Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 105

Ne Fakaaoga a te Lakau ko te Mati ke Tuku Mai i ei se Akoakoga e Uiga ki te Fakatuanaki

Ne Fakaaoga a te Lakau ko te Mati ke Tuku Mai i ei se Akoakoga e Uiga ki te Fakatuanaki

MATAIO 21:19-27 MALEKO 11:19-33 LUKA 20:1-8

  • KO MAGEMAGE TE MATI—SE AKOAKOGA E UIGA KI TE FAKATUANAKI

  • KO ‵TEKE ATU KI TE PULEGA A IESU

Ne tiakina ne Iesu a Ielusalema i te fakatutonu o te Aso Gafua, kae toe foki atu ki Petania telā e tu i te feitu ki saegāla o te Mauga o Olive. Kāti ne nofo atu i te fale o ana taugasoa, ko Lasalo, Malia, mo Maleta.

Nei la, ko te taeao o Nisani po 11. Ne toe olo atu a Iesu fakatasi mo ana soko, i te lotou auala o ‵foki atu ki Ielusalema, telā ko tena toe taimi eiloa ke fanatu ki te faletapu. Kae ko te ‵toe aso o tena taviniga a koi tuai o fakamanatu te Paseka, te kamataga o te Fakamanatuga o tena mate, kae fakafesagai atu ki tofotofoga mo tena tamatega.

I te auala masani mai Petania ki luga i te Mauga o Olive i te feitu ki Ielusalema, ne matea ei ne Petelu te lakau telā ne fetū ne Iesu i te aso anafi. “Te Faiakoga, kilo atu!” ne fai atu a ia, “a te mati telā ne fetū ne koe ko magemage.”—Maleko 11:21.

Kaia ne fai ei ne Iesu ke magemage te lakau tenā? Ne fakaasi mai ne ia te pogai i tena tali: “Au e fai tonu atu ki a koutou, kafai e fakatuanaki koutou e aunoa mo te fakalotolotolua, ka se fai fua ne koutou te mea telā ne fai ne au ki te mati tenei, kae e mafai foki o fai atu koutou ki te mauga tenei, ‘Masagi ki luga kae tō ki te tai,’ ko te mea eiloa ko fai penā. Kae ko mea katoa kolā e fakamolemole atu koutou ki ei e auala i te ‵talo ona ko te fakatuanaki, ka maua eiloa ne koutou.” (Mataio 21:21, 22) Ne toe fakafoki atu ei ne ia a te manatu telā ne fai atu ne ia muamua e uiga ki te fakatuanaki telā e mafai o fakagasue ne ia se mauga.—Mataio 17:20.

Tela la, i te faiga o te lakau ke magemage, ne tuku mai ei ne Iesu se akoakoga aoga e uiga ki te manakogina ke maua te fakatuanaki ki te Atua. Ne fai mai a ia: “A mea katoa kolā e ‵talo kae fakatagi atu koutou ki ei mo te fakatuanaki, ka maua eiloa ne koutou.” (Maleko 11:24) Ko oko eiloa i te tāua o te akoakoga tenā ki soko katoa o Iesu! Kae maise eiloa ki apositolo kolā ko pili o fe‵paki mo tofotofoga faiga‵ta. E isi aka foki se sokoga o te magemage o te mati ki te fakamalosiakaga o te fakatuanaki.

E pelā mo te lakau tenei ko te mati, ne maua ne te fenua ko Isalaelu a foliga fakaloiloi. Ne aofia te fenua tenei i se fesokotakiga tāua mo te Atua kae ne fakafoliga atu fua ne latou me e faka‵logo latou ki tena Tulafono. Kae ne fakamaoni atu ne latou e pelā me se fenua, a te sē lava o te lotou fakatuanaki, mo te seai foki o ne fuataga ‵lei e maua mai i ei. Ne ‵teke atu foki latou ki te Tama tonu a te Atua! Tela la, mai te faiga ke magemage te mati telā e se fua mai, ne fakaasi atu ei ne Iesu a mea ka ‵tupu ki te fenua telā e seai se fakatuanaki kae e seai foki ne fuataga ‵lei i ei.

Mai tua malie ifo i ei, ne ulu atu a Iesu mo ana soko ki Ielusalema. E pelā mo ana faiga masani, ne fanatu a Iesu ki te faletapu kae kamata o akoako atu. Kāti ne mafau‵fau a faitaulaga sili mo toeaina o te fenua ki faifaiga a Iesu ki tino ‵fuli tupe i te aso mai mua atu i ei, kae ne ‵teke atu latou ki a ia penei: “I o oi te malosi e fai ei ne koe a mea konei? Io me ko oi ne tuku atu ne ia te malosi tenā ke fai ei ne koe a mea konei?”—Maleko 11:28.

Ne tali atu a Iesu: “Ka ‵sili atu ne au ki a koutou se fesili e tasi. Kafai ko tali mai ne koutou, ko fakaasi atu ei ne au te malosi e fai ei ne au a mea konei. Tali mai ki a au, e mata, a te papatisoga a Ioane ne mai i te lagi io me mai i tāgata?” Nei la, ko tofotofogina ana fili kolā ne ‵teke atu. Ne fakatau fesilisili a faitaulaga mo toeaina i a latou eiloa me ka tali atu pefea latou: “Ne fakatau tītī olotou manatu i a latou eiloa, kae fai aka penei: “Kafai e fai atu tatou, ‘Mai te lagi,’ kae ka fai mai a ia, ‘Kaia la ne seki tali‵tonu ei koutou ki a ia?’ Kae e se ‵tau eiloa o fai atu tatou, ‘Mai tāgata’?” Me ne ma‵taku eiloa latou i te vaitino, me e tali‵tonu latou i a Ioane se pelofeta.”—Maleko 11:29-32.

Ne seki iloa ne tino kolā ne ‵teke atu ki a Iesu o fai atu te lotou tali. Tela la, ne tali atu latou: “E se iloa ne matou.” Telā ne fai atu ei a Iesu: “E se fakaasi atu foki ne au ki a koutou me ne māfua mai i fea te malosi e fai ei ne au a mea konei.”—Maleko 11:33.