau fakatasi mo au, ka ‵pei a ia keatea.” I te suā feitu la, ne fai mai a Iesu: “Kafai e tumau koutou i te ‵kau fakatasi mo au kae tumau foki aku muna i a koutou, fakatagi mai la ki so se mea e ma‵nako koutou ki ei kae ka maua ne koutou.”—Ioane 15:5-7.

Nei la, ko toe foki atu a Iesu ki te mea ko oti ne taku fakalua atu ne ia—te faka‵logo ki ana fakatonuga. (Ioane 14:15, 21) Ne fakamatala atu ne ia a te auala tāua ke fakamaoni atu ne soko me e fai eiloa latou penā: “Kafai e faka‵logo koutou ki aku fakatonuga, ka tumau koutou i toku alofa, e pelā eiloa mo au ne fakalogo ki fakatonuga a te Tamana kae tumau i tena alofa.” Kae e uke atu a mea e aofia i ei i lō te alofa ki a Ieova te Atua mo tena Tama. Ne fai mai a Iesu: “Tenei taku fakatonuga, ke fakatau a‵lofa koutou e pelā eiloa mo au ne alofa ki a koutou. E seai se tino e sili atu tena alofa i lō te mea tenei, ko te tuku atu ne se tino a tena ola mō ana taugasoa. A koutou ko oku taugasoa māfai e fai ne koutou a mea kolā e fakatonu atu ne au ki a koutou.”—Ioane 15:10-14.

I nai itula koi ‵toe, ka fakaasi atu ei ne Iesu tena alofa mai te tukuatuga o tena ola mō latou katoa kolā e fakatuanaki ki a ia. Ne ‵tau o fakamalosi atu tena fakaakoakoga ki ana soko ke fakatau fakaasi atu foki ne latou te alofa sē fakapito penā. Ka fakamailoga eiloa latou ne te alofa tenei, e pelā mo muna ne fai atu muamua ne Iesu: “Ona ko te mea tenei ka iloa ei ne tino katoa i a koutou ko oku soko—māfai e fakatau a‵lofa koutou.”—Ioane 13:35.

Ne ‵tau o masaua ne te kau apositolo me ne taku latou ne Iesu ki “taugasoa.” Ne fakamatala atu ne ia te pogai ne taku ei latou penā: “Ko taku ne au koutou ne taugasoa, me ko oti ne fakaasi atu ne au ki a koutou a mea katoa kolā ne lagona ne au mai toku Tamana.” Ko oko eiloa i te tāua ke maua se fesokotakiga penā—ke fai mo fai se taugasoa pili o Iesu kae ke iloa a mea ne fai ne te Tamana ki a ia! Kae ke maua te fesokotakiga tenei, e ‵tau o “‵fua mai ei a fuataga.” Kafai e fai latou penā, ne fai mai a Iesu, ka “tuku atu ne  te Tamana so se mea telā e fakatagi atu ei koutou i toku igoa.”—Ioane 15:15, 16.

A te alofa i va o “kaula,” kolā ko soko, ka fesoasoani atu ke kufaki i mea kolā ka oko atu. Ne fakailoa atu ne ia ki a latou me ka takalia‵lia a te lalolagi ki a latou, kae ne tuku atu ne ia te fakamafanafanaga tenei: “Kafai e takalia‵lia te lalolagi ki a koutou, e iloa ne koutou me ne takalia‵lia muamua mai ki a au kae koi tuai o takalia‵lia atu ki a koutou. Kafai koutou ne vaega o te lalolagi, e fia‵fia eiloa te lalolagi ki a koutou me ko fai koutou mo ana tino. Kae ona ko koutou e se ne vaega o te lalolagi, . . . tenei te pogai e takalia‵lia ei te lalolagi ki a koutou.”—Ioane 15:18, 19.

I te fakamatala atu o te pogai ka takalialia ei te lalolagi ki a latou, ne toe fai atu a Iesu: “Ka fai ne latou a mea katoa konei o ‵teke ki a koutou ona ko toku igoa, me e se iloa ne latou a te Tino ne uga mai ne ia au.” Ne fai mai a Iesu me i ana galuega fakavavega ne fakaitaita atu ki tino kolā e takalia‵lia ki a ia: “Moi ne seki fai ne au i a latou a galuega kolā e seki fai aka eiloa ne se isi tino, penei e se agasala latou; kae nei la ko oti ne lavea ne latou au kae takalia‵lia mai ki a au e pelā foki mo toku Tamana.” A te ‵tonuga loa, ne fakataunu mai ne te lotou takalia‵lia a te valoaga.—Ioane 15:21, 24, 25; Salamo 35:19; 69:4.

Ne toe tauto atu a Iesu me ka uga mai a te fesoasoani, ko te agaga tapu. E avanoa eiloa te malosi ‵mana tenā ki ana soko katoa, kae e mafai o fesoasoani atu ke ‵fua mai ne latou a fuataga, ke tuku atu se “molimau.”—Ioane 15:27.