Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 108

Ne Fakamavale ne Iesu a Taumafaiga ke Puke a Ia

Ne Fakamavale ne Iesu a Taumafaiga ke Puke a Ia

MATAIO 22:15-40 MALEKO 12:13-34 LUKA 20:20-40

  • MEA A KAISALA KI A KAISALA

  • AVAGA I TE TOE‵TUGA?

  • TULAFONO TAFASILI I TE TĀUA

Ne kaitaua a fili fakalotu o Iesu. Ne fatoa fakamatala atu ne ia a tala fakatusa kolā ne fakaasi faka‵sau atu ei te lotou amio ma‵sei. Ko palani ‵funa a te kau Falesaio ke fakatogafiti ne latou a ia. Ne taumafai latou ke fai atu fua ne ia se mea telā e mafai ei o avatu fakapagota a ia ki mua o te kovana Loma, kae ne ‵togi ne latou a nisi o ana soko ke ‵po aka tou tagata.—Luka 6:7.

“Te Faiakoga,” ne fai atu latou konei, “e iloa ne matou me e faipati kae akoako ne koe te mea tonu kae e se fakailoga tino foki koe, kae e akoako ne koe a auala o te Atua e ‵tusa mo te munatonu: E mata, e saoloto i te tulafono ke ‵togi atu ne tatou a lafoga foitino ki a Kaisala io me ikai?” (Luka 20:21, 22) Ne seki ‵segi a Iesu i olotou pati fakakolekole, me e iloa ‵lei ne ia olotou amioga ‵loi kae fai togafiti. Kafai e fai atu, ‘Ikai, e se ‵tau o ‵togi atu a te lafoga tenei,’ e mafai o ‵losi atu me e ‵teke atu a ia ki te kau Loma. Kae kafai e fai atu, ‘Ao, ‵togi te lafoga tenei,’ e mafai o fakauiga ‵se ne tino kolā e faka‵logo mo te fameo ki te kau Loma, kae ‵teke atu latou ki a ia. Tela la, ne tali atu pefea a ia?

Ne tali atu a Iesu: “Kaia e tofotofo ei ne koutou au, koutou tino ‵loi? Fakaasi mai ki a au te tupe o te lafoga foitino.” Ne avatu ne latou a te tupe ko te tenali, telā ne fesili atu a ia: “I oi te ata mo te igoa tenei?” Ne tali mai latou: “I o Kaisala.” Telā, ne fai atu ei ne Iesu a te fakatonuga poto tenei: “Tela la, toe ‵togi atu a mea a Kaisala ki a Kaisala, kae ko mea a te Atua ki te Atua.”—Mataio 22:18-21.

Ne ofo a tāgata i pati a Iesu. Ne fakafilemu aka latou ne tena tali atu mo te atamai, telā ne olo atu ei  latou keatea. Kae ne seki gata atu i konā a mea ne ‵tupu i te aso, io me ko taumafaiga ke ‵po aka tou tagata. Mai tua o te ma‵valega o te kau Falesaio i olotou taumafaiga, ne olo atu a takitaki o te suā potukau fakalotu ki a Iesu.

A Satukaio, kolā e fai mai me e seai se toetuga, ne fakasae aka ne latou se fesili telā ne aofia i ei a te toetuga mo te a‵vaga o tautaina ki te avaga a te lotou taina. Ne fesili atu latou: “Te Faiakoga, ne fai mai a Mose, ‘Kafai e mate se tagata kae seai ne ana tama‵liki, e ‵tau o avaga tena taina mo tena avaga ko te mea ke maua ne tama‵liki ma tena taina.’ E isi ne tautaina e tokofitu e ‵nofo matou. Ne avaga te toekimua kae mate kae seai sena tamaliki, tuku atu ei tena avaga ki tena taina. Ne penā foki ki te tokolua mo te tokotolu ke oko eiloa ki te tokofitu. Fakamuli ifo, mate ei te fafine. Tela la, i te taimi e toetu aka ei a te tokofitu konei, ko oi ka fai mo fai te avaga a tou fafine? Me ne a‵vaga katoa a latou mo ia.”—Mataio 22:24-28.

Ne tali atu a Iesu e ‵tusa mo tusitusiga a Mose, kolā ne talia ne te kau Satukaio: “E mata, e se tenei te mea e ‵se ei koutou, me e se iloa ne koutou a Tusitusiga Tapu io me ko te ‵mana o te Atua? Me i te taimi e toe‵tu aka ei a tino mai te mate, a tāgata ka se a‵vaga e pelā foki mo fāfine, kae ka fai a latou e pelā mo agelu i te lagi. Kae e pelā mo te faka‵tuga o tino ‵mate, e a, e seki fai‵tau koutou ki te tusi a Mose, ki te tala e uiga ki te lakau ‵ka, i pati a te Atua ki a ia: ‘Au ko te Atua o Apelaamo mo te Atua o Isaako mo te Atua o Iakopo’? A ia e se ko te Atua o tino ‵mate, kae ko te Atua o tino ola. Ko oko eiloa te ‵se o koutou.” (Maleko 12:24-27; Esoto 3:1-6) Ne ofo a te vaitino i te tali tenā.

Ne fakafilemu ne Iesu a Falesaio mo Satukaio telā ne olo atu ei a tino ‵teke fakalotu kolā ne ‵kau fakatasi o toe tofotofo tou tagata. Ne fesili atu te failautusi e tokotasi: “Te Faiakoga, se a te ‵toe fakatonuga sili i te Tulafono?”—Mataio 22:36.

Ne tali atu a Iesu: “Tenei a te tulafono e tulaga muamua, ‘Faka‵logo mai e Isalaelu, a Ieova ‵tou Atua, ko Ieova tokotasi eiloa, kae e ‵tau mo koe o alofa ki a Ieova tou Atua mo tou loto kātoa mo tou foitino kātoa mo tou mafaufau kātoa mo tou malosi kātoa.’ A te lua o tulafono, ‘E ‵tau mo koe o alofa ki tou tuakoi e pelā mo koe ki a koe eiloa.’ E seai eiloa se tulafono e sili atu i tulafono konei.”—Maleko 12:29-31.

I te lagonaga ne latou te tali, ne fai atu a te failautusi: “Te Faiakoga e fetaui eiloa au pati mo te munatonu, ‘E tokotasi eiloa a Ia, kae e seai aka foki se tino i ana tafa’; kae ko te tino e alofa ki a ia mo tena loto kātoa, mo tena mafaufau kātoa, mo tena malosi kātoa, kae alofa ki tena tuakoi e pelā mo ia ki a ia eiloa, e sili fakafia atu i lō taulaga ‵sunu mo taulaga katoa kolā e ofo atu.” I te iloaga ne Iesu me ne tali mai te tagata tenā mo te poto, fai atu ei ki ei: “Ko se ‵mao koe mai te Malo o te Atua.”—Maleko 12:32-34.

Ko oti eiloa ne akoako atu a Iesu i te faletapu i aso e tolu (Nisani 9, 10, mo te 11). Ko oti ne fakalogo‵logo atu a nisi tino, e pelā mo te failautusi tenei, ki a ia mo te fia‵fia. Kae e se ko takitaki lotu, kolā ko se lava nei te lotou “loto ‵toa o fesili atu ki a ia.”