Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 106

Tala Fakatusa e Lua e Uiga ki te Fatoaga Vine

Tala Fakatusa e Lua e Uiga ki te Fatoaga Vine

MATAIO 21:28-46 MALEKO 12:1-12 LUKA 20:9-19

  • TALA FAKATUSA E UIGA KI TAMALIKI TĀGATA E TOKOLUA

  • TALA FAKATUSA E UIGA KI TINO GA‵LUE I TE FATOAGA VINE

I te faletapu, ne fatoa oti ne fakafilemu ne Iesu a faitaulaga pule mo toeaina, kolā ne ‵teke atu ki te malosi e fai ei ne ia a mea. Ne fakafilemu ne te tali a Iesu a latou. Oti aka, ne tuku atu ei ne ia se tala fakatusa telā ne fakaasi faka‵sau atu me ko latou ne vaegā tino pefea.

Ne fakamatala mai a Iesu: “E isi se tagata e tokolua ana tama‵liki. Ne fanatu tou tagata ki te tamaliki muamua, ana muna, ‘Taku tama, fano o galue i te togavine i te aso nei.’ Ne tali atu te tamaliki, ‘Au e se fano,’ kae oti aka ne ‵fuli tena mafaufau kae fano. Ne fanatu a ia ki te tokolua, kae fai atu foki penā ki ei. Ne tali atu te tamaliki tenei, ‘Tou ‵malu, au e fano,’ kae seki fano. Ko oi la i a lāua konei ne fai ne ia te loto o tena tamana?” (Mataio 21:28-31) E lavea ‵lei atu eiloa te tali—ko te tamaliki muamua telā ne fanatu fakamuli o fai te loto o tena tamana.

Tela la, ne fai atu a Iesu ki ana tino ‵teke: “Au e fai tonu atu ki a koutou me ka ‵mua atu a tino ‵tae lafoga mo fāfine talitagata ki te Malo o te Atua i lō koutou.” Ne seki tavini atu muamua a tino ‵tae lafoga mo fafine talitāgata ki te Atua. Kae e pelā mo te tamaliki muamua, ne sala‵mo fakamuli latou kae nei la ko tavini atu latou ki a ia. E ‵kese mai i ei, e fai a takitaki lotu e pelā mo te tamaliki i te tokolua, kolā ne fai atu me e tavini atu latou ki te Atua kae e fakata‵mala latou ke fai penā. Ne fai mai a Iesu: “Me ne vau a Ioane [te Papatiso] o fakaasi atu ki a koutou a te amiotonu, kae ne seki tali‵tonu koutou ki a ia. Kae ne tali‵tonu a tino ‵tae lafoga mo fāfine talitagata ki a ia, kae e pelā mo koutou, e tiga eiloa ne matea ne koutou a te mea tenei, ne seki sala‵mo fakamuli koutou ko te mea ke tali‵tonu koutou ki a ia.”—Mataio 21:31, 32.

Ne faka‵soko atu a Iesu ki te suā tala fakatusa. I te taimi tenei, ne fakaasi atu ne Iesu me e uke atu a mea e aofia i te fakata‵mala o takitaki lotu i lō te ‵kalo keatea mai i te tavini atu ki te Atua. Ne amio ma‵sei tonu eiloa latou. “E isi se tagata ne ‵toki tena togavine,” ne fakamatala mai Iesu, “ne ‵pui ne ia kae keli foki se lua ke tuku i ei te mea ‵tau uaina kae fakatu foki ne ia se taoa i ei. Ne liisi ne ia ki tino fai fatoaga, fano ei a ia ki se isi fenua. I te okoga ki te ‵tau e tau ei a fuagā vine, uga atu ei ne ia tena pologa ki tino fai fatoaga ke puke mai ne fuagā vine mai i a latou. Kae ne puke ne latou a ia, ta ne latou, uga atu ei ke fano e aunoa mo se mea. Ne toe uga atu ne ia te suā pologa ki a latou, kae ne pago ne latou tena ulu kae fakamasiasi ne latou a ia. Ne toe uga atu ne ia te suā tino, kae ne tamate ne latou a ia, ne toe uga atu foki a tino e tokouke, kae ne ‵ta ne latou a nisi tino kae tamate ne latou a nisi tino.”—Maleko 12:1-5.

E mata, ne malamalama i te tala fakatusa a tino kolā ne fakalogo‵logo atu ki a Iesu? Kāti ne masaua ne latou a pati fakamasei a Isaia: “A Isalaelu ko te togavine a te Aliki Malosi; a tino Iuta ko vine kolā ne ‵toki ne ia. Ne fakamoemoe a ia ke fai ne latou a amioga ‵lei, kae tela la, ko te tatino fua e fai ne latou.” (Isaia 5:7) E tai ‵pau eiloa a te tala fakatusa. A te tino e o ia te laukele ko Ieova, kae ko te togavine ko te fenua o Isalaelu, e ‵pui kae puipui ki te Tulafono a te Atua. Ne uga atu ne Ieova a pelofeta ke akoako ana tino kae fesoasoani atu ke ‵fua mai ne latou a fuataga ‵lei.

Kae ne fai fakamasei kae tamate ne “tino fai fatoaga” a “pologa” kolā ne uga atu ki a latou. Ne fai mai a Iesu: “Toe tokotasi eiloa tena tino e ‵toe [te tino i o ia te togavine], ko tena tama fagasele. Ne uga fakamuli atu ne ia ki a latou kae fai aka penei, ‘Ka āva eiloa latou ki taku tama.’ Ne fai aka a pati a tino fai fatoaga, ‘Tenei eiloa tena sui. ‵Mai ke tamate ne tatou a ia, ko maua ei ne tatou a te togavine telā e ‵tau o maua ne ia.’ Tenā ne puke ei ne latou a ia kae tamate, kae ‵pei ki tua mo te togavine.”—Maleko 12:6-8.

Nei la, ko fesili atu a Iesu: “Ne a la mea ka fai ne te tino i o ia te togavine?” (Maleko 12:9) Ne tali atu a takitaki lotu: “Ona ko latou ne tino matagā, ka avatu foki ne ia ki a latou se fakasalaga matagā, kae ka liisi ne ia te togavine ki nisi tino fai fatoaga, kolā ka avatu ne latou ki a ia ana fuagā vine i te taimi tonu.”—Mataio 21:41.

Ne folafola mai eiloa ne latou e aunoa mo te iloa ne latou a te lotou fakasalaga, me ne aofia latou i “tino fai fatoaga” i te “togavine” a Ieova, telā ko te fenua o Isalaelu.  A te fuataga ‵lei telā e fakamoemoe a Ieova ki ei mai i tino ga‵lue penā e aofia i ei a te fakatuanaki ki tena Tama, ko te Mesia. Ne kilo tonu atu a Iesu ki takitaki lotu kae fai atu: “E a, e seki fai‵tau ne koutou a pati konei i te Tusi: ‘A te fatu telā ne tiakina ne tufuga fai fale ko fai nei mo fatu tulimanu tafasili i te aoga. Ne aumai eiloa te mea tenei mai i a Ieova, kae e fakaofoofogia ki a tatou’?” (Maleko 12:10, 11) Telā ne fakamaina faka‵lei atu ei ne Iesu a te manatu e fia fakaasi atu ne ia: “Tenei eiloa te pogai e fai atu ei au ki a koutou, a te Malo o te Atua ka tapale keatea mai i a koutou kae tuku atu ki se fenua telā e ‵fua mai i ei a fuataga ‵lei.”—Mataio 21:43.

Ne iloa ne failautusi mo faitaulaga pule me ne fai atu ne Iesu a “te tala fakatusa tenei e uiga ki a latou.” (Luka 20:19) Ko sili atu nei te lotou fia tamate ki a ia, te “sui” tonu eiloa. Kae ne ma‵taku latou i te vaitino, kolā ne mafau‵fau i a Iesu se pelofeta, tela la, ne seki taumafai latou o tamate tou tagata i te taimi tenā.