Teutelonome 9:1-29

  • Pogai ne tuku atu ei te fenua ki Isalaelu (1-6)

  • Isalaelu ne fai ne ia a Ieova ke kaitaua fakafa taimi (7-29)

    • Te pulumakau aulo (7-14)

    • Ko fakamolemole atu a Mose (15-21, 25-29)

    • Nisi taimi e tolu ne kaitaua ei (22)

9  “Fakalogo mai e Isalaelu, i te aso nei ka fanatu koe ki te suā feitu o te Iolitana+ o puke a fenua kolā e ‵lasi kae ma‵losi atu i a koe,+ ko fakai ‵lasi kolā e ‵pui faka‵lei ke oko ki te lagi,*+  a tino i ei e ‵lasi kae ma‵luga, ko tama tāgata a tino Anaki,+ kolā e iloa ne koe kae ne logo foki koe i te tugapati e uiga ki a latou kae fai aka, ‘Ko oi e mafai o taua atu ki tama tāgata a Anaki?’  Tela la, e ‵tau o iloa ne koe i te aso nei i a Ieova tou Atua ka fanatu i ou mua ki te suā feitu.+ E fai a ia pelā me se afi+ ‵ka ulaula, kae ka ‵ta fakapalele ne ia a latou. Ka fakatakavale ne ia latou i ou mua, ko te mea ke mafai o afuli fakavave ne koe latou kae fakaseai atu latou, e pelā eiloa mo te tautoga a Ieova ki a koe.+  “Kafai e afuli ne Ieova tou Atua a latou kea‵tea mai ou mua, ke mo a ma fai ifo koe i tou loto, ‘Ona ko toku amiotonu ne aumai ei au ne Ieova ke puke mō oku a te fenua tenei.’+ I lō te fai penā, ne afuli kea‵tea ne Ieova a fenua+ konei mai i ou mua ona ko te lotou amio ma‵sei.  E se ona ko tou amiotonu io me ko te fai mea tonu i tou loto ne ala ei o puke mō koe te lotou fenua. I lō te fai penā, ne afuli kea‵tea ne Ieova tou Atua a fenua konei mai i ou mua+ ona ko te lotou amio ma‵sei kae ke fakataunu foki i ei a te tautoga telā ne fai ne Ieova ki ou tupuga ko Apelaamo,+ Isaako+ mo Iakopo.+  Ke na iloa nei ne koe me e se ko tou amiotonu ne tuku atu ei ne Ieova tou Atua a te fenua ‵lei tenei ke fai mō koe, me i a koe se fenua loto makeke.*+  “Ke masaua—ke mo a ma puli—a te faiga ne koe ke kaitaua a Ieova tou Atua i te koga lavaki.+ Mai te aso ne tiaki ei ne koe te fenua o Aikupito ke oko ki te taimi ko ‵mai ei koutou ki te koga tenei, ne ‵teke atu eiloa koutou ki a Ieova.+  Ne fai foki ne koutou a Ieova ke kaitaua i Holepa, ne kaitaua malosi a Ieova ki a koutou kae ko toka eiloa a ia o ‵ta fakapalele atu koutou.+  I te taimi ne fanaka ei au ki te mauga o puke mai a papa fatu,+ ko papa fatu o te feagaiga ne fai ne Ieova mo koutou,+ ne nofo au i te mauga i ao e 40 mo po e 40,+ e seki kai ki meakai kae seki inu ki ne vai. 10  Ne tuku mai ne Ieova ki a au a papa fatu e lua kolā ne tusi ki te matikao lima o te Atua, kae i luga i ei ko pati katoa kolā ne fai atu ne Ieova ki a koutou i te mauga mai loto i se afi, i te aso ne maopoopo ei te fakapotopotoga kātoa.+ 11  I te katoaga o ao e 40 mo po e 40, ne tuku mai ne Ieova ki a au a papa fatu e lua, ko papa fatu o te feagaiga, 12  kae ne fai mai a Ieova ki a au, ‘Tu ki luga, fano fakavave ki lalo, me i ou tino kolā ne aumai ne koe ki tua mo Aikupito ko fai ne latou a amioga ma‵sei.+ Ko oti ne ‵fuli fakavave kea‵tea latou mai te auala ne fakatonu atu ne au ke tau‵tali latou i ei. Ko oti ne faite ne latou se tupua fiti mō latou eiloa.’+ 13  Tenā ne fai mai ei a Ieova ki a au, ‘Ko oti ne iloa ne au a tino konei, kae kiloke! a latou ne tino loto ma‵keke.*+ 14  Sa taofigina au, kae ka ‵ta fakapalele ne au latou kae ‵solo kea‵tea olotou igoa mai lalo o te lagi, kae ka fai ne au a koe e pelā me se fenua malosi kae tokouke atu i a latou.’+ 15  “Tenā ne mafuli ei au o fanaifo mai te mauga, kae ko te mauga e ‵ka i te afi,+ kae ko papa fatu e lua o te feagaiga e puke i oku lima.+ 16  Tenā ne kilo aka au, lavea ei ne au me ko agasala koutou i mua o Ieova te otou Atua! Ko oti ne faite ne koutou se pulumakau fiti mō koutou. Ko oti ne ‵fuli fakavave kea‵tea koutou mai te auala ne fakatonu atu ne Ieova ke tau‵tali koutou i ei.+ 17  Ne puke au ki papa fatu e lua kae ‵pei ki lalo ke malipi‵lipi i mua o koutou.+ 18  Tenā ne totuli ifo ei au i mua o Ieova, e pelā mo te taimi muamua, i ao e 40 mo po e 40. Ne seki kai au ki ne meakai io me inu ki ne vai,+ ona ko agasala katoa ne fai ne koutou mai te faiga o mea matagā i mua o Ieova kae fai ei ke kaitaua a ia. 19  Ne mataku au ona ko te lasi o te kaitaua o Ieova ki a koutou,+ kae ko toka a ia o ‵ta fakapalele koutou. Kae ko Ieova ne fakalogo foki ki a au i te taimi tenā.+ 20  “Ne kaitaua malosi a Ieova ki a Alona kae ne toka a ia o fakaseai atu a ia,+ kae ne fakatagi foki au mō Alona i te taimi tenā. 21  Tenā ne puke ei ne au a te mea ne agasala i ei koutou, ko te pulumakau tagata,+ kae ‵sunu ki te afi. Ne ofa ne au kae tuki likiliki ke liu lefu, kae ‵pei atu ne au a lefu ki te vaitafe telā e ‵tafe mai i te mauga.+ 22  “E se gata i ei, ne fai foki ne koutou ke kaitaua a Ieova i Tapela,+ i Masa,+ mo Kipelota-hatava.+ 23  I te taimi ne uga ei ne Ieova koutou mai Katesa-panea+ kae fai atu, ‘Olo ki luga kae puke mō koutou te fenua telā ka tuku atu ne au ki a koutou! ne toe ‵teke koutou ki te fakatonuga a Ieova te otou Atua,+ kae ne seki fakaasi atu faeloa ne koutou te fakatuanaki+ ki a ia kae seki faka‵logo foki ki a ia. 24  A koutou ne ‵teke faeloa ki a Ieova talu mai te taimi ne iloa ei ne au koutou. 25  “Tela la, ne totuli faeloa au i mua o Ieova i ao e 40 mo po e 40,+ kae ne totuli faeloa au penei me ne fai mai a Ieova me ka ‵ta fakapalele ne ia koutou. 26  Ne kamata au o fakatagi atu ki a Ieova kae fai atu, ‘Te Aliki Sili ko Ieova, sa ‵ta fakapalele ne koe ou tino. A latou se kope totino*+ o koe, telā ne fakasao ne koe ki tou malosi sili kae aumai kea‵tea ne koe mai Aikupito ki tou lima malosi.+ 27  Ke masaua ne koe au tavini ko Apelaamo, Isaako mo Iakopo.+ Sa fia saga ki te loto ma‵keke o tino konei, olotou amioga ma‵sei, mo olotou agasala.+ 28  I te mea ma fai aka a tino o te fenua ne aumai ne koe matou ki ei penei: “E se mafai ne Ieova o aumai latou ki loto i te fenua ne tauto a ia ke tuku atu ki a latou, kae ona ko tena takalialia ki a latou ne aumai kea‵tea ne ia latou ke ‵mate i te koga lavaki.”+ 29  Me i a latou ko ou tino kae se kope totino*+ o koe telā ne aumai kea‵tea ne koe ki tou malosi sili mo tou lima mafi.’+

Fakamatalaga mai lalo

Kolā e ma‵luga olotou ‵pui.
Epelu, “ua makeke.”
Epelu, “ua makeke.”
Io me “tou tofi.”
Io me “tou tofi.”