Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 130

Ne Tuku Kae ‵Taki Atu a Iesu ke Tamate

Ne Tuku Kae ‵Taki Atu a Iesu ke Tamate

MATAIO 27:31, 32 MALEKO 15:20, 21 LUKA 23:24-31 IOANE 19:6-17

  • NE TAUMAFAI A PILATO O FAKASAOLOTO A IESU

  • NE TAKU FAKAMASEI A IESU KAE AVATU KE TAMATE

Faitalia te ‵ta fakamasei mo te fakatauemu atu ki a Iesu, ne seki talia ne faitaulaga pule mo tena kau a taumafaiga a Pilato ke fakasaoloto tou tagata. Ne seki ma‵nako eiloa latou ki se mea ke taofi aka ei te tamatega o Iesu. Ne tumau eiloa latou i te paka‵laga atu: “‵Tuki atu a ia ki te lakau! ‵Tuki atu a ia ki te lakau!” Ne tali atu a Pilato: “Puke la ne koutou a ia kae ‵tuki atu ki te lakau, me e seai se mea ‵se ne maua ne au i a ia.”—Ioane 19:6.

Ne seki fakatalitonu atu ne te kau Iutaia ki a Pilato me e ‵tau eiloa o tamate a Iesu ona ko pogai fakapolitiki, kae e a te ‵losiga i pogai fakalotu? Ne toe fai atu ne latou a te ‵losiga e uiga ki te pati masei telā ne fakasae aka i te fono o Iesu i mua o te Sanetulini. Ne fai atu latou: “E isi se motou tulafono, kae e ‵tusa mo te tulafono tenā e ‵tau o tamate a ia, me ne fai mai i a ia ko te tama a te Atua.” (Ioane 19:7) E fou eiloa a te ‵losiga tenei ki a Pilato.

Ne toe foki atu a Pilato ki loto i tena palesi kae taumafai o ‵sala se auala ke fakasaoloto ei a te tagata tenei telā ne kufaki mai lalo i faifaiga matagā, kae ne moemiti foki tena avaga e uiga ki ei. (Mataio 27:19) Kae e a te ‵losiga fou telā ko fai atu ne te kau Iutaia—me i te pagota ko te “tama a te Atua”? Ne iloa ne Pilato me i a Iesu se tino mai Kalilaia. (Luka 23:5-7) Kae ne fesili atu a ia ki a Iesu: “A koe se tino mai fea?” (Ioane 19:9) E mata, ne mafaufau a Pilato me ne ola muamua a Iesu i se koga, telā se tino mai i te lagi?

Ne lagona tonu eiloa ne Pilato mai i a Iesu me i a ia se tupu kae ko tena Malo e sē se vaega o te lalolagi tenei. Ne seki manakogina ke fakaukeuke atu ana pati ki ana fakamatalaga mua, telā ne nofo filemu ei a Iesu. Ne fakalogo‵mae atu ki te uiga fakamatamata o Pilato a tena sē tali atu, telā ne fai atu ei a ia mo te ita ki a Iesu: “A koe e se fia faipati mai ki a au? E se iloa ne koe me e isi saku pule o fakasaoloto koe kae e isi foki saku pule o tamate koe?”—Ioane 19:10.

Ne fai atu fua ei a Iesu: “E seai lele eiloa sau pule i luga i a au seiloga ko oti ne talia ke tuku atu te pule tenā ki a koe mai te lagi. Tenā te pogai e lasi atu ei te agasala a te tino telā ne tuku atu ne ia au ki a koe.” (Ioane 19:11) Kāti ne seki mafaufau fua a Iesu ki se tino e tokotasi. I lō te fai penā, ne mafaufau a ia ki a Kaiafa, tena kau, mo Iuta te Isikaliota kolā e ‵tau o ‵mafa atu te lotou fakasalaga i lō Pilato.

Ne ofo malosi a ia i uiga mo pati a Iesu, kae ne momea aka eiloa tena mataku me i a Iesu kāti se tino mai te lagi telā ne toe taumafai foki a Pilato o fakasaoloto a ia. Kae kāti ne fakasae aka foki ne tino Iutaia se mea telā ne manavase ki ei a Pilato. Ne fakamatakutaku atu latou: “Kafai e fakasaoloto ne koe a te tagata tenei, a koe e sē se taugasoa o Kaisala. So se tino e fai mai i a ia se tupu e ‵teke ki a Kaisala.”—Ioane 19:12.

Ne toe avatu ki tua ne te kovana a Iesu mō te ‵toe taimi, sagasaga ki luga i tena nofoga fakamasino, kae fai atu ki tino: “Kiloke! Tenei te otou tupu!” Kae e se talia eiloa ne te kau Iutaia tou tagata. Ne paka‵laga atu latou: “Ave keatea a ia! Ave keatea a ia! ‵Tuki atu a ia ki te lakau!” Ne toe fai atu a Pilato: “E a, ka tamate ne au te otou tupu?” Ko leva eiloa ne seki fia‵fia a te kau Iutaia ki te pulega a te kau Loma; telā ne fai atu ei a faitaulaga pule mo te loto ‵toa penei: “E seai se motou tupu kae na ko Kaisala.”—Ioane 19:14, 15.

Ona ko te mataku ki te manakoga sē alofa o te kau Iutaia, ne tuku atu ei ne Pilato a Iesu ke tamate. Ne ‵futi fakamasei ne sotia a te gatu ‵kula mai i a Iesu kae fakapei atu se gatu ‵loa ki ei. I te taimi ne takitaki atu ei a Iesu, ne ‵tau o amo ne ia tena lakau fakasaua.

Ko oko atu nei ki te taeao o te Aso Lima, Nisani 14. Kāti ne seki moe eiloa a Iesu mai te tafataeao o te Aso Fa kae ne fakafesagai atu eiloa a ia ki mea fakalogo‵mae kese‵kese e uke. I te taimi ne taumafai malosi ei a Iesu i te amoga o te lakau fakasaua, ne galo atu ei tena malosi. Tela la, ne faimalo ne sotia se tino i konā, ko Simona mai Kulene i Afelika, ke amo ne ia te lakau fakasaua ki te koga e fai ei te tamatega.  E tokouke a tino ne tau‵tali atu, kae ko nisi tino ne ‵tagi fanoa‵noa mo te loto mafatia ki mea ne ‵tupu.

Ne fai atu a Iesu ki fāfine loto mafatia: “Tama fāfine o Ielusalema, sa ‵tagi mai ki a au. I lō te fai penā, ‵tagi mō koutou eiloa mo otou tama‵liki; kae kiloke! ka oko mai a aso ka fai aka ei a tino penei, ‘Ka fia‵fia eiloa a fāfine sē afu, mo fāfine kolā e seki fa‵nau mo ū kolā e seki faū ki ei se pepe!’ Kae ka kamata o fai atu latou ki mauga, ‘Ma‵toli mai ki luga i a matou!’ kae ki tamā mauga ‘‵Funa aka matou!’ Kafai e fai ne latou a mea konei ki te lakau telā e ola ‵lei, se a la te mea ka tupu māfai ko magemage te lakau?”—Luka 23:28-31.

Ne fakasino atu a Iesu ki te fenua o te kau Iutaia. E fai pelā me se lakau ko pili o mate kae ne tai olaola malielie eiloa, me ne nofo atu a Iesu i konā kae penā foki mo nai tino Iutaia kolā ne tali‵tonu ki a ia. Kafai ko ave keatea a latou konei mai te fenua, ka ‵toe mai fua se fakapotopotoga telā e se ola ‵lei i te feitu faka-te-agaga, e pelā me se lakau ko mate. Ka ‵tagi mautuutu a tino i te taimi e gasue‵sue ei a kautau Loma e pelā me ne tino fakaokosala a te Atua ki te fenua tenā!