Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

 MATAUPU 104

Ne Lagona ne te Kau Iutaia a te Leo o te Atua​—Ka Fakaasi Atu ne Latou te Fakatuanaki?

Ne Lagona ne te Kau Iutaia a te Leo o te Atua​—Ka Fakaasi Atu ne Latou te Fakatuanaki?

IOANE 12:28-50

  • NE LAGONA NE TINO E TOKOUKE TE LEO O TE ATUA

  • TE FAKAVAE MŌ TE FAKAMASINOGA

I te faletapu i te Aso Gafua, i te po 10 o Nisani, ne faipati a Iesu e uiga ki tena mate telā ko pili mai. Ona ko te mafaufau ki mea e mafai o pokotia ei te Atua, ne fai atu a Iesu: “Toku Tamana, faka‵malu tou igoa.” Ne oko ifo se leo malosi mai te lagi, penei: “Ko oti ne faka‵malu ne au kae ka toe faka‵malu foki ne au.”—Ioane 12:27, 28.

Ne ‵segi malosi a tino kolā ne ‵tu pili atu. Ne mafau‵fau a nisi tino me ne lagona ne latou a fa‵tili. Muna a nisi tino: “Ne faipati atu se agelu ki a ia.” (Ioane 12:29) Kae ko Ieova eiloa telā ne fatoa lagona ne latou! Kae e se tenei eiloa te taimi muamua ne lagona ei ne tino a te leo o te Atua e faipati e uiga ki a Iesu.

I te papatisoga o Iesu, i te tolu mo te āfa tausaga mai mua atu i ei, ne lagona ne Ioane te Papatiso a pati konei a te Atua e uiga ki a Iesu: “Tenei eiloa taku Tama, ko taku fagasele telā ko oti ne talia ne au.” Fakamuli ifo, mai tua o te Paseka i te 32 T.A., ne ‵fuli i ei a foliga o Iesu i mua o Iakopo, Ioane mo Petelu. Ne lagona ne tāgata e tokotolu konā a pati konei a te Atua: “Tenei eiloa taku Tama, ko taku fagasele telā ko oti ne talia ne au. Faka‵logo ki a ia.” (Mataio 3:17; 17:5) Kae nei la, ko faipati mai a Ieova i se auala telā e lagona ne tino e tokouke!

Ne fai mai a Iesu: “E seki oko mai te leo tenei ona ko au, kae mō koutou.” (Ioane 12:30) Ne fakamaoni mai i ei me i a Iesu ko te Tama tonu eiloa a te Atua, ko te Mesia telā ne ‵valo mai.

E sili atu i ei, e tuku mai eiloa ne te olaga fakamaoni o Iesu a te auala e ‵tau o ola i ei a tino, kae e fakamautinoa aka ei me i a Satani te Tiapolo, ko te pule o te lalolagi telā e ‵tau o tamate. Ne fai mai a Iesu: “Nei la, ka fakamasinogina te lalolagi tenei; kae ko te pule o te lalolagi tenei ka ‵tuli keatea.” I lō te takavale, a te mate o Iesu telā ko pili mai, e fakaasi mai i ei a te manumaloga. E pefea la? Ne fakamatala mai ne ia: “Kae kafai ko sisi aka au ki luga mai te lalolagi, ka ‵futi mai ne au a vaegā tino katoa ki a au.” (Ioane 12:31, 32) E auala i tena mate i luga i te lakau fakasaua, ka fai ne Iesu ke tosina atu a nisi tino ki a ia ko te mea ke maua foki ne latou te ola se-gata-mai.

Kae ne tali atu a te vaitino ki pati a Iesu e uiga ki tena “sisi aka” ki luga: “Ne lagona ne matou mai te Tulafono me i te Keliso e tumau ki te se-gata-mai. Kae e pefea o fai mai koe me i te Tama a te tagata e ‵tau o sisi aka ki luga? Ko oi te Tama a te tagata tenei?” (Ioane 12:34) E tiga eiloa te uke o fakamaoniga, e aofia i ei te lagonaga ne latou o te leo totino o te Atua, ne seki talia ne te tokoukega o tino me i a Iesu ko te Tama tonu a te tagata, ko te Mesia telā ne folafola mai.

Kae e pelā mo te mea ne fai muamua ne ia, ne fakasino atu a Iesu ki a ia eiloa e pelā me ko te “mainaga.” (Ioane 8:12; 9:5) Ne fakamalosi atu a ia ki te vaitino: “Ka nofo te mainaga i a koutou i se taimi toetoe fua. Sa‵sale a koi maua ne koutou te mainaga, ko te mea ke se taka‵vale koutou i te pouliga . . . Ke fakatuanaki koutou ki te mainaga i te taimi e nofo ei i a koutou a te mainaga, ko te mea ke fai koutou mo tama o te mainaga.” (Ioane 12:35, 36) I te otiga, ne fano keatea ei a Iesu me i te po 10 o Nisani e se ko te aso e ‵tau ei o mate a ia. E ‵tau o “sisi aka” a ia—o ‵tuki ki luga i te lakau fakasaua, i te Paseka i a Nisani po 14.—Kalatia 3:13.

A te ‵toe mafaufau ki te taviniga a Iesu, e manino ‵lei me ne fakataunu eiloa te valoaga i te taimi ne seki fakatuanaki ei a tino Iutaia ki a ia. Ne ‵valo mai ne Isaia me ka ‵kivi a mata o tino kae ka loto ma‵keke foki latou ke ‵fuli ko te mea ke maua se faka‵leiga. (Isaia 6:10; Ioane 12:40) E tonu, a te tokoukega o tino Iutaia ne ‵teke atu eiloa ki fakamaoniga me i a Iesu ko te Tino ka faka‵sao ne ia latou, te auala ki te ola.

A Nikotemo, Iosefa te Alimataia, mo nisi tino pule “ne fakatuanaki” ki a Iesu. Kae e mata, ka gasue‵sue latou i te fakatuanaki, io me ka fakatalave latou ona ko te manava‵se i a latou ma ‵tuli keatea mai te sunako io me e ma‵nako latou “ki tavaega mai tino”?—Ioane 12:42, 43.

Ne fakamatala mai foki eiloa ne Iesu a mea e aofia i te fakatuanaki: “So se tino e fakatuanaki mai ki a au,  e se fakatuanaki mai fua ki a au, kae ki a ia foki telā ne uga mai ne ia au; kae ko so se tino e lavea ne ia au e lavea foki ne ia a te Tino telā ne uga mai ne ia au.” A muna‵tonu kolā ne akoako ne te Atua ki a Iesu kae ne folafola mai faeloa ne Iesu e tāua ‵ki telā ne fai mai ei a ia: “So se tino e se fia saga mai ki a au kae e se talia ne ia aku pati e isi se tino e fakamasino ne ia a te tino tenā. A pati kolā e fai atu ne au e fakamasino ei a ia i te aso fakaoti.”—Ioane 12:44, 45, 48.

Ne fakaoti penei ne Iesu ana pati: “Me ne seki fai atu ne au a pati konā i a au eiloa, kae ko te Tamana telā ne uga mai ne ia au ne tuku mai ne ia te fakatonuga ki a au ki mea kolā e ‵tau o fakailoa atu kae faipati au ki ei. Kae e iloa ne au me e fakauiga tena fakatonuga ki te ola se-gata-mai.” (Ioane 12:49, 50) Ne iloa ne Iesu me ko pili o ‵ligi atu tena toto totino eiloa e pelā me se taulaga mō tino kolā e fakatuanaki ki a ia.—Loma 5:8, 9.