Teutelonome 31:1-30

  • Mose ko pili o mate (1-8)

  • Te faitauga o te Tulafono i mua o tino (9-13)

  • Ko fakasopo aka a Iosua (14, 15)

  • Ko ‵valo mai te ‵tekeatuga a Isalaelu (16-30)

    • Se pese ke akoako atu ki tino Isalaelu (19, 22, 30)

31  Tenā ne fanatu ei a Mose ki tua kae fai atu ne ia a pati konei ki Isalaelu kātoa,  ana muna ki a latou: “Au ko 120 oku tausaga i te aso nei.+ Ko se mafai ne au o ‵taki koutou,* me ne fai mai a Ieova ki a au, ‘A koe ka se fanatu ki te suā feitu o te Iolitana.’+  A Ieova tou Atua ka fanatu i ou mua, kae ka ‵ta fakapalele ne ia a atufenua konei i ou mua, kae ka afuli ne koe latou kea‵tea.+ A Iosua ko te tino telā ka ‵taki ne ia koe ki te suā feitu,+ e pelā eiloa mo pati a Ieova ne fai.  Ka fai ne Ieova ki a latou a te mea ne fai ne ia ki a Sekono+ mo Oko,+ ko tupu o tino Amoli, mo te lotou fenua i te taimi ne ‵ta fakapalele ei ne ia latou.+  Ka fakatakavale latou ne Ieova mō koutou, kae e ‵tau o fai ne koutou ki a latou a te fakatonuga kātoa telā ne tuku atu ne au ki a koutou.+  Ke loto toa kae loto malosi.+ Ke mo a ma mataku io me polepole koe i mua o latou,+ me i a Ieova tou Atua e sa‵sale fakatasi mo koe. Ka se mafai eiloa o fulitua atu a ia ki a koe io me tuku tiaki koe.”+  Tenā ne ‵kami ei ne Mose a Iosua kae fai atu ki a ia i mua o tino Isalaelu katoa: “Ke loto toa kae loto malosi,+ me ko koe ka aumai ne koe a tino konei ki loto i te fenua telā ne tauto a Ieova ki olotou tupuga ke tuku atu ki a latou, kae ka tuku atu ne koe ki a latou ke fai mo olotou tofi.+  A Ieova e sasale i ou mua, kae ka fakatasi atu eiloa a ia ki a koe.+ Ka se mafai eiloa o fulitua atu a ia ki a koe io me tuku tiaki koe. Sa mataku io me polepole.”+  Tenā ne tusi ei ne Mose te Tulafono+ tenei kae tuku atu ki te kau faitaulaga, ko tino Levi, kolā e sau ne latou te pusa o te feagaiga a Ieova, mo toeaina katoa o Isalaelu. 10  Ne fakatonu atu a Mose ki a latou, ana muna: “I te fakaotiga o taki fitu tausaga katoa, i te taimi tonu i te tausaga o te fakasaolotoga,+ i te taimi o te ‵Kaiga Fiafia o Fale Fakamalumalu,*+ 11  māfai ko ‵tu atu a Isalaelu kātoa i mua o Ieova+ tou Atua i te koga telā ka filifili ne ia, e ‵tau o faitau ne koe te Tulafono tenei ke lagona ne tino Isalaelu katoa.+ 12  Fakamaopoopo fakatasi mai a tino katoa,+ tāgata, fāfine, tama‵liki,* mo tino fakaa‵tea kolā e ‵nofo i ou fakai, ko te mea ke faka‵logo kae tauloto latou e uiga ki a Ieova te otou Atua kae ma‵taku ki a ia kae tausi faka‵lei a pati katoa i te Tulafono tenei. 13  Kae ko olotou tama tāgata kolā e seki iloa ne latou te Tulafono tenei ka faka‵logo+ kae tauloto ke iloa ne latou o ma‵taku ki a Ieova te otou Atua i aso katoa e ola ei koutou i te fenua telā ka puke ne koutou i te suā feitu o te Iolitana.”+ 14  Tenā ne fai atu ei a Ieova ki a Mose: “Kiloke! Ko pili mai te taimi ka mate ei koe.+ Kalaga atu ki a Iosua kae olo atu koulua ki te faleie o maopoopoga, ko te mea ke fakatonu ne au a ia.”+ Tenā ne olo ei a Mose mo Iosua o ‵tu atu i te faleie o maopoopoga. 15  Ne fakasae atu a Ieova i te faleie mai loto i te pou kaumana, kae ne tu a te pou kaumana i te mataloa o te faleie.+ 16  Ne fai atu a Ieova ki a Mose: “Kiloke! A koe ko pili o mate,* kae ko tino konei ka kamata o fai ne latou a faifaiga talitāgata i te feitu faka-te-agaga mo atua o nisi fenua i tafa o latou i te fenua telā ka olo latou ki ei.+ Ka tiaki ne latou au+ kae ofa taku feagaiga telā ne fai mo latou.+ 17  I te taimi tenā ka kaitaua malosi au ki a latou,+ kae ka tiaki ne au latou,+ kae ‵muni au mai i a latou+ ke oko ki te aso ka ‵ta fakapalele atu ei latou. Kae mai tua o puapuaga mo fakalavelave e uke ne fe‵paki mo latou,+ ka fai mai ei latou, ‘Ona ko te Atua e se nofo i a tatou, e mata, tenā te pogai ko oko mai ei a puapuaga konei ki a tatou?’+ 18  Kae ka ‵muni eiloa au i te aso tenā ona ko mea ma‵sei katoa ne fai ne latou i te ‵fuli atu ki nisi atua.+ 19  “Nei la, tusi ki lalo te pese tenei mō koutou+ kae akoako atu ki tino Isalaelu.+ Fai ke tauloto* ne latou ko te mea ke fai te pese tenei mo fai taku molimau ki tino Isalaelu.+ 20  Kafai ko aumai ne au latou ki te fenua ne tauto au ki olotou tupuga+​—telā e ‵tafe i ei a susu mo hani+​—kae ‵kai latou i ei ke ma‵kona kae fia‵fia,*+ ka ‵fuli atu latou ki nisi atua kae tavini atu ki a latou kae fakaasi mai ne latou te se āva ki a au kae ofa taku feagaiga.+ 21  Kafai ko oko atu ki a latou a puapuaga mo fakalavelave e uke,+ ka fai a te pese tenei e pelā me se molimau ki a latou (me e se ‵tau o puli i tino ne ‵tupu mai i a latou a te pese tenei), me ko leva ne iloa ne au a mea e ma‵nako latou ki ei+ kae koi tuai o aumai ne au latou ki loto i te fenua telā ne tauto au ki ei.” 22  Ne tusi ne Mose te pese tenei i te aso tenā kae akoako ne ia ki tino Isalaelu. 23  Tenā ne fakatonu atu ei a ia* ki a Iosua+ te tama tagata a Nuno kae fai atu: “Ke loto toa kae loto malosi,+ me ko koe ka aumai ne koe a tino Isalaelu ki loto i te fenua telā ne tauto au ki a latou,+ kae ka fakatasi atu faeloa au ki a koe.” 24  I te otiga eiloa ne tusi katoa ne Mose a pati o te Tulafono tenei i se tusi,+ 25  ne fakatonu atu a Mose ki tino Levi kolā e sau ne latou te pusa o te feagaiga a Ieova, ana muna: 26  “Puke te tusi tenei o te Tulafono+ kae tuku atu i tafa o te pusa o te feagaiga+ a Ieova te otou Atua, kae ka fai te mea tenei mo fai se molimau ki a koe i konā. 27  Me iloa ‵lei ne au otou uiga ‵teke+ mo te otou loto ma‵keke.*+ Kafai ne ‵teke malosi koutou ki a Ieova i te taimi koi ola ei au i otou tafa, kae sili atu la māfai ko mate au! 28  Fakamaopoopo fakatasi mai a toeaina o otou matakāiga mo otou ofisa, ke fai atu ne au a pati konei kae fakalogo‵logo mai latou, kae ka fai ne au a te lagi mo te lalolagi ke fai mo molimau ki a latou.+ 29  Me e iloa ‵lei ne au me mai tua o toku mate, ka fai eiloa ne koutou a mea ma‵sei+ kae ‵fuli kea‵tea mai te auala ne fakatonu atu ne au ki a koutou. Kae ka oko atu eiloa ki a koutou a puapuaga+ i aso mai mua, me ka fai ne koutou a mea ma‵sei i te kilokiloga a Ieova kae ka fakafanoanoa ne koutou a ia ki galuega e fai ki otou lima.” 30  I te taimi e fakalogo‵logo mai ei a te fakapotopotoga kātoa o Isalaelu, ne fai atu ne Mose a pati o te pese tenei mai te kamataga ke oko ki te fakaotiga:+

Fakamatalaga mai lalo

Epelu, “o fano ki tua kae ulu mai ki loto.”
Io me “Fale Fakamalumalu sē Tumau.”
Epelu, “tama‵liki fo‵liki.”
Epelu, “‵moe fakatasi mo ou tupuga.”
Epelu, “Tuku atu ki loto i olotou gutu.”
Epelu, “fanaka o putaputa.”
E mautinoa me ko te Atua.
Epelu, “ua makeke.”