Teutelonome 8:1-20

  • Ko toe fakamasaua mai a fakamanuiaga mai i a Ieova (1-9)

    • “E se ko meakai fua e ola ei te tagata” (3)

  • Ke mo a ma puli i a koe a Ieova (10-20)

8  “E ‵tau o tausi faka‵lei ne koe a fakatonuga katoa kolā e tuku atu ne au ki a koe i te aso nei, ko te mea ke tumau koutou i te ola+ kae gasolo aka o tokouke kae olo atu o puke mō koutou a te fenua ne tauto a Ieova ke avatu ki otou tupuga.+  Ke masaua te auala loa ne fai ne Ieova tou Atua ke sasale koe i ei i tausaga e 40 i te koga lavaki,+ ke akoako ei koe ke loto maulalo kae ke tofotofo+ koe ko te mea ke iloa aka a mea i tou loto,+ me ko koe e tausi ki ana fakatonuga io me ikai.  Tenā ne fai ei ne ia koe ke loto maulalo kae tuku koe ke fiakai+ kae ne fagai ne ia koe ki te manai,+ telā e se masani koe ki ei e pelā foki mo ou tupuga, ko te mea ke iloa ne koe me e se ko meakai fua e ola ei te tagata kae ko muna katoa kolā e ‵to mai i te gutu o Ieova e ola ei te tagata.+  A gatu kolā ne pei koe ki ei e seki ‵pala, kae e seki fula‵fula foki ou vae i tausaga e 40 konei.+  E iloa ‵lei ne koe i tou loto me e pelā eiloa mo te tagata telā e fakatonutonu ne ia tena tama tagata, ne fakatonutonu foki koe ne Ieova tou Atua.+  “Nei la, e ‵tau mo koe o fakalogo ki fakatonuga a Ieova tou Atua mai te sasale i ana auala kae mataku foki ki a ia.  Me i a Ieova tou Atua ka avatu ne ia koe ki se fenua ‵lei,+ se fenua e uke a vaitafe i ei, mo vai i lalo o te laukele mo punavai* kolā e ‵tafe i vanu laugatasi mo koga maugā,  se fenua o saito mo kalite mo vine mo lakau ko mati, mo pomekalanite,+ se fenua o te sinu olive mo te hani,+  se fenua telā ka se mafai o seai ne meakai i ei kae ka se mativa eiloa koe, a fatu i te fenua tenā e maua i ei a fiti kae e maua foki i ana mauga a te kopa. 10  “Kafai ko oti koe ne kai kae ko makona, e ‵tau mo koe o tavae a Ieova tou Atua mō te fenua ‵lei telā ne tuku atu ne ia ki a koe.+ 11  Fakaeteete ke mo a ma puli i a koe a Ieova tou Atua mai te fakatamala o fakalogo ki ana fakatonuga, ana ikuga o fakamasinoga, mo ana tulafono fakavae kolā e fakatonu atu ne au ki a koe i te aso nei. 12  Kafai e kai koe kae makona kae faite ne koe a fale ‵lei kae nofo i ei,+ 13  kafai ko uke au lafu pulumakau mo lafu mamoe kae ko uke foki au siliva mo aulo kae ko uke foki au nisi mea aka, 14  ke mo a eiloa e talia ne koe a te loto fakamatamata+ kae fai ei ke puli i a koe a Ieova tou Atua, telā ne aumai ne ia koe ki tua mo te fenua o Aikupito, mai te koga ne nofo pologa koe i ei,+ 15  telā ne fai ne ia koe ke sasale i te koga lavaki+ lasi kae fakamataku, telā e maua i ei a gata poisini mo akalava mo te laukele malō telā e seai ne vai i ei. Ne fai ne ia a vai ke ‵sali mai i se kaupapa makeke+ 16  kae fagai ne ia koe ki te manai+ i te koga lavaki, telā e se masani ki ei ou tupuga, ko te mea ke fai ei koe ke loto maulalo+ kae ke tofotofo ei koe ke maua ne koe a mea aoga i aso mai mua.+ 17  Kafai e fai aka koe i tou loto, ‘Ko maua ne au a te koloa tenei ona ko toku malosi mo te ma‵losi o oku lima,’+ 18  ke masaua me ko Ieova tou Atua ne tuku atu ne ia te malosi ke maukoloa koe,+ ko te mea ke fakataunu a tena feagaiga telā ne tauto a ia ki ou tupuga, e pelā mo te mea ko tupu i te aso nei.+ 19  “Kafai e puli i a koe a Ieova tou Atua kae tautali atu koe i nisi atua kae tavini atu ki a latou kae ifo foki ki ei, au e fai ‵tonu atu ki a koutou i te aso nei me ka fakaseai atu eiloa koutou.+ 20  E pelā eiloa mo atufenua kolā e ‵ta fakapalele ne Ieova i otou mua, tenā foki eiloa te auala ka ‵ta fakapalele ei koutou, me i a koutou e se faka‵logo ki te leo o Ieova te otou Atua.+

Fakamatalaga mai lalo

Io me “koga ‵poko e maua ei a vai.”