Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 117

Te ‵Kaiga a te Aliki i te Afiafi

Te ‵Kaiga a te Aliki i te Afiafi

MATAIO 26:21-29 MALEKO 14:18-25 LUKA 22:19-23 IOANE 13:18-30

  • NE TAKU A IUTA KO TE TINO FAKATOGAFITI TINO

  • NE KAMATA NE IESU A TE ‵KAIGA O TE FAKAMANATUGA

Mai mua malie atu o te afiafi tenei, ne akoako atu ne Iesu ki ana apositolo se akoakoga e uiga ki te loto maulalo mai te ‵fuluga o olotou vae. Nei la, kāti mai tua o te ‵kaiga o te Paseka, ne siki atu ne ia a pati fakavaloaga a Tavita: “E oko foki eiloa ki toku taugasoa pele, te tino telā e tafasili toku fakalagolago ki ei, te tino telā e ‵kai fakatasi sāle mo au, ko fai fili ki a au.” Ne fakamatala atu ei ne ia: “Au ka fakatogafiti ne se tokotasi o koutou.”—Salamo 41:9; Ioane 13:18, 21.

Ne fakatau kilo‵kilo atu a te kau apositolo i a latou eiloa, kae fesili atu: “Te Aliki, e a, e se ko au?” Ne fesili atu eiloa penā a Iuta te Isikaliota. Ne fakamalosi atu a Petelu ki a Ioane, telā ne sagasaga atu i tafa o Iesu i te taipola, ke onoono aka me ko oi te tino tenā. Tela la, ne fakapale pili atu a Ioane ki a Iesu kae fesili atu: “Te Aliki, ko oi a te tino tenā?”—Mataio 26:22; Ioane 13:25.

Ne tali atu a Iesu: “Ko ia telā ka tuku ne au ki ei ne mu falaoa ko oti ne ufi ki vai.” I te otiga ne ufi ne ia mu falaoa ki loto i tetifa vai i luga i te taipola, ne tuku atu ei ne ia ki a Iuta, kae fai atu: “A te Tama a te tagata ka fano eiloa keatea, e pelā loa mo mea ne tusi e uiga ki a ia, kae kalofa eiloa a te tagata telā e fakatogafiti ne ia te Tama a te tagata! E ‵lei atu moi ne se fanau mai te tagata tenā.” (Ioane 13:26; Mataio 26:24) Ne ulu atu ei a Satani ki loto i a Iuta. Ko oti ne amio sē fakamaoni a te tagata tenei, kae nei la ko tuku atu eiloa a ia ke fai te loto o te Tiapolo telā ne fai ei a ia mo fai “te tama o te fakamaseiga.”—Ioane 6:64, 70; 12:4; 17:12.

Ne fai atu a Iesu ki a Iuta: “A te mea telā e mafaufau koe o fai ke na fai fakavave nei.” Ne mafau‵fau a nisi apositolo me i a Iuta, telā e tausi ne ia te pokisi tupe, ne fai atu ki ei te fakatonuga tenei: “‘‵Togi a mea kolā e manakogina ne tatou mō te ‵kaiga’ io me e ‵tau o tuku atu ne ia ne mea ki tino ma‵tiva.” (Ioane 13:27-30) I lō te fai penā, ne fanatu eiloa a Iuta i tena auala ke fakatogafiti a Iesu.

I te afiafi foki eiloa tenā o te ‵kaiga o te Paseka, ne  fai ei ne Iesu se vaegā ‵kaiga fou. Ne puke ne ia te falaoa, fai te ‵talo fakafetai, ne tofitofi kae tuku atu ki ana apositolo ke ‵kai ki ei. Ana muna: “E fakauiga te mea tenei ki toku foitino telā ka tuku atu mō koutou. Ke fai faeloa te mea tenei mo fai se fakamasauaga ki a au.” (Luka 22:19) Ne fakateka atu a taki potu falaoa, kae ne ‵kai ki ei a te kau apositolo.

Nei la, ko puke aka ne Iesu se ipu uaina, ne fai se ‵talo fakafetai e uiga ki ei, kae fakateka atu foki ki a latou. Ne inu katoa latou mai te ipu, telā ne fai atu ei a Iesu: “E fakauiga a te ipu tenei ki te feagaiga fou e auala i toku toto, telā ka ‵ligi ki tua mō koutou.”—Luka 22:20.

Ne fakatoka ne Iesu a te fakamanatuga o tena mate ke fai faeloa ne ana soko i tausaga takitasi i a Nisani 14. Ka fakamasaua atu ei a mea ne fai ne Iesu mo tena Tamana ko te mea ke mafai o fakasaoloto a tāgata fakatuanaki mai te agasala mo te mate. E sili atu eiloa i te aoga i lō te Paseka mō tino Iutaia, me e tuku mai i ei a te fakasaolotoga tonu o tino tali‵tonu.

Ne fai mai a Iesu me “ka ‵ligi ki tua mō tino e tokouke ke fakamagalo ei agasala.’ E aofia i tino e tokouke kolā ka maua ne latou a te vaegā fakamagaloga penā o agasala, ko ana apositolo mo nisi tino e pelā mo latou. Ko latou kolā ka ‵kau fakatasi mo ia i te Malo o tena Tamana.—Mataio 26:28, 29.