Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 135

Ne Fakasae Atu a Iesu Telā ko Toetu Aka ki Tino e Tokouke

Ne Fakasae Atu a Iesu Telā ko Toetu Aka ki Tino e Tokouke

LUKA 24:13-49 IOANE 20:19-29

  • NE FAKASAE ATU I TE AUALA KI EMAU

  • NE FAKAMAINA FAKA‵LEI ATU NE IA A TUSITUSIGA TAPU KI ANA SOKO

  • NE GATA ATU TE FAKALOTOLOTOLUA O TOMA

I te Aso Sa, i a Nisani 16, ne fanoa‵noa malosi a te kau soko. Ne seki malamalama latou i te uiga o te galo atu o te foitino mai te tanuga. (Mataio 28:9, 10; Luka 24:11) Fakamuli ifo, i te aso tenā, ne olo atu a Kaleopa mo te suā soko mai i Ielusalema ki Emau, telā kāti e fitu maila te ‵mao.

I te taimi ne sa‵sale atu ei lāua, ne sau‵tala eiloa lāua ki mea ne ‵tupu. Ne kau atu foki se tino fakaatea ki a lāua. Ne fesili atu tou tagata: “Ne a mea konei e sau‵tala koulua ki ei i te auala?” Ne tali atu a Kaleopa: “E a, a koe se tino fou e nofo tokotasi i Ielusalema kae e se iloa ne koe a mea ne ‵tupu i konā i aso konei?” Ne fesili atu a te tino fakaatea tenei ki a lāua: “Ne a mea konā?”—Luka 24:17-19.

“Ko mea e uiga ki a Iesu te Nasaleta,” ne fai atu lāua. “Kae ne fakamoe‵moe matou me tenei eiloa te tagata ka fakasao ne ia a Isalaelu.”—Luka 24:19-21.

Ne fakamatala atu ei ne Kaleopa mo tena taugasoa a mea katoa ne ‵tupu i te aso eiloa tenā. Ne fai atu lāua me ne olo atu a nisi fāfine ki te tanuga telā ne tanu ei a Iesu kae e seai lele se foitino i ei, kae ne lavea ne fāfine konei a mea fakaofoofogia ne ‵tupu—te faka‵saeatuga o agelu kolā ne fai atu me ko toe ola a Iesu. Ne fai atu foki ne lāua me ne olo atu a nisi tino ki te tanuga “kae ne maua atu ne latou me e ‵tonu a mea kolā ne fai mai ne fāfine konā.”—Luka 24:24.

Ne ‵segi masei eiloa a soko e tokolua konā ki te uiga o te mea ne tupu. Ne tali atu a te tino fakaatea tenei e pelā me se tino e isi sena pule ke faka‵tonu aka lā mafaufauga ‵se, telā ne otia i ei lā loto: “Ko oko eiloa koulua i te va‵lea kae fui tali‵tonu ki mea katoa kolā ne fai mai ne pelofeta! E a, ne seki ‵tau o puapuagatia a te Keliso i mea konei ko te mea ke ulu atu a ia ki loto i tena tulaga ‵malu?” (Luka 24:25, 26) Ne fakamatala atu ei ne ia a tusi siki e uke mai te Tusi Tapu e uiga ki te Keliso.

Fakamuli loa, ne oko atu latou ki Emau. Ne ma‵nako a soko e tokolua ke fakalogo‵logo ki mea e uke atu, telā ne fakamalosi atu ei lāua ki te tino fakaatea tenei: “Vau ke ‵nofo tatou, me ko pili o po.” Ne lotomalie tou tagata ke nofo atu ke ‵kai latou. I te taimi ne ‵talo ei a te tino fou tenei, ne tofitofi ne ia te falaoa, kae tuku atu ki a lāua, ne iloa ei ne lāua me ko oi a ia, kae ne fakagalo fakavave atu a ia. (Luka 24:29-31) Nei la, ko mautinoa eiloa i a lāua me i a Iesu ko toe ola!

Ne fakamatala mai mo te fia‵fia ne soko e tokolua konei a mea ne lagona ne lāua: “E a, e seki otia ‵ta loto i ana pati kolā ne fai mai ki a tāua i te auala, i te taimi ne fakamaina faka‵lei mai ei ne ia a Tusitusiga Tapu ki a tāua?” (Luka 24:32) Ne toe ‵foki fakavave atu lāua ki Ielusalema, telā ne oko atu ei lāua ki te kau apositolo mo nisi tino kolā ne ‵nofo mai mo latou. A koi tuai o fai atu ne Kaleopa mo tena taugasoa te lā tala, ne lagona ne lāua a nisi tino e fai atu: “Se mea tonu eiloa me ko oti ne toetu aka te Aliki kae ne fakasae atu ki a Simona!” (Luka 24:34) Tenā ne fakamatala atu ei ne te tokolua konā a te auala ne fakasae atu ei a Iesu ki a lāua. Ao, ne molimau foki lāua ki ei.

Ne ‵poi a tino katoa—ne fakasae atu a Iesu i te potu! Ne seki tali‵tonu latou ki te mea tenei me ne ‵loka a mataloa ona ko te lotou ma‵taku i tino Iutaia. Ne tu atu eiloa a Iesu i va o latou kae ne ata faipati atu a ia: “Ke i luga i a koutou te filemu.” Kae ne ma‵taku latou. E pelā mo te mea ne oko atu muamua ki a latou, ne “mafau‵fau latou me ko lavea ne latou se agaga.”—Luka 24:36, 37; Mataio 14:25-27.

Ne tu atu loa a Iesu mo tena foitino faka-te-tagata ke fakamaoni atu me i a ia e sē se aitu io me se mea telā e mafau‵fau latou ki ei, telā ne fakaasi atu ei ne ia ana lima mo ana vae kae fai atu: “Kaia e ma‵taku ei koutou, kae kaia e fakalotolotolua ei koutou? ‵Kilo mai ki oku lima mo oku vae me ko au eiloa tenei; puke mai ki a au kae ka lavea ne koutou me i te agaga e seai ne ana ‵kano mo ivi, e pelā mo te mea e lavea ne koutou i a au.” (Luka 24:36-39)  Ne fia‵fia kae ōfo malosi latou kae koi se tali‵tonu eiloa a nisi tino.

Ne toe taumafai a ia ke fesoasoani atu ke iloa ne latou me ko ia eiloa tenā, ne fesili atu ei a ia: “E isi ne otou meakai ke kai aka au?” Ne talia ne ia se potu ika ne tātā kae kai ki ei. Telā ne fai atu ei a ia: “Konei la aku pati ne fai atu kae koi ‵nofo fakatasi tatou [a koi tuai au o mate], me i mea katoa kolā ne tusi i te Tulafono a Mose mo tusi a Pelofeta mo Salamo e uiga ki a au, e ‵tau eiloa o fakataunu.”—Luka 24:41-44.

Ne fesoasoani atu a Iesu ki a Kaleopa mo tena taugasoa ke malamalama i Tusitusiga, kae nei la, ko fesoasoani atu a ia ki a latou katoa kolā e maopoopo atu i konā: “Tenei te mea ne tusi: me i te Keliso ka puapuaga kae toetu aka mai te mate i te tolu o aso, kae e auala i tena igoa, ka talai atu ei te salamō mo te fakamagaloga o agasala ki atufenua katoa—e kamata mai i Ielusalema. Kae ka fai koutou mo molimau ki mea katoa konei.”—Luka 24:46-48.

E se iloa me se a te pogai, kae ne galo a te apositolo ko Toma i konā. Mai tua ifo, ne fai atu eiloa mo te fia‵fia ne nisi tino ki a ia: “Ko oti ne lavea ne matou te Aliki!” Ne tali atu a Toma: “E se talitonu eiloa au seiloga ke lavea ne au i ana lima a pūga o fao kae faulu toku maikao ki ei kae faulu atu foki toku lima ki tena kaokao.”—Ioane 20:25.

I te valu o aso mai tua ifo, ne toe maopoopo a soko i se potu telā ne lokaloka a mataloa, kae ne nofo atu i ei a Toma. Ne fakasae atu a Iesu i te va o latou i se foitino faka-te-tagata kae fakatalofa atu ki a latou: “Ke i luga i a koutou te filemu.” I te ‵fuliatuga ki a Toma, ne fai atu a Iesu: “Tuku mai tou maikao ki konei, kae onoono ki oku lima, faulu tou lima ki toku kaokao, ke na talitonu kae fakagata te fakalotolotolua.” Ne pakalaga atu ei a Toma mo te fiafia: “Toku Aliki mo toku Atua!” (Ioane 20:26-28) E tonu, ko se toe fakalotolotolua nei a ia me i a Iesu ko toe ola mai e pelā me se atua telā ko te sui o Ieova te Atua.

Ne fai atu a Iesu: “E a, e talitonu koe me ko oti ne lavea ne koe au? E fia‵fia eiloa a tino kolā e se lavea ne latou kae e tali‵tonu.”—Ioane 20:29.