Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 103

Ne Toe ‵Fulu Faka‵ma a te Faletapu

Ne Toe ‵Fulu Faka‵ma a te Faletapu

MATAIO 21:12, 13, 18, 19 MALEKO 11:12-18 LUKA 19:45-48 IOANE 12:20-27

  • NE FETŪ NE IESU A TE MATI KAE ‵FULU FAKA‵MA TE FALETAPU

  • E ‵TAU O MATE A IESU KE MAUA TE OLA NE TINO E TOKOUKE

E tolu a po ne ‵nofo ei a Iesu mo ana soko i Petania talu mai te taimi ne oko atu ei latou ki konā mai Ieliko. Nei la, i te tafataeao o te Aso Gafua, i te po 10 o Nisani, ne olo atu ei latou ki Ielusalema. Ne fiakai a Iesu. Tela la, i te taimi ne lavea ei ne ia a te mati, ne sasale atu ei a ia ki ei. E mata, e isi ne ana fuataga?

Ko te fakaotiotiga nei o Mati, kae ko te ‵taukai o mati e fai sāle loa i a Iuni. Ko ‵somo aka a laulakau, kae kāti ne ‵somo vave aka. Tela la, ne mafaufau a Iesu me kāti ko ‵somo vave aka foki a fuaga. Kae ne seai eiloa ne fuaga ne maua atu ne ia. Ne tuku mai eiloa ne lau konā se ata fakaloiloi o te lakau tenā. Ne fai atu ei a Iesu: “Ke se toe ai se tino e kai ne ia se fuaga mai i a koe ke oko eiloa ki te se-gata-mai.” (Maleko 11:14) I konā loa, ne kamata o magemage a te lakau, kae ne iloa atu ei a te uiga o pati a Iesu i te suā aso.

E seki leva kae oko atu a Iesu mo ana soko ki Ielusalema. Ne fanatu eiloa a ia ki te faletapu, telā ne āsi atu a ia ki ei i te fakatutonu o te aso anafi. I te aso nei, ko uke atu ana mea e fai i lō te asi atu fua ki ei; ne gasuesue a ia e pelā mo tena faiga i te tolu tausaga mai mua atu i ei i te Paseka i te 30 T.A. (Ioane 2:14-16) Ne ‵tuli keatea ne Iesu i te taimi nei “a tino katoa kolā e fakatau kae ‵togi olotou mea” i te faletapu. (Maleko 11:15) Ne seki talia foki ne ia so se tino ke fano mo se amoga i loto i te koga ateatea o te faletapu mai te suā fa‵kai ki te suā fa‵kai.

Kaia ne fai ei ne Iesu a mea konā ki tino kolā ne ‵fuli tupe kae ‵togi atu a manu i te faletapu? Ne fai atu a ia: “E a, e se tusi i te tusi: ‘A toku fale ka fakaigoa ki te fale e fai i ei a ‵talo mō fenua katoa’? Kae ko fai ne koutou te fale tenei mo fai se ana o tino kai‵soa.” (Maleko 11:17) A te pogai ne taku ei ne Iesu a tāgata konei ki tino kai‵soa me e momea aka ne latou te ‵togi ki tino kolā ne ‵togi ne latou a manu e manakogina mo fai a taulaga. Ne kilo atu a Iesu ki faifaiga fakapisinisi konā ne fai, e pelā me ko te kaisoa io me ko te ‵faomea.

E tonu, ne ‵logo a faitaulaga pule, failautusi, mo tino takutakua e uiga ki mea kolā ne fai ne Iesu kae ne momea aka olotou taumafaiga ke tamate a ia. Kae ne fe‵paki eiloa latou mo se fakalavelave. Ne seki iloa ne latou me ka tamate pefea ne latou a Iesu, me ne ua‵lolo atu a tino o fakalogo‵logo ki a ia.

E se gata fua i tino Iutaia kae e isi foki ne tino o fenua fakaa‵tea, kolā ne ‵fuli ki te lotu Iutaia, ne olo atu ki te Paseka. E aofia i a latou konā ko tino Eleni, kolā ne olo atu o tapuaki i te fakamanatuga tenā. Ne olo atu latou konei ki a Filipo, kāti ne tosina atu latou ki tena igoa Eleni, kae fakamolemole atu ke fai‵pati aka latou ki a Iesu. Kāti ne fakalotolotolua a Filipo me e ‵lei a te fai‵patiga tenā, telā ne fesili atu ei a ia ki a Anitelea. Ne fai atu ne lāua a te mea tenā ki a Iesu, telā koi nofo atu i te faletapu.

E iloa ne Iesu me e ‵tau o mate a ia i nai aso mai mua nei, tela la, e se tenei te taimi ke fakama‵lie aka ei a manakoga o tino i mea e fia iloa ne latou io me ko te taumafai ke takutakua. Ne tali atu a ia ki ana apositolo e tokolua e auala i se tala fakatusa, ana muna: “Ko oko mai te itula ka faka‵malugina ei a te Tama a te tagata. Au e fai tonu atu ki a koutou, kafai e se tō se fuaga ki te laukele kae pala e tasi fua te fuaga e maua; kae kafai e pala, ka ‵fua mai ei a fuaga e uke.”—Ioane 12:23, 24.

E mafai o foliga mai me e se tāua malosi se fuaga saito e tasi. Kae kafai e ‵toki te mea tenā i te laukele kae e “pala” e pelā me se fuaga, e mafai o tupu aka te mea tenā ke fai mo fai se kausaito mo fuaga saito e uke i ei. Kae ko Iesu se tagata ‵lei katoatoa e tokotasi. Kae mai tena tumau i te fakamaoni ki te Atua ke oko ki tena mate, ka fai eiloa a ia mo fai te auala ke tuku atu ei te ola se-gata-mai ki tino e tokouke kolā e maua foki i ei te uiga fia fai taulaga tai ‵pau. Tela la, ne fai atu a Iesu: “So se tino e fakapelepele ne ia tena ola e fakaseai ne ia, kae ko so se tino e takalialia ki tena ola i te lalolagi tenei ka puipui eiloa ne ia mō te ola se-gata-mai.”—Ioane 12:25.

Ne seki mafaufau fua a Iesu ki a ia eiloa, me ne fai mai a ia: “So se tino e fia tavini mai ki a au, ke na tautali mai i a au. Ko te koga e nofo ei au e nofo foki i  konā taku tavini. So se tino e fia tavini mai ki a au ka fakaaloalogina a ia ne te Tamana.” (Ioane 12:26) Ko tafaga la te gali o te taui tenā! A latou kolā e fakaaloalo ne te Tamana ka ‵kau fakatasi mo Keliso i te Malo.

A te mafaufau ki te uke o logo‵maega mo te mate fi‵ta telā ka oko atu ki a ia, ne fai atu a Iesu: “Ko se toka toku loto i te taimi nei, kae ne a foki aku pati ka fai atu? Toku Tamana, fakaola aka au mai i te itula tenei.” Kae ne seki manako a Iesu ke ‵kalo keatea a ia mai te faiga o te loto o te Atua. Ne toe fai mai a ia: “E ui i ei, tenei eiloa te pogai ne oko mai ei au ki te itula tenei.” (Ioane 12:27) Ne lotomalie a Iesu ki mea katoa ne fakatoka ne te Atua, e aofia i ei tena mate e pelā me se taulaga.