Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 138

Ko Nofo Atu a Keliso i te Feitu Fakaatamai o te Atua

Ko Nofo Atu a Keliso i te Feitu Fakaatamai o te Atua

GALUEGA 7:56

  • NE SAGASAGA A IESU I TE FEITU FAKAATAMAI O TE ATUA

  • KO FAI A SAULO MO FAI SE SOKO

  • E MAUA NE TATOU A POGAI ‵LEI KE FIA‵FIA

Mai tua o aso e sefulu ne fanaka ei a Iesu ki te lagi, ne ‵ligi ifo ei a te agaga tapu i te aso o te Penitekoso, telā ne tuku mai i ei a fakamaoniga me ko nofo atu eiloa a ia i te lagi. Kae ko pili foki o fakaasi atu a te suā fakamaoniga. Mai mua faeloa o peipei a Setefano ke mate ona ko tena molimau atu mo te fakamaoni, ne fai atu a ia: “Kiloke! ko lavea ne au te lagi e matala mo te Tama a te tagata e tu i te feitu fakaatamai o te Atua.”—Galuega 7:56.

I te taimi ne nofo atu ei a ia mo tena Tamana i te lagi, ne ‵tau o faka‵tali a Iesu ki se fakatonuga mautinoa telā ne ‵valo mai i te Muna a te Atua. Ne fakaosofia a Tavita ke tusi mai: “Muna a te Aliki [Ieova] ki toku aliki [Iesu], te tupu, ‘Nofo i konei i toku feitu fakaatamai, ke oko ki te taimi e tuku atu ei ne au ou fili ke nofo mai lalo o ou vae.’” (Salamo 110:1, 2) Kae ne a mea e fai ne Iesu mai te lagi i te taimi e faka‵tali ei a ia ke taua atu ki ana fili?

I te Penitekoso 33 T.A., ne fakatu aka ei te fakapotopotoga Kelisiano. Ne kamata o pule mai a Iesu i te lagi ki luga i ana soko fakaekegina. (Kolose 1:13) Ne takitaki ne ia latou i te lotou galuega talai kae fakatoka latou mō te lotou tulaga i aso mai mua. Se a te tulaga tenā? Ka faka‵tu aka fakamuli a tino kolā e fakamaoni ke oko ki te mate kae ke tavini atu e pelā me ne tupu fakatasi mo Iesu i te Malo.

A te suā fakaakoakoga fakaofoofogia o te tino telā ka fai mo fai se tupu i aso mai mua ko Saulo, telā ne lauiloa i tena igoa Loma ko Paulo. A iase tino Iutaia telā ko leva ne loto finafinau mō te Tulafono a te Atua, kae ne faka‵segina ne takitaki lotu Iutaia telā ne ‵lago atu foki a ia ki te peipeiga o Setefano ki fatu ke mate. Ona ko te “tumau eiloa i te fakamatakutaku kae fia tamate ne ia a soko o te Aliki,” ne fanatu a Saulo ki Tamaseko. Ne tuku atu ne te Faitaulaga Sili ko Kaiafa a te taliaga ke puke fakapagota ne ia a soko o Iesu kae avatu ki Ielusalema. (Galuega 7:58; 9:1) Kae i te taimi ne fanatu ei i tena auala, ne oko fakapoi atu se mainaga lasi ki a ia kae ne siga ifo ei a ia ki te laukele.

“Saulo, Saulo, kaia e fakasaua ei ne koe au?” ne kalaga atu se leo mai i se tino sē matea. “Te Aliki, ko oi koe?” ne fesili atu a Saulo. “Ko au ko Iesu, telā e fakasaua koe ki ei.” ko te tali.—Galuega 9:4, 5.

Ne fai atu a Iesu ki a Saulo ke fanatu ki Tamaseko  kae faka‵tali i konā mō nisi fakatonuga, kae ne ‵tau o takitaki atu a ia ki te fa‵kai me ne ‵kivi ana mata mai te mainaga fakaofoofogia tenā. I se isi fakaasiga, ne fakasae atu a Iesu ki a Anania, se tokotasi o ana soko i Tamaseko. Ne fai atu a Iesu ki a Anania ke fanatu ki te koga e tasi o ‵sala atu ki a Saulo. Ne tai fakatalave a Anania ke fai te mea tenā, kae ne fakatalitonu atu penei a Iesu ki a ia: “Me i te tagata tenei ko oti ne filifili ne au ke fakailoa atu a toku igoa ki fenua fakaa‵tea e pelā foki mo tupu mo te fanauga a Isalaelu.” Ne toe ‵lei a mata o Saulo, kae i konā eiloa i Tamaseko, “ne talai atu a ia e uiga ki a Iesu i loto i sunako, me i a Ia tenei ko te Tama a te Atua.”—Galuega 9:15, 20.

Mai te fesoasoani o Iesu, ne fai ei ne Paulo mo nisi tino talai a te galuega talai telā ne kamata ne Iesu. Ne fakamanuia eiloa ne te Atua a latou ki ikuga fakaofoofogia o te lotou galuega. Kāti i se 25 tausaga mai tua o te fakasaeatuga o Iesu ki a ia i te auala ki Tamaseko, ne tusi atu a Paulo me i te tala ‵lei “ko oti ne talai atu ki tino katoa mai lalo o te lagi.”—Kolose 1:23.

I te fia o tausaga mai tua ifo, ne tuku atu ne Iesu ki te apositolo telā e alofa malosi a ia ki ei, ko Ioane se fakasologa o fakaasiga, kolā e maua i te tusi o te Tusi Tapu ko Fakaasiga. E auala i fakaasiga konei, ne ola eiloa a Ioane ke lavea atu ne ia a te ‵toe foki mai o Iesu i te malosi o te Malo. (Ioane 21:22) “Mai i te fakamalosiga a te agaga ne oko atu ei [Ioane] ki te aso o te Aliki.” (Fakaasiga 1:10) Ko te taimi fea i ei tenā?

E fakaasi mai e auala i te sukesuke faka‵lei ki te Tusi Tapu me i “te aso o te Aliki” ne kamata i ‵tou aso nei. I te 1914, ne tupu ei a te Taua Muamua a te Lalolagi. Kae i te fia sefulu tausaga talu mai te taimi tenā, ne fakamailoga ki taua, masaki, fiakai, mafuie, mo nisi fakamaoniga kolā e fakamailoga ei a te fakataunuga tai lasi atu o “te fakailoga” telā ne tuku atu ne Iesu ki ana apositolo e uiga ki tena “fakatasi mai” mo “te gataga.” (Mataio 24:3, 7, 8, 14) Ko fai nei te talaiatuga o te tala ‵lei o te Malo, e se fai fua i kogā koga o te Emupaea Loma, kae i te lalolagi kātoa.

Ne fakaosofia a Ioane ke fakamatala mai ne ia a te uiga o te mea tenei: “Ko oko mai nei te fakaolataga mo te malosi mo te malo o te ‵tou Atua, penā foki loa mo te pulega a tena Keliso.” (Fakaasiga 12:10) Ao, a te Malo o te Atua i te lagi, telā ne folafola malosi atu ne Iesu, se mea tonu eiloa!

A te mea tenā se tala gali ‵ki mō soko fakamaoni katoa o Iesu. Ne mafai o lotoma‵lie latou ki pati konei a Ioane: “Ona ko te mea tenā ke fiafia koe, e te lagi, fakatasi mo koutou kolā e ‵nofo atu i ei! Kae ko malaia eiloa te lalolagi mo te tai, me ko oti ne fanaifo te Tiapolo ki a koulua, kae ko oko eiloa i te kaitaua me e iloa ne ia i tena taimi ko toetoe.”—Fakaasiga 12:12.

Tela la, ko se toe sagasaga nei a Iesu i te feitu fakaatamai o tena Tamana. Ko pule mai nei a ia e pelā me ko te Tupu, kae ko pili o fakaseai atu ne ia ana fili katoa. (Epelu 10:12, 13) Ne a mea ‵gali kolā koi faka‵tali tatou ke ‵tupu?