Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 126

Taimi ne Fakafiti ei i te Fale o Kaiafa

Taimi ne Fakafiti ei i te Fale o Kaiafa

I te otiga ne puke fakapagota a Iesu i te fatoaga o Ketesemane, ne tiaki ne te kau apositolo a tou tagata kae ‵tele atu mo te ma‵taku. Kae e tokolua mai i a latou ne ‵tu. Ko Petelu “mo te suā soko,” ko te apositolo ko Ioane. (Ioane 18:15; 19:35; 21:24) Kāti ne oko atu lāua ki a Iesu i te taimi ne ave ei tou tagata ki te fale o Anasa. I te taimi ne uga atu ei ne Anasa a Iesu ki te Faitaulaga Sili, ko Kaiafa, ne tau‵tali ‵mao atu a Petelu mo Ioane. Kāti ne ma‵taku lāua kae ne manava‵se foki ki mea ka ‵tupu ki te lotou Matai.

Ne iloa ne te faitaulaga sili a Ioane kae ne mafai ei o ulu atu a ia ki te koga ateatea i te fale o Kaiafa. Ne nofo atu eiloa a Petelu mai tua o te mataloa ke oko ki te taimi ne foki atu ei a Ioane kae faipati ki se tavini fafine telā ne tu i te mataloa i te taimi tenā. Kae ne talia ne ia ke ulu atu a Petelu ki loto.

Ko oko eiloa i te ‵moko o te po tenā, telā e isi se afi e ka i te koga ateatea tenā. Ne saga‵saga fakatasi a Petelu mo latou i tafa o te afi o faka‵tali “ke onoono aka me ne a mea ka ‵tupu” ki te fono fakamasino o Iesu. (Mataio 26:58) Ona ko te mainaga o te afi, ne lavea faka‵lei atu ei a Petelu ne te tino tausi mataloa telā ne talia ne ia ke ulu atu tou tagata ki loto. “A koe foki se soko o te tagata tenei?” ne faipati ‵tonu atu tou fafine. (Ioane 18:17) Kae e se ko ia fua tokotasi ne lavea ne ia a Petelu kae ‵losi atu me ne ‵nofo fakatasi foki a ia mo Iesu.—Mataio 26:69, 71-73; Maleko 14:70.

Ne fanoanoa malosi a Petelu i te mea tenei. Ne taumafai a ia o fakaeteete, ke oko foki eiloa ki tena fanatu ki tua mo te mataloa. Tela la, ne fakafiti ne Petelu me ne oloolo sāle a ia mo Iesu, ke oko eiloa ki te fai atu: “E se iloa ne au a te tagata tenā kae e se malamalama foki au i au pati konā e fai mai.” (Maleko 14:67, 68) Ne kamata foki a ia “o tauto atu,” ko tena uiga, ne loto fiafia a ia o tauto atu ke fakamaoni aka te ‵tonu o ana pati kae ke fe‵paki a ia mo se fakalavelave faigata māfai e se ‵tonu ana pati.—Mataio 26:74.

I te taimi tenā, koi fai eiloa te fono fakamasino o Iesu, kāti i se koga i te fale o Kaiafa mai luga o te koga ateatea tenā. Kāti ne lavea ne Petelu mo nisi tino kolā ne faka‵tali a te solosolo atu ki loto mo tua a tino kese‵kese kolā ne olo atu o fai olotou molimau.

Ne fakaasi mai i te gaugaleo Kalilaia o Petelu me ne ‵se ana pati ne fai atu. E se gata i ei, e tokotasi mai te potukau tenā, e kāiga mo Maliko, telā ne ‵kati ne Petelu tena taliga. Tela la, ne momea aka eiloa te uke o ‵losiga ne fai ki a Petelu: “E se ko koe telā ne lavea ne au e ‵nofo fakatasi mo ia i te fatoaga?” I te taimi ne fakafiti ei ne Petelu a te mea tenei i te tolu o taimi, kae ne tagi te moa, e pelā eiloa mo te mea ne ‵valo mai.—Ioane 13:38; 18:26, 27.

I te taimi tenā, kāti ne kilo ifo a Iesu mai luga i te fakaosoga ki lalo i te koga ateatea. Ne ‵fuli atu a te Aliki kae kilo ‵tonu atu ki a Petelu, telā kāti ne logo‵mae malosi a Petelu i ei. Ne masaua ne ia a pati a Iesu ne fai i nai itula mai mua atu i te potu ne ‵kai latou i ei. Mafaufau la ki lagonaga o Petelu i te taimi ne iloa aka ei ne ia te masei o tena mea ne fai! Ne fanatu a Petelu ki tua kae ne tagi mautuutu i ei.—Luka 22:61, 62.

Ne mafai pefea o tupu te mea tenei? Ne mafai pefea ne Petelu—telā ne talitonu katoatoa ki tena malosi i te feitu faka-te-agaga mo tena alofa tumau—o fakafiti tena Matai? Ko oti eiloa ne ‵fuli ‵se te mea tonu, kae ko fai nei a Iesu e pelā me se tino amio solitulafono kae masei. I te taimi ne mafai ei o ‵lago atu a Petelu ki se tagata ‵lei, ne ‵fuli atu eiloa tena tua ki te Tino telā e nofo mo ia a “muna o te ola se-gata-mai.”—Ioane 6:68.

E fakaasi mai i te tala fakafanoanoa o Petelu me ke oko foki eiloa ki se tino fakatuanaki kae ko oti foki ne tuku katoatoa atu, e mafai o se paleni ‵lei ana mea e fai māfai e seki fakatoka faka‵lei a ia ki tofotofoga io me ko fakaosoosoga kolā e seki fakamoemoegina. Ke na fai eiloa a te fakaakoakoga a Petelu e pelā me se fakailoga ke fakaeteete a tavini katoa a te Atua!