Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 112

Se akoakoga e uiga ki te mataala​—tamafine

Se akoakoga e uiga ki te mataala​—tamafine

MATAIO 25:1-13

  • NE FAI ATU NE IESU TE TALA FAKATUSA E UIGA KI TAMAFINE E TOKO SEFULU

Ne tali atu ne Iesu a te fesili o ana apositolo e uiga ki te fakailoga o tena fakatasi mai mo te gataga o te olaga masei tenei. Ona ko te mea tenei, ne tuku atu ei ne ia a pati fakamalosi loto e auala i se isi tala fakatusa. Ka lavea atu te fakataunuga ne tino kolā e ola i te vaitaimi o tena fakatasi mai.

Ne kamata te tala fakatusa ki ana pati konei: “Kae ko te Malo o te lagi e mafai o fakatusa ki tamafine e toko sefulu kolā ne puke olotou molī kae olo atu o fakafetaui ki te tamataene ka fakaipoipo. E tokolima i a latou e va‵lea, kae ko te suā tokolima e ‵poto.”—Mataio 25:1, 2.

Ne seki fakauiga a Iesu me i te āfa o ana soko kolā ka maua te Malo o te lagi e va‵lea kae ko te suā āfa e ‵poto. I lō te fai penā, ne fai atu ne ia se manatu telā e isi sena sokoga ki te Malo, e mafai ne ana soko takitasi o filifili ke mataala io me ke ‵saga atu ki nisi mea. E seki fakalotolotolua a Iesu me e mafai o tumau ana tavini i te fakamaoni kae maua a fakamanuiaga mai tena Tamana.

I te tala fakatusa, ne olo atu a tamafine katoa e toko sefulu o fakatalofa ki te tamataene ka fakaipoipo kae ‵kau atu ki te solo o te fakaipoipoga. I te taimi e oko mai ei a ia, ka fakamaina ne tamafine a te auala ki olotou molī, ke fakaaloalo atu ei ki a ia i te taimi e aumai ei ne ia tena avaga ki te fale telā ne fakatoka mō tou fafine. Kae ne a mea ne iku mai i ei?

Ne fakamatala mai a Iesu: “Ne ave ne tamafine va‵lea olotou molī e aunoa mo sinu fakaleoleo, kae ko tamafine ‵poto ne ave olotou fagu sinu fakatasi mo olotou molī. I te taimi ne tuai mai ei te tamataene ka fakaipoipo, ne matule‵tule latou katoa kae  ‵to olotou ‵moe.” (Mataio 25:3-5) Ne seki oko vave mai te tamataene ka fakaipoipo e pelā mo te mea ne fakamoemoegina. Ne foliga mai me ne leva ‵ki te fakatalavega, telā ne ‵to ei a moe o tamafine. Kati ne masaua ne soko a te tala a Iesu e uiga ki se tagata mai i se kāiga tupu telā ne fanatu keatea kae ne toe foki mai “mai tua o te fakamautinoaga o tena pulega fakatupu.”—Luka 19:11-15.

I te tala fakatusa e uiga ki tamafine e toko sefulu, ne fakamatala mai ne Iesu a mea ne ‵tupu i te taimi ne oko mai ei a te tamataene ka fakaipoipo: “Kae ne pa mai te kalaga i te valuapo, ‘Ko oko mai te tamataene ka fakaipoipo! Olo o fakafetaui ki ei.’” (Mataio 25:6) Se a te tulaga o tamafine i te ‵toka mo te mataala?

Ne toe fai mai a Iesu: “Tenā ne ala aka a tamafine konei kae fakatoka olotou molī. Ne fai atu a tamafine va‵lea ki tamafine ‵poto, ‘Tuku mai aka ne otou sinu ki a matou, me ko pili o ‵mate omotou molī.’ Ne tali atu a tamafine ‵poto, ‘Kāti e se lava katoa tatou i sinu konei. Olo la o ‵sala a tino e fakatau ne latou ke ‵togi ne otou sinu mai i ei.’”—Mataio 25:7-9.

Tela la, ne seki mataala a tamafine va‵lea e tokolima kae ne seki toka latou ki te oko mai o te tamataene ka fakaipoipo. Ne seki lava olotou sinu mō olotou molī kae ne ‵sala atu ki nisi sinu. Ne fai mai a Iesu: “I te taimi ne olo ei latou o ‵togi olotou sinu kae oko mai te tamataene ka fakaipoipo, ulu atu ei a tamafine kolā ko toka fakatasi mo te tamataene ki loto i te ‵kaiga o te avaga kae ‵pono mai te mataloa. Fakamuli ifo, ne oko atu te ‵toega o tamafine, kae ka‵laga atu, ‘Tou ‵malu, Tou ‵malu, ‵tala mai aka ke ulu atu matou!’ Ne tali atu tou tagata, ‘Au e fai tonu atu ki a koutou, e se iloa ne au koutou.’” (Mataio 25:10-12) Ko oko eiloa i te fakafanoanoa o te ikuga ne maua mai ona ko te sē tumau i te ‵toka mo te mataala!

Ne mafai o lavea ne te kau apositolo me ne fakauiga eiloa ne Iesu ki a ia a te tamataene ka fakaipoipo. Mai mua atu i ei, ne faka‵pau ne ia a ia eiloa ki se tamataene ka fakaipoipo. (Luka 5:34, 35) Kae ko tamafine ‵poto? I te taimi ne faipati ei a ia e uiga ki te “lafu foliki,” kolā ne tuku atu ki ei te Malo, ne fakaaoga ne Iesu a pati konei: “‵Pei otou gatu kae ke toka koutou kae ke ‵ka otou molī.” (Luka 12:32, 35) Tela la, i te tala fakatusa tenei e uiga ki tamafine, ne mafai o malamalama a te kau apositolo me ne fakasino atu a Iesu ki tino e pelā mo latou. Tela la, se a te fekau ne fakaasi mai ne Iesu i te tala fakatusa tenei?

Ne fakamaina faka‵lei mai eiloa ne Iesu a te mea tenā. Ne fakaoti ne ia tena tala fakatusa mai te fai atu: “Tela la, ke tumau i te matapula‵pula, me e se iloa ne koutou te aso io me ko te itula.”—Mataio 25:13.

E manino ‵lei, me ne fakamalosi atu a Iesu ki ana soko fakamaoni e uiga ki tena fakatasi mai, e ‵tau mo latou o “tumau i te matapula‵pula.” Ka vau eiloa a ia, kae e ‵tau mo latou o toka kae matapula‵pula—e pelā mo tamafine ‵poto e tokolima—ko te mea ke se fulitua atu latou ki te lotou fakamoemoega tāua kae galo atu foki a te taui telā e mafai o maua ne latou.