Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 109

Te Taku Fakamaseiga o Tino ‵Teke

Te Taku Fakamaseiga o Tino ‵Teke

MATAIO 22:41–23:24 MALEKO 12:35-40 LUKA 20:41-47

  • I A AI TE TAMA KO TE KELISO?

  • NE FAKAASI FAKA‵SAU ATU NE IESU A TINO ‵TEKE KAE ‵LOI

Ne seki mafai o faka‵se ne tino ‵teke fakalotu a Iesu me i a ia e se ko te Mesia io me e maua ne latou se mea ‵se i a ia ke avatu ei ki te kau Loma. (Luka 20:20) Nei la, a koi nofo atu i te faletapu i te po 11 o Nisani, ne ‵tule atu ne Iesu a taipola ki a latou kae fakaasi ‵tonu atu ne ia me ko oi a ia. Ne fanatu muamua a ia kae fesili atu ki a latou: “Se a te otou faka‵tau e uiga ki te Keliso? I a ai te tama?” (Mataio 22:42) E lauiloa te manatu me i te Keliso, io me ko te Mesia, e ‵tau o vau mai i te gafa o Tavita. Tenā eiloa te tali ne tuku atu ne latou.—Mataio 9:27; 12:23; Ioane 7:42.

Ne fesili atu a Iesu: “Kaia la ne fakaosofia ei a Tavita ke fakaigoa ne ia te Keliso ki te Aliki, ana muna, ‘Ne fai atu a Ieova ki toku Aliki: “Nofo i toku feitu fakaatamai ke oko ki te taimi e tuku ei ne au ou fili mai lalo i ou vae”’? Kafai ne fakaigoa ne Tavita a te Keliso ki te Aliki, i te auala fea e fai ei a ia mo fai tena tama?”—Mataio 22:43-45.

Ne ‵nofo ‵mu te kau Falesaio, me ne fakamoe‵moe latou ke faka‵sao latou ne se tino i te gafa o Tavita mai i te pulega fakasaua a te kau Loma. Kae ko te mafau‵fau ki pati a Tavita i te Salamo 110:1, 2, ne fakaasi mai ne Iesu me e sili fakafia atu a te Mesia i lō se pule faka-te-tagata. A ia ko te Aliki o Tavita, kae mai tua o te taimi ne sagasaga ifo ei a ia i te lima fakaatamai o te Atua, ka fakaaoga ei ne ia tena ‵mana. Ne fakafilemu ne te tali a Iesu ana tino ‵teke.

Ko oti ne fakalogo‵logo atu a soko mo nisi tino e tokouke. Nei la, ko fakasino atu a Iesu ki a latou kae fakailoa atu ke fakaeteete i failautusi mo Falesaio. Ne saga‵saga atu a tāgata konā i te “nofoga o Mose” ke akoako atu a te Tulafono a te Atua. Ne akoako atu a Iesu ki ana tino fakalogo‵logo: “A mea katoa kolā e fai atu ne latou ki a koutou, fai kae faka‵logo ki ei, kae sa fai ne koutou a mea kolā e fai ne latou, me e fai fua olotou pati kae se tau‵tali i ei.”—Mataio 23:2, 3.

Ne taku atu ei ne Iesu a fakaakoakoga o olotou uiga ‵loi, ana muna: “Me e faka‵lasi ne latou a mea kolā e tuku ei a tusitusiga tapu kae e ‵sai ki luga i olotou foitino mo fai se puipuiga.” Ne faka‵piki ne nisi tino Iutaia a tamā pepa mo fuaiupu toe‵toe mai te Tulafono ki olotou lae io me ko lima. Ne faka‵lasi ne te kau Falesaio olotou fakailoga ke fakaasi atu me e sili atu te lotou loto finafinau e uiga ki te Tulafono. E faka‵loa foki ne latou “a fele o olotou gatu.” Ne ‵tau o fai ne te kau Isalaelu a felefele i olotou gatu, kae ne fakamautinoa aka ne te kau Falesaio me e ‵loa atu olotou fele. (Numela 15:38-40) Ne fai ne latou a mea katoa konei ko te mea “ke lavea ne tino.”—Mataio 23:5.

Ne mafai foki eiloa o pokotia a soko o Iesu i se manakoga ki tulaga ma‵luga, telā ne polopoloki atu ei ne ia a latou: “Ke mo a e fakaigoa koutou ki Faiakoga, me e tokotasi fua te otou Faiakoga, a koutou katoa ne taina. E se gata i ei, ke mo a e fakaigoa ne koutou se tino i te lalolagi ki te otou tamana, me e tokotasi fua te otou Tamana, ko Ia telā i te lagi. Ke se taku foki koutou ne takitaki, me e tokotasi fua te otou Takitaki, ko Keliso.” Ne ‵tau o pefea a te kilokiloga a soko e uiga ki a latou mo mea e ‵tau o fai ne latou? Ne fai atu a Iesu ki a latou: “Kae ko te ‵toe tino sili i a koutou e ‵tau o fai mo fai te otou tavini. So se tino e fakamaluga ne ia a ia eiloa ka fakamalalogina, kae ko te tino telā e fakamalalo ne ia a ia eiloa ka fakamalugagina.”—Mataio 23:8-12.

I te otiga, ne taku atu ne Iesu se fakasologa o faifaiga ‵loi a failautusi mo Falesaio: “Kalofa eiloa i a koutou failautusi mo Falesaio, koutou ne tino ‵loi! me e ‵pono ne koutou te Malo o te lagi i mua o tino; me e se ulu foki koutou ki loto i ei, kae e se talia foki ne koutou a latou kolā e olo atu ki ei ke ulu ki ei.”—Mataio 23:13.

Ne taku fakamasei ne Iesu a te sē ma‵losi o tulaga faka-te-agaga o te kau Falesaio, e pelā mo te mea e fakaasi mai i te lasi o te lotou fia ‵pule. E pelā mo olotou pati: “Kafai e tauto se tino i te faletapu e seai se mea e fai i ei, kae kafai e tauto se tino i te aulo o te faletapu, e ‵tau eiloa o tausi ki ei.” Ne fakaasi atu te ‵kivi o latou i mea tau amioga, me ne fakatāua malosi ne latou a aulo i te faletapu i lō te tāua i te feitu  faka-te-agaga o te koga tapuaki ki a Ieova. Kae “ne fakaseaoga ne [latou] a vaega tāua o te Tulafono, e pelā mo te fai mea tonu, te loto fakamagalo mo te fakamaoni.”—Mataio 23:16, 23; Luka 11:42.

Ne taku ne Iesu a Falesaio ki “takitaki ‵kivi, e faka‵ma keatea ne [latou] a namu kae e folo ne koutou te kamela!” (Mataio 23:24) E faka‵ma ne latou a namu mai i olotou uaina ona ko te mea e se ‵ma i feitu tau tapuakiga. Kae ko te auala e fakaseaoga ei ne latou a feitu tāua o te Tulafono e fai pelā mo te folo kātoa o se kamela, se manu sē ‵ma foki i feitu tau tapuakiga, kae e lasi fakafia atu.—Levitiko 11:4, 21-24.