Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 102

Ne Fanatu a te Tupu ki Ielusalema i se Tamā Asini

Ne Fanatu a te Tupu ki Ielusalema i se Tamā Asini

MATAIO 21:1-11, 14-17 MALEKO 11:1-11 LUKA 19:29-44 IOANE 12:12-19

  • NE ULU ATU A IESU KI IELUSALEMA MO TE MANUMALO

  • NE ‵VALO MAI TE FAKAMASEIGA O IELUSALEMA

I te suā aso, ko te Aso Sa, i a Nisani po 9, ne tiakina ei ne Iesu a Petania fakatasi mo ana soko kae olo atu ki Ielusalema. I te taimi ko pili atu latou ki Petefake, i te Mauga o Olive, ne fai atu ei a Iesu ki ana soko e tokolua:

“Olo ki te fa‵kai tenā e lavea ne koulua, kae ka maua ne koulua se asini e ‵sai fakatasi mo se tamā asini. ‵Tala a asini ko aumai ei ki a au. Kafai e fai atu ne pati a se tino ki a koulua, fai atu fua ki ei, ‘E manako ki ei te Aliki.’ Ka tuku fakavave mai ne ia a asini konā.”—Mataio 21:2, 3.

Ne seki maina te kau soko me ne aofia i fakatonuga a Iesu se valoaga i te Tusi Tapu. Fakamuli loa, ne maina latou i te fakataunuga o te valoaga a Sakalia. Ne ‵valo mai ne ia me ka fanatu a te Tupu a te Atua telā ne folafola mai ki Ielusalema, e pelā me “se tino malalo fua kae sopo mai i luga i te asini,” se tama a te asini fafine.—Sakalia 9:9.

I te taimi ne oko atu ei a soko konā ki Petefake kae ne puke ne lāua te tamā asini tagata mo tena mātua, telā ne fesili atu a nisi tino kolā ne ‵tu pili atu: “Kaia e ‵tala ei ne koulua te tamā asini tenā?” (Maleko 11:5) Kae i te faiatuga me e ave ne lāua ki te Aliki, ne talia ei ne latou ke ave ne soko a manu konā ki a Iesu. Ne ‵fola ne te kau soko olotou gatu i luga i te asini mo tena tama, kae ne sopo aka ei a Iesu ki luga i te tamā asini.

Ne gasolo aka o tokouke a te vaitino i te taimi ne tele atu ei a Iesu ki Ielusalema. Ne ‵fola ne tino e tokouke olotou gatu i te auala. Ne ‵kati ne nisi tino a kaula mai i lakau io me ko “kaula o lakau i tafa o te auala” kae ‵fola i te auala. Ne ka‵laga atu latou: “Matou e ‵talo ke fakaola a ia! Ke manuia a ia telā e vau i te igoa o Ieova! Ke manuia te Malo o te ‵tou tamana ko Tavita telā ka oko mai!” (Maleko 11:8-10) Ne kaitaua a Falesaio kolā ne aofia i te vaitino ona ko pati konei. Ne fai atu latou ki a Iesu: “Te Faiakoga, ‵liko atu ou soko.” Ne tali atu a Iesu: “Au e fai atu ki a koutou, kafai e se ka‵laga a latou konei, ko fatu ka ka‵laga.”—Luka 19:39, 40.

I te taimi ne kilokilo atu ei a Iesu ki Ielusalema, ne kamata a ia o tagi kae fai atu: “Moi fai ne iloa ne koe i te aso tenei a mea e uiga ki te filemu—kae nei la ko oti ne ‵funa mai i a koe.” Ka fakasala eiloa a Ielusalema, ona ko te sē faka‵logo mo te iloa tonu. Ne ‵valo mai a Iesu: “Me ka oko mai eiloa a aso ka faite fakatamilo ei ne ou fili se ‵pui ki lakau ko oti ne fakamakai‵kai kae ka nikoi ne latou a koe kae oso atu ki a koe mai feitu katoa. Ka tukipalapala ne latou a koe mo au tama‵liki i loto i a koe ki lalo i te laukele, kae ka se tiaki ne latou se fatu i luga i te suā fatu.” (Luka 19:42-44) Ne taunu tonu mai eiloa a pati a Iesu i te taimi ne fakamasei ei a Ielusalema i te tausaga ko te 70 T.A.

I te taimi ne ulu atu ei a Iesu ki Ielusalema, “ne ua‵te valevale a te fa‵kai kātoa, olotou muna: Ko oi la te tino tenei?” Kae ne fai atu faeloa te vaitino tenā: “A ia tenei ko Iesu te pelofeta, mai i Nasaleta i Kalilaia!” (Mataio 21:10, 11) Ne fakamatala atu ne tino mai te vaitino kolā ne lavea ne latou a te fakatuakaga ne Iesu o Lasalo e uiga ki te vavega tenā. Ne fanoa‵noa a te kau Falesaio me e se ma‵goi olotou taumafaiga. Ne fakatau fai atu latou i a latou eiloa: “Ko tau‵tali atu a te lalolagi kātoa i a ia.”—Ioane 12:18, 19.

E pelā mo tena masani māfai e āsi atu ki Ielusalema, ne fanatu a Iesu ki te faletapu ke akoako atu i konā. Ne faka‵lei ei ne ia a tino ‵kivi mo tino ‵pili. I te taimi ne lavea ei ne faitaulaga pule mo failautusi a mea ne fai ne ia mo te ka‵laga atu o tama‵liki tāgata i te faletapu, “Matou e ‵talo atu ke fakaola te Tama a Tavita!” ne kamata o kaitaua latou. Ne fesili atu a takitaki lotu ki a Iesu: “E lagona ne koe a pati a latou konei?” Ne tali atu a ia ki a latou: “Ao. E a, e seki fai‵tau koutou ki te mea tenei, ‘Ne fai ne koe a gutu o tama‵liki mo pepe ke ‵viki atu ki a koe’? ”—Mataio 21:15, 16.

Ne kilokilo atu a Iesu ki mea katoa i te faletapu. Ko po nei, telā ne tiakina ei ne ia te koga tenā fakatasi mo apositolo. A koi tuai o kamata a Nisani po 10, ne toe foki atu a ia ki Petania, telā ne nofo atu a ia i konā i te po o te Aso Sa.