Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 128

Ne Seai Sena ‵Se ne Maua ne Pilato mo Helota

Ne Seai Sena ‵Se ne Maua ne Pilato mo Helota

MATAIO 27:12-14, 18, 19 MALEKO 15:2-5 LUKA 23:4-16 IOANE 18:36-38

  • NE ILOILO AKA A IESU NE PILATO MO HELOTA

Ne seki taumafai a Iesu o ‵funa mai i a Pilato me i a ia se tupu eiloa. Kae ne seki fakamataku eiloa tena Malo ki Loma. Ne fai atu a Iesu: “A toku Malo e sē se vaega o te lalolagi tenei. Moi fai a toku Malo se vaega o te lalolagi tenei, penei ka taua atu oku tino ke mo a eiloa e tuku atu au ki tino Iutaia. Kae ko toku Malo e se mai i lalo nei.” (Ioane 18:36) E tonu, e isi se Malo o Iesu, kae e se māfua mai i te lalolagi nei.

Ne seki fakagata atu eiloa ne Pilato a te mataupu i konā. Ne fesili atu a ia: “Ko tena uiga, a koe se tupu?” Ne manako a Iesu ke iloa ne Pilato me ko maua eiloa ne ia te tali tonu, tenā ne fai atu ei a ia: “Tenā eiloa e fai mai ne koe i a au se tupu. Tenā te pogai ne fanau mai ei au, kae tenā foki te pogai ne vau ei au ki te lalolagi, ko te mea ke molimau atu au ki te munatonu. A tino katoa kolā e ‵kau ki te feitu o te munatonu, e faka‵logo ki toku leo.”—Ioane 18:37.

Ne fai atu muamua a Iesu ki a Toma: “Au ko te auala mo te munatonu mo te ola.” Ne lagona foki ne Pilato a te pogai ne uga mai ei a Iesu ki te lalolagi ke molimau ki “te munatonu,” maise eiloa te munatonu e uiga ki tena Malo. Ne fakaiku aka ne Iesu ke fakamaoni a ia ki te munatonu tenā faitalia me e mafai o tamate a ia i ei. Ne fesili atu a Pilato: “Se a te munatonu?” kae ne seki faka‵tali tou tagata ki nisi fakamatalaga. Ne mafaufau a ia me ko lava loa ana mea ne lagona ke fakamasino ne ia te tagata tenei.—Ioane 14:6; 18:38.

Ne toe foki atu a Pilato ki te vaitino kolā ne faka‵tali mai tua o te palesi. Kāti ne tu atu eiloa a Iesu i ana tafa i te taimi ne fai atu ei a ia ki faitaulaga pule mo tino kolā ne ‵nofo fakatasi mo latou: “E se iloa ne au se mea e ‵se ei te tino tenei.” Ona ko te kaitaua ki te fakaikuga tenā, ne toe fai atu a te vaitino: “Ko fakamakosu ne ia a tino i ana akoakoga ne fai i Iuta kātoa, ne kamata mai i Kalilaia ke oko foki eiloa ki konei.”—Luka 23:4, 5.

Kāti ne ofo masei a Pilato i fakamatalaga sē ‵tonu a te kau Iutaia. I te taimi ne tumau eiloa te paka‵laga atu o faitaulaga pule mo nisi toeaina ma‵tua, ne fesili atu a Pilato ki a Iesu: “E a, e se lagona ne koe te uke o mea e ‵losi mai ne latou e uiga ki a koe?” (Mataio 27:13) Ne seki taumafai a Iesu ke tali atu. Ne ofo foki a Pilato i ana foliga filemu faitalia a ‵losiga ma‵sei.

Ne fakaasi atu ne te kau Iutaia me ne kamata a Iesu “mai i Kalilaia.” I te lagonaga ne Pilato a te fakamatalaga tenā, iloa ei ne ia me i a Iesu se tino Kalilaia. Ne tuku atu ei se auala manino ki a Pilato ke mafai ei o sao a ia mai te tiute ke fakamasino ne ia a Iesu. A Helota Anitipa (te tama tagata a Helota te Sili) ko te pule o Kalilaia, kae e nofo atu a ia i Ielusalema i te vaitaimi tenei o te Paseka. Tela la, ne uga atu ne Pilato a Iesu ki a Helota. Ko Helota Anitipa telā ne ‵kati ne ia te ua o Ioane te Papatiso. Fakamuli ifo, i te lagonaga ne ia a Iesu ko fai ne ia a galuega fakaofoofogia, ne manavase a Helota me i a Iesu kāti ko Ioane ko toetu aka mai te mate.—Luka 9:7-9.

Ko fiafia nei a Helota ke lavea ne ia a Iesu. E se fai pelā me ne manako ke fesoasoani atu ki a Iesu io me se taumafaiga tonu ke iloa aka me e ‵tonu eiloa a ‵losiga ne fai e uiga ki a ia. Ne fia logo fua a Helota, kae “ne fakamoemoe a ia ke lavea ne ia ne fakailoga e fai ne ia.” (Luka 23:8) Kae ne seki fakamalie aka ne Iesu te manakoga o Helota. A te ‵tonuga loa, i te taimi ne fakafesili ei ne Helota tou tagata, e seai eiloa se pati ne fai atu ne Iesu. Ona ko te sē fia‵fia, “ne fai fakamasei” ei ne Helota mo ana sotia a Iesu. (Luka 23:11) Ne fakapei ne latou a ia ki se gatu gali kae fakatauemu atu ki a ia. Oti aka, ne toe uga atu ne Helota a Iesu ki a Pilato. Ne fai fili muamua eiloa a Helota mo Pilato, kae ko fai nei mo taugasoa.

I te taimi ne toe foki atu ei a Iesu, ne fakamaopoopo ne Pilato a faitaulaga pule, tino pule o Iutaia, mo tino kae fai atu: “Ne aumai ne koutou te tagata tenei ki a au me ne fakamalosi ne ia a tino ke ‵teke ki a koutou. Kae kiloke! ko oti ne sukesuke ne au a ia i otou mua kae e seai eiloa sena ‵se i agasala katoa kolā ne ‵losi atu ne koutou ki a ia. E penā foki a Helota, ne toe uga mai ne ia tou tagata ki a tatou, kae kiloke! e seai sena mea ‵se ne fai e ‵tau ei o tamate. Tela la, ka fakasala ne au a ia, ko ‵tala atu ei.”—Luka 23:14-16.

Ne manako malosi a Pilato ke fakasaoloto a Iesu,  me ne iloa ne ia me ne tuku atu fua ne faitaulaga tou tagata ki a ia ona ko te loto ma‵sei. I te taimi ne taumafai ei a Pilato o fakasaoloto a Iesu, ne maua ne ia a nisi fakamalosiga ke fai te mea tenā. I te taimi ne sagasaga atu ei tou tagata i tena nofoga fakamasino, ne avatu ne tena avaga se fekau ki a ia: “Ke mo a eiloa e fai ne koe se mea masei ki te tagata amiotonu tenā, ne puapuaga malosi au i se moemiti i te aso nei ona ko ia.”—Mataio 27:19.

E mafai pefea o fakasaoloto ne Pilato te tagata tenei e seai sena ‵se, e pelā mo te mea ne ‵tau o fai ne ia?