Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 125

Ne Avatu a Iesu ki a Anasa, Kae Oti Aka ki a Kaiafa

Ne Avatu a Iesu ki a Anasa, Kae Oti Aka ki a Kaiafa

MATAIO 26:57-68 MALEKO 14:53-65 LUKA 22:54, 63-65 IOANE 18:13, 14, 19-24

  • NE AVATU A IESU KI TE FAITAULAGA SILI MUA, KO ANASA

  • NE FAI NE TE KAU SANETULINI SE FONO SĒ TONU

I te otiga ne saisai a Iesu e pelā me se tino solitulafono masani, ne ‵taki atu ei a ia ki a Anasa, telā ko te faitaulaga sili i te taimi koi foliki ei a Iesu, kae fai ne ia ke ōfo a faiakoga i te faletapu. (Luka 2:42, 47) Ne tavini fakamuli atu a nisi tama tāgata a Anasa e pelā me ne faitaulaga sili, kae ko maua nei ne Kaiafa, te avaga a tena tama, a te tulaga tenā.

I te taimi koi nofo atu ei a Iesu i te fale o Anasa, ne lava eiloa te taimi mō Kaiafa ke fakatoka te fono o te Sanetulini. E aofia i te fono tenā a sui e toko 71 kae e aofia foki i ei a te faitaulaga sili mo nisi tino kolā ne maua ne latou te tulaga tenā.

Ne fakafesili ne Anasa a Iesu “e uiga ki ana soko mo ana akoakoga.” Ne tali atu fua penei a Iesu: “Au ne faipati atu i mua o tino katoa. Au ne akoako atu faeloa i sunako mo te faletapu, ko koga kolā ne maopoopo faeloa i ei a tino Iutaia, kae e seai ne aku pati ne fai ‵funa. Kaia e fesili mai ei koe ki a au? Fesili atu ki tino kolā ne lagona ne latou aku pati ne fai ki a latou. Kiloke! Konei a tino e iloa ne latou aku pati ne fai.”—Ioane 18:19-21.

E isi se ofisa ne tūtū atu i konā, ne ‵pa ne ia a mata o Iesu kae fai atu mo te sē fiafia: “E mata, e ‵tau o faipati atu koe penā ki te faitaulaga pule?” Kae ona ko te mea ne iloa ne Iesu me e seai sena mea ‵se ne fai, ne fai atu ei a ia: “Kafai e ‵se aku pati, fakamaoni mai la me kaia e ‵se i ei; kae kafai e ‵tonu aku pati, kaia la ne ‵pa ei ne koe au?” (Ioane 18:22, 23) Ne fai ei a Anasa ke avatu keatea a Iesu ki te avaga a tena tama, ko Kaiafa.

 Nei la, ko maopoopo katoa a tino kolā e aofia i te Sanetulini—ko te faitaulaga sili, toeaina, mo failautusi. Ne maopoopo latou i te fale o Kaiafa. Ne seki ‵tau o fai se vaegā fono penā i te po o te Paseka, kae ne seki taofi aka ne te mea tenei olotou taumafaiga ma‵sei.

Ne fakailoga tino eiloa a te potukau tenā. I te otiga ne fakatu ne Iesu a Lasalo, ne fakaiku aka ne te Sanetulini me e ‵tau o mate a Iesu. (Ioane 11:47-53) Kae i nai aso ko ‵teka, ne aofaga a takitaki lotu ke puke kae tamate a Iesu. (Mataio 26:3, 4) Ao, kae koi tuai o fai tena fono, ne mautinoa eiloa i a latou me e ‵tau eiloa o fakasala a Iesu ki te mate!

I tafa o te fono sē tonu tenā, ne taumafai foki a faitaulaga pule mo nisi sui o te Sanetulini o ‵sala atu ki molimau kola ka tuku atu ne latou a fakamaoniga ‵loi ke fakasala eiloa a Iesu. E tokouke a molimau ne maua ne latou, kae ne seki fetaui a fakamatalaga konei ki olotou fakamaoniga. I te fakaotiga loa, ne ‵mai a tino e tokolua kae fai atu: “Ne lagona ne matou ana muna konei, ‘Ka lepe ne au ki lalo te faletapu tenei ne faite ne tino, kae ka toe fakatu aka ne au se isi faletapu i aso e tolu kae e se faite ne tino.’” (Maleko 14:58) Kae ne seki lotoma‵lie katoatoa a tāgata konei ki ei.

Ne fesili atu a Kaiafa ki a Iesu: “E a, e seai sau tali? Ne a mea kolā e molimau ki ei a tino konei e uiga ki a koe?” (Maleko 14:60) Ne seki tali atu eiloa a Iesu ki ‵losiga ‵loi ne fai ne molimau kolā ne seki fetaui lā tala. Tela la, ne ‵fuli atu a te Faitaulaga Sili ko Kaiafa ki se isi togafiti.

Ne iloa ne Kaiafa me ne fai fakaa‵tea a lagonaga o te kau Isalaelu māfai e isi se tino e fai atu me i a ia ko te Tama a te Atua. Mai mua atu i ei, i te taimi ne taku ei ne Iesu a te Atua ki tena Tamana, ne ma‵nako a te kau Iutaia ke tamate a ia ona ko te lotou mafaufau me ko fai ne ia a ia ke “‵pau mo te Atua.” (Ioane 5:17, 18; 10:31-39) Ona ko te iloa ‵lei ne ia o te mea tenā, ne fakatonu atu mo te amio ‵pelo a Kaiafa ki a Iesu: “Au e fai atu ki a koe ke tauto mai koe i mua o te Atua ola me i a koe ko te Keliso te Tama a te Atua!” (Mataio 26:63) Ne taku ‵tonu atu ne Iesu me i a ia ko te Tama a te Atua. (Ioane 3:18; 5:25; 11:4) Kafai e seai ne ana pati e fai atu, e mafai o fai pelā me ko fakafiti ne ia te manatu me i a ia ko te Tama a te Atua mo te Keliso. Tela la, ne fai atu a Iesu: “Ao, kae ka lavea ne koutou a te Tama a te tagata e sagasaga i te feitu fakaatamai o te tino i o ia te malosi kae vau foki i kaumana o te lagi.”—Maleko 14:62.

I konei, ne saesae ne Kaiafa tena gatu kae fai atu: “Ko muna masei a ia ki te Atua! Kaia e toe ‵sala ei tatou ki nisi molimau? Kiloke! Ko oti eiloa ne lagona ne koutou ana muna ma‵sei e uiga ki te Atua. Se a te otou faka‵tau?” Ne fai ei ne te Sanetulini a te fakaikuga sē tonu tenei: “E ‵tau o mate a ia.”—Mataio 26:65, 66.

Ne kamata ei o fakatauemu atu latou ki a Iesu kae fusu ne latou a ia. Ne laupāpā ne nisi tino ana mata kae popoki atu ki ei. I te otiga ne ufi ana mata kae ‵pa ne latou, ne fai atu latou mo te fakatauemu: “Kafai koe se pelofeta, taku mai me ko oi ne ta ne ia koe?” (Luka 22:64) Mafaufau la ki te Tama a te Atua ko ta fakamasei i te fono sē tonu telā ne fai i te po!